ཧི་མ་ལ་ཡའི་འབྲུག་པའི་སྐབས།

ལ་དྭགས་རྒྱལ་སྲས་ཚེ་དབང་མཐུ་སྟོབས་རྡོ་རྗེའི་རྣམ་ཐར།

༈ ལ་དྭགས་རྒྱལ་སྲས་རིན་པོ་ཆེ་མི་ཕམ་ཚེ་དབང་མཐུ་སྟོབས་རྡོ་རྗེ་ནི། ཡབ་ཆོས་རྒྱལ་བདེ་སྐྱོང་རྣམ་རྒྱལ་དང༌། ཡུམ་རྒྱལ་མོ་ཀུན་འཛོམས་གཉིས་ཀྱི་སྲས་སུ། རབ་བྱུང་བཅུ་གཉིས་པའི་ལྕགས་ཁྱི་༼༡༧༣༠༽ལོར་འཁྲུངས། ཁབ་ཏུ་བཞུགས་དུས་མཚན་ས་སྐྱོང་རྣམ་རྒྱལ་ཡིན། གཞོན་ནུ་ནས་དགེ་བའི་བྱ་བར་ཐུགས་སྟོབས་ཤིན་ཏུ་ཆེ་ཞིང༌། ཧེ་མིར་ཆོས་ཞུགས་མཛད། དགོན་པའི་སློབ་གཉེར་མཐར་ཕྱིན་ནས་དགེ་འདུན་སྤྱིའི་ལས་སྣེ་རྣམས་རིམ་བཞིན་བཞེས། རྗེ་སྟག་ཚང་རས་པའི་གདན་ཚབ་ཀྱང་མཛད། འདི་སྐབས་ཀཿཐོག་རིག་འཛིན་ཚེ་དབང་ནོར་བུ་ལ་དྭགས་སུ་ཕེབས་པའི་དྲུང་དུ། རྒྱལ་སྲས་རིན་པོ་ཆེ་དང༌། ཕྱག་མཛོད་བཀྲ་ཤིས་གཉིས་ཀྱིས་

རྒྱལ་སྲས་མཆོག་སྤྲུལ་ཚེ་དཔལ་དོན་གྲུབ་རྣམ་རྒྱལ་གྱི་རྣམ་ཐར།

  ༈ རྒྱལ་སྲས་མཆོག་སྤྲུལ་རིན་པོ་ཆེ་ནི། ཆོས་རྒྱལ་ཚེ་བརྟན་རྣམ་རྒྱལ་གྱི་སྲས་སུ་འཁྲུངས། ཁ་ཅིག་གིས་ཚེ་དཔལ་དོན་གྲུབ་རྣམ་རྒྱལ་གྱི་སྲས་ཡིན་པར་བཤད། རྒྱལ་པོ་དེ་གཉིས་སྤུན་མཆེད་ཡིན། ཁབ་ཏུ་བཞུགས་པའི་མཚན་ཚེ་དཔལ་དོན་གྲུབ་རྣམ་རྒྱལ་ཡིན། རྒྱལ་སྲས་རིན་པོ་ཆེའི་རྗེས་སུ་འདིའི་གདན་ས་བསྐྱངས། དེ་དུས་ལ་དྭགས་རྒྱལ་བློན་ནང་ཕན་ཚུན་མ་མཐུན་པ་དང༌། བོད་དབུས་གཙང་གི་དམག་གི་ཟིང་ཆས་རྐྱེན་གྱིས་མཆོག་སྤྲུལ་རིན་པོ་ཆེ་སྤི་ཏིའི་ཕྱོགས་སུ་བྲོས་བྱོལ་དུ་ཕེབས། མཐར་སྤི་ཏི་རང་དུ་སྐུ་གཤེགས། དེ་ནས་བཟུང་སྤི་ཏིར་སྐུ་ཕྲེང་རིམ་པར་བྱོན་སྐད་དོ། །༼ལ་དྭགས་རྒྱལ་སྲས་འདི་གཉིས་ཀྱི་ལོ་རྒྱུས་དེང་སང་གསར་བྲིས་ལ་གཞིར་བཟུང་ཡང་ད་དུང་དཔྱད་དགོས་པར་སྣང༌།༽

ཟངས་དཀར་ཨ་ཏིང་གྲུབ་ཆེན་ངག་དབང་ཚེ་རིང་གི་རྣམ་ཐར།

༈ ཟངས་དཀར་ཨ་ཏིང་གྲུབ་ཆེན་ངག་དབང་ཚེ་རིང་ནི། ཟངས་དཀར་ཨ་ཏིང་ཞེས་པའི་ཡུལ་དུ། ཡབ་ངག་དབང་དཔལ་བཟང་དང༌། ཡུམ་སྒྲོལ་མ་གཉིས་ཀྱི་སྲས་སུ། རབ་བྱུང་བཅུ་གཅིག་པའི་མེ་བྱ་༼༡༦༥༧༽ལོར་འཁྲུངས། ༼འདི་རང་རིག་རས་པའི་དངོས་སློབ་ཡིན་པར་བཤད་པས། རབ་བྱུང་བཅུ་གཉིས་པའི་མེ་བྱ་ཟེར་བ་ནི་ནོར་རོ།༽

ཟངས་དཀར་གྲུབ་སྲས་ཀུན་བཟང་རྡོ་རྗེའི་རྣམ་ཐར།

༈ གྲུབ་སྲས་ཀུན་བཟང་རྡོ་རྗེ་ནི། ཡབ་གྲུབ་ཆེན་དེ་ཉིད་དང༌། ཡུམ་ལྡེ་དཔལ་འཛོམས་ཀྱི་སྲས་སུ། རབ་བྱུང་བཅུ་གཉིས་པའི་ས་བྱི་༼༡༧༠༨༽ལོར་འཁྲུངས། གྲུབ་ཐོབ་ངག་བཅད་ཞུ་བའི་སྒྱུ་འཕྲུལ་དུ་གྲགས། སྐྱེས་སྦྱངས་ཀྱི་མཐུས་ཤེས་བྱ་ལ་མཁྱེན་རྒྱ་ཆེ། ཡབ་ལས་དབང་ལུང་ཁྲིད་གསུམ་བུམ་པ་གང་བྱོར་ཐོབ

ཟངས་དཀར་གྲུབ་སྲས་བཞད་པ་རྡོ་རྗེའི་རྣམ་ཐར།

༈ ཟངས་དཀར་གྲུབ་སྲས་བཞད་པ་རྡོ་རྗེ་ནི། ཡབ་རྣལ་འབྱོར་པ་ངག་དབང་ཚེ་རིང་དང༌། ཡུལ་ལྡེ་དཔལ་འཛོམ་གཉིས་ལ་རིགས་སྲས་ཀུན་བཟང་རྡོ་རྗེ་དང་རྗེ་འདི་བཅས་གཉིས་བྱུང་བའི་ཆུང་ཤོས་སུ། རྫོང་ཁུལ་ནཱ་རོའི་སྒྲུབ་ཕུག་ཏུ་རབ་བྱུང་བཅུ་གཉིས་པའི་ལྕགས་ཡོས་༼༡༧༡༡༽ལོའི་དཔྱིད་ཟླ་བཞི་པའི་ཚེས་བཞིའི་ཐོ་རངས་སུ་འཁྲུངས། ཡབ་ཀྱིས་འདི་རྟ་མགྲིན་ལྷའི་ང་རྒྱལ་གྱི་སྐབས་སུ་བསྒྲུབས་པས། མ་འོངས་པར་ཀུན་དབང་དུ་འདུ་བ་ཞིག་ཡོང་ཡང༌། རཱ་གའི་རྣམ་འགྱུར་ཆེར་བདོ་བ་ཞིག་ཡོང་གསུངས། ཐུགས་རབ་ཆེ་བས་གཞོན་ནུ་ནས་འབྲི་ཀློག་རྣམས་དཀའ་ཚེགས་མེད་པར་མཁྱེན། ཡབ་ལས་རང་ལུགས་ཀྱི་དབང་ལུང་ཁྲིད་ཐབས་ཅད་གསན། སློབ་དཔོན་འབྱོར་ཚེ་རིང་མདུན་ལྷ་བྲིས་སྦྱངས་ནས་མཁས་པར་གྱུར། ལྷོ་འབྲུག་ཏུ་ཕེབས། གདན་ས་སྤུངས་ཐང་དུ་ལོ་དྲུག་བཞུགས་ནས། གཙོ་བོར་རྗེ་མཁན་རབས་བདུན་པ་ངག་དབང་ཕྲིན་ལས་བསྟེན་ཏེ། རྗེ་དེ་ལས་བསྙེན་པར་རྫོགས་ཤིང༌། མཚན་ཚུལ་ཁྲིམས་ཆོས་ཀྱི་འབྱུང་གནས་ཞེས་གནང༌། སྨིན་གྲོལ་རྒྱབ་རྟེན་དང་བཅས་པ་དཔག་ཏུ་མེད་པ་གསན་བསམ་མཛད། རྩ་བའི་བླ་མར་འཛིན། སློབ་དཔོན་གཞན་ལས་ཀྱང་ལཉྫ་ཝརྟུ་སོགས་རིག་གནས་སྐོར་དང༌། འབྲུག་ལུགས་དཀྱིལ་ཆོག་གར་ཐིག་གི་ཕྱག་ལེན་བཅས་མཐར་ཕྱིན་སྦྱངས། གདན་སར་འཁོར་སྐབས་བལ་ཡུལ་མཆོད་རྟེན་རྣམ་གཉིས་དང་གངས་ཏི་སེ་སོགས་སུ་གནས་སྐོར་ལ་བྱོན། སྐབས་དེར་སྤུ་རངས་ཁོ་ཆགས་དགེ་བཤེས་མདུན་ནས་སྙན་ངག་ལེའུ་གསུམ་ལ་མཁས་པར་སྦྱངས། སླར་རང་ཡུལ་དུ་བྱོན་ནས་གྲུབ་པའི་སློབ་དཔོན་འཇིགས་དབང་རོལ་པའི་རྡོ་རྗེ་ལས་བསྲེ་འཕོ། སྙན་རྒྱུད། བླ་སྒྲུབ་རིམ་གཉིས་གདན་རྫོགས་རྣམས་ཉམས་ཁྲིད་དུ་གསན་ཏེ། དགུང་ལོ་ཞེ་བཞི་ཤིང་ཁྱི་ལོའི་བོད་ཟླ་ལྔ་པའི་ཚེས་དྲུག་ནས་བཟུང་བླ་མ་འཇིགས་དབང་གིས་ཕུག་སྒོ་བསྡམས་པར་གནང་ནས། བུག་སྒོ་འདག་སྦྱར་གྱིས་ཐོག་མར་སྔོན་འགྲོ་དང༌། དེ་ནས་ཟབ་ལམ་བླ་སྒྲུབ་ཐུན་མིན་རིམ་གཉིས་གདན་རྫོགས་ལ་ཚུལ་བཞིན་ཉམས་ལེན་གནང་བས། ཕྱི་རོལ་གྱི་འཛིན་རྟོགས་དབྱིངས་སུ་དག་ནས་བདེ་སྟོང་དབྱེར་མེད་ལ་ངེས་ཤེས་ནང་ནས་རྙེད་དེ། ཕྱི་སྡོམ་པ་མེད་སྙམ་འདྲ་ཡང་དོན་གྱི་དགེ་སློང་འདྲའམ་སྙམ་པའི་དུས་ཚོད་ཅིག་བྱུང་གསུངས། གཞན་ཡང་དཀོན་མཆོག་སྤྱི་འདུས། དྲག་དམར། མི་འཁྲུགས་པ་སོགས་ཀྱི་བསྙེན་པ་བསྐྱལ་ཏེ། རྫོང་ཕུག་ཏུ་སྐུ་མཚམས་ལོ་བཅུ་གཉིས་ཙམ་དང༌། མོན་བོད་མཚམས་ཀྱི་གངས་མགུལ་དུ་དཀའ་ཐུབ་བཅུད་ལེན་ལ་བརྟེན་ནས་བཞུགས་པ་སོགས་དབེན་པའི་གནས་དུ་མར་བསྙེན་སྒྲུབ་ལོ་མང་མཛད་པས། བཀའ་བརྒྱུད་བླ་མའི་བྱིན་རླབས་དང་སློབ་མའི་མོས་གུས་རྟེན་འབྲེལ་འཛོམས་པའི་མཐུ་ལས་ཉམས་རྟོགས་ལེགས་པར་འཁྲུངས་ཏེ་མཁས་གྲུབ་གཉིས་ལྡན་དུ་གྱུར། སྔ་རྗེས་སུ་ཀ་ཎི་ཀའི་གཙུག་ལག་ཁང་དང༌། སྟག་སྣའི་འདུ་ཁང༌། གར་ཞའི་འདུ་ཁང་གི་ལྡེབས་བྲིས་སོགས་མཛེས་ཤིང་དྭངས་བ་འདྲེན་པའི་ཕྱག་ཤུལ་རྣམས་དེང་སང་ཡང་མཇལ་རྒྱུ་ཡོད། སྐུ་དུས་སུ་རྫོང་ཁུལ་དགོན་པར་སྐུ་གསུང་ཐུགས་རྟེན་དང་གསུང་རབ་ཀྱི་པར་ཤིང་མང་པོ་གསར་དུ་བཞེངས་ཤིང༌།…