རྒྱལ་དབང་དཔག་བསམ་དབང་པོ་ནས་བརྒྱུད་པའི་སྐབས།

ཅོག་གྲྭ་གཉིས་པ་སྙན་གྲགས་དཔལ་བཟང་གི་རྣམ་ཐར།

ངག་དབང་ཀུན་དགའི་མེ་ཏོག་ལྷུན་གྱིས་གྲུབ། ། སྙན་གྲགས་དཔལ་གྱི་དྲི་བསུང་ཕྱོགས་ཀུན་ཁྱབ། ། གསང་ཆེན་བསྟན་འཛིན་བཟང་པོའི་འབྲས་བུ་སྨིན། ། དོན་བརྒྱུད་སྐྱེད་ཚལ་མཛེས་རྒྱན་རྣམ་གསུམ་འདུད། །   ༈ རྒྱལ་དབང་དཔག་བསམ་དབང་པོའི་ཞལ་སློབ་སྤྲུལ་སྐུ་རྣམ་གསུམ་ལས། རྗེ་ཅོག་གྲྭ་སྤྲུལ་སྐུ་མི་ཕམ་ངག་དབང་སྙན་གྲགས་དཔལ་བཟང་ནི། གཡོ་རུའི་ཡུལ་གྱི་སྟོད། བཟང་ཡུལ་གྲོང་གསར་དུ། ཡབ་ནང་སོ་གཡུང་དྲུང་རྒྱལ་པོ་དང་ཡུམ་བསོད་ནམས་བུ་ཁྲིད་ཀྱི་སྲས་སུ། རབ་བྱུང་བཅུ་པའི་ས་རྟ་༼༡༦༡༨༽ལོར་སྐུ་འཁྲུངས། བོད་མཁས་པ་དང་འཁྲུངས་ལོ་གཅིག །དགུང་ལོ་བཞི་ཙམ་པའི་དུས་བསྟོད་ཚོགས་འགའ་རེ་དང༌། ཡི་གེའི་ཕྱི་མོ་སུམ་ཅུ། རི་མོའི་འདུ་བྱེད་རྣམས་རང་བྱུང་དུ་མཁྱེན། གོང་མའི་ཞལ་སློབ་བསམ་གཏན་པ་བགྲེས་པོ་ཞིག་མཇལ་དུ་ཕྱིན་པས། བསམ་གྲུབ་རྣམ་རྒྱལ་ཡིན་པ་འདུག་གསུང་ངོ་ཤེས། རྒྱལ་དབང་འབྲུག་པ་དཔག་བསམ་དབང་པོས་རྗེ་གོང་མའི་སྤྲུལ་སྐུར་འཁྲུལ་མེད་དུ་ངོས་བཟུང༌། ཞལ་མཇལ་བའི་ཚེ་སྔར་འདྲིས་ཀྱི་མཛའ་བོ་འཕྲད་པ་ལྟར་གྱུར། གཙུག་ཕུད་བཞེས་ཏེ། མཚན་ངག་དབང་སྙན་གྲགས་དཔལ་བཟང་པོར་གསོལ། དྲུག་པར་གདན་ས་དོན་ཀུན་གྲུབ་པའི་ཀུན་དགའ་ར་བར་མངའ་གསོལ་རྟེན་འབྲེལ་རྒྱས་པ་མཛད། དུས་ཞབས་ཆེན་པོ་དཔལ་རྒྱས་ལོ་ཙཱ་བ་སློབ་དཔོན་དུ་བསྟེན་ནས་སྒྲ་སྙན་ངག །རྩིས་དཀར་ནག་སོགས་ཐུན་མོང་གི་རིག་གནས་དང༌། སྡོམ་པ་གསུམ་དང་རྒྱུད་སྡེ་བཞི་སོགས་ཐུན་མིན་གྱི་གཞུང་ལུགས་ཕྲ་རགས་ཀུན་ལ་མ་རྨོངས་པའི་ཐོས་བསམ་མཐར་ཕྱིན་པ་གྱུར། བཅོ་བརྒྱད་པར་རྒྱལ་དབང་འབྲུག་པ་དཔག་བསམ་དབང་པོའི་ཞལ་སྔ་ནས་མཁན་པོ་དང༌། རྗེ་མི་ཕམ་བློ་གྲོས་ཀྱིས་ལས་སློབ་མཛད་དེ། དགེ་འདུན་ཚང་བའི་དབུས་སུ་བསྙེན་པར་རྫོགས། དེ་ནས་བཟུང་ཚོགས་ཀྱི་འཁོར་ལོའི་དམ་ཚིག་ཏུ་དྲི་ཙམ་ལས་དམར་སྐྱུར་སྤྱན་ལམ་དུ་མི་འགྲིམ་པར་བཙུན་པའི་དཔེར་འོས། རྒྱལ་དབང་མཆོག་རིགས་ཀྱི་བདག་པོར་བསྙེན་ཏེ། འབྲུག་ལུགས་གཙོ་བོར་གྱུར་པའི་སྨིན་གྲོལ་གྱི་རིམ་པ་དཔག་ཏུ་མེད་པ་གསན་བཞེས་གནང་ཞིང༌། མཐའ་དྲུག་ཚུལ་བཞི་ཕྱི་ནང་གཞན་གསུམ་གྱི་དོན་ཐམས་ཅད་སྤོམ་ཡོར་དུ་མ་བཞག་པར་ཞུ་ཏིག་དང་ནན་ཏན་ཆེན་པོས་གཏན་ལ་ཕབ་ཅིང༌། ཐུགས་རྒྱུད་དང་སྦྱར། ཁྱད་པར་ཕག་མོའི་བྱིན་རླབས་གནང་དུས་ཡེ་ཤེས་ཀྱི་རོལ་པ་ལ་འབྱམས་ཏེ། བྱིན་རླབས་འཕོ་བའི་དབང་ཐོབ། དེའི་ཚེ་བླ་མ་དང་ལྷག་པའི་ལྷ་དབྱེར་མེད་པའི་ཞལ་ནས། ཕྲིན་ལས་རབ་འབྱམས་འགྲུབ་པར་ལུང་བསྟན། ཆོས་འདིའི་བཀའ་བབ་ཡོངས་སུ་གཏད་དོ། །ཆོས་རྗེ་མི་ཕམ་བློ་གྲོས་ལ། ཚེ་དབང་གྲུབ་རྒྱལ་ལུགས།…

སྟག་རྩེ་བྱ་བྲལ་མི་ཕམ་ཕུན་ཚོགས་ཤེས་རབ་ཀྱི་རྣམ་ཐར།

༈ དེའི་སློབ་མའི་གཙོ་བོ་སྟག་རྩེ་བྱ་བྲལ་མི་ཕམ་ཕུན་ཚོགས་ཤེས་རབ་ནི། སྐུ་ཕྲེང་དང་པོ་ཆོས་གྲགས་བསྟན་པ་རབ་འཕེལ་ཞེས་པ་དེ། བྱ་པཎྜི་ཏ་མི་ཕམ་ཆོས་ཀྱི་བླ་མ་དང༌། ཀུན་མཁྱེན་ཆེན་པོས་ས་ཐོབ་ཀྱི་སྐྱེས་བུར་ལུང་བསྟན། སྐུ་ཕྲེང་གཉིས་པ་ཀུན་མཁྱེན་དང་སེམས་དཔའ་རིན་ཆེན་དཔལ་བཟང་གཉིས་ཀྱི་དངོས་སློབ་བྱར་སྟག་རྩེ་སྐུ་སྐྱེ་ངག་དབང་བསོད་ནམས་དཔལ་བཟང༌། དེའི་སྐུ་སྐྱེ་དམ་པ་འདི་ཉིད་བྱོན་པ་སྟེ། བོད་དབུས་གཙང་དུ་རབ་བྱུང་བཅུ་གཅིག་པའི་ཆུ་རྟ་༼༡༦༤༢༽ ལོར་འཁྲུངས། རྒྱལ་དབང་མི་ཕམ་དབང་པོ་དང་དགུང་མཉམ། ཆུང་ནས་ཆོས་འཆད་ཚུལ་སོགས་དམ་པའི་བག་ཆགས་མངའ། དགུང་ལོ་ལྔ་དྲུག་ཙམ་ལོན་པའི་སྐབས་རྗེ་ཅོག་གྲྭ་སྙན་གྲགས་དཔལ་བཟང་ཐོག་མར་བྱར་དུ་མཇལ་ཏེ། ཚེ་རྟའི་བཀའ་དབང་ཐོབ། ཞལ་མཇལ་བའི་མོད་ལ་ཟིལ་བུན་པ་དང་བཅས་འདིར་སྣང་གི་ཞེན་པ་ཡུད་ཅིག་འགགས། དེ་ནས་བཟུང་དད་པའི་དབང་པོ་ཕྲོགས། དགུང་ལོ་བརྒྱད་པར་སྐུ་གོང་མའི་ཡང་སྲིད་དུ་ངོས་འཛིན་གྱིས་གདན་ས་བྱར་ཡུལ་སྟག་རྩེ་པད་དཀར་འབྲུག་རྒྱས་སུ་ཁྲི་འདོན་དང༌། མཚན་མི་ཕམ་ཕུན་ཚོགས་ཤེས་རབ་ཅེས་གསོལ། རྗེ་ཅོག་གྲྭ་སྐུ་ཞབས་རིགས་ཀྱི་ཅོད་པན་དུ་བསྟེན་ཏེ། རིམ་བཞིན་ཚིགས་བར་མ་དགེ་ཚུལ་གྱི་བསླབ་པ་དང༌། ཐུན་མོང་དང་ཐུན་མིན་གྱི་རིག་གནས་ལ་གསན་བསམ་རྒྱ་ཆེར་གནང༌། ཁྱད་པར་ཆོས་རྗེ་གཙང་པ་རྒྱ་རས་གདན་ས་རིམ་བརྒྱུད་ཀྱི་ཕྱག་རྒྱ་ཆེན་པོའི་ཁྲིད་སྲོལ་གཙང་མ་གཞན་གྱིས་བསྲེ་བསླད་མེད་པའི་སྒོམ་ཁྲིད་དང༌། གཞན་ཡང་ནཱ་རོ་ཆོས་དྲུག །ལམ་ཟབ་བླ་སྒྲུབ། རྟེན་འབྲེལ། རོ་སྙོམས། སྦྱོར་དྲུག་གསར་མ། བསྲེ་བ་འབུམ་ནག །རྡོ་རྗེ་གསུམ་གྱི་བསྙེན་སྒྲུབ་སོགས་ཁྲིད་ལུང་དབང་མཐའ་ཡས་པ་གསན། གཞན་ཡང་བླ་མ་མང་པོར་བསྟེན། འཆད་རྩོམ་ལ་ཐོགས་པ་མེད་པར་གྱུར། གདན་སར་ཀུན་མཁྱེན་འབྲུག་པའི་འཁྲུངས་རབས་ཕུན་སུམ་ཚོགས་པའི་སྐུ་བརྙན་འབུར་སྐུ་བཅུ་གསུམ་དང༌། མི་འཁྲུགས་པའི་སྟོང་རྩ་སོགས་བཞེངས་ཏེ། དེའི་དཀར་ཆག་སྙན་ངག་གིས་སྤྲས་པ་བརྩམས། སོ་གཉིས་ལ་ངེས་མེད་བྱ་བྲལ་ལ་འབྱོན་པའི་བློ་ཁོངས་ནས། བདོག་པའི་དངོས་པོ་སྤོང་ཐག་མཛད་དེ་ཅོག་གྲྭའི་སྐུ་ཞབས་སུ་ཕུལ་ཅིང༌། ཆོས་ཀྱི་བདུད་རྩིའི་མྱང་འཕྲོ་རྣམས་ལེགས་པར་གསན་ནས་སླར་བྱོན་པའི་ཚེ། སྐུ་ཞབས་ནས་བྱང་ཆུབ་ལྗོན་ཤིང་གི་ཕྱག་ཕྲེང་ཕྱག་ནས་ཕུད་དེ་སྐེ་ལ་བསྐོན། ལག་པ་གཡས་སུ་བྱིན་རླབས་ཀྱི་ཐུམ་བུ་དང༌། གཡོན་དུ་ཀ་ར་རྡོག་པོ་ཆེན་པོ་ཞིག་གཏད། རྒོད་ཚང་པའི་དམ་བཅའ་གསུམ་མའི་དཔེ་དང༌།…

གྲུབ་དབང་སྤྲུལ་སྐུ་བསྟན་འཛིན་བཟང་པོའི་རྣམ་ཐར།

  ༈ རྒྱལ་དབང་དཔག་བསམ་དབང་པོའི་ཞལ་སློབ་སྤྲུལ་སྐུ་རྣམ་གསུམ་ལས། གྲུབ་དབང་སྤྲུལ་སྐུ་ངག་དབང་བསྟན་འཛིན་བཟང་པོ་ནི། དེ་ཡང་རྣལ་འབྱོར་གྱི་དབང་ཕྱུག་འབྲུག་སྨྱོན་ཀུན་དགའ་ལེགས་པའི་སྐུ་སྐྱེ་གྲུབ་ཐོབ་རིན་པོ་ཆེ་ཞེས་པ་ཀུན་མཁྱེན་པད་དཀར་གྱི་དངོས་སློབ་གྲས་སུ་བཞུགས་ཤིང༌། དེའི་ཡང་སྲིད་འདི་ཉིད། སྡེ་པ་ལྷ་ཁང་པའི་ཕྱག་གཡོག་ཅིག་ལ་འཁྲུངས་ཤིང༌། ཉི་ཟེར་ལ་ལུག་ཤ་ལག་ཡ་འགེལ་བ་སོགས་གྲུབ་པའི་རྟགས་ངོ་མཚར་བ་མང་པོ་སྟོན་པ་དེ་ལ། རྒྱལ་དབང་དཔག་དབང་པོས་ཆུ་ཁྱི་ལོ་ཤར་མཚོམས་སུ་ངོས་འཛིན་བདག་རྐྱེན་སོགས་གྲུབ་ཐོབ་རིན་པོ་ཆེ་ལ་གནང་བ་བཞིན་མཛད། ཡབ་ཡུམ་ལ་བླུ་ཡོན་དང་ཁྲལ་ཆག་སོགས་ཡིད་ཚིམས་པར་གནང༌། དབུ་སྐྲ་གཙུག་ཕུད་བཞེས། འབྲུག་ངག་དབང་བསྟན་འཛིན་བཟང་པོ་ཞེས་མཚན་སྩལ། ན་བཟའ་སོགས་འཕྲལ་གྱི་ཉེར་མཁོ་སྒར་ཕྱག་མཛོད་ནས་གནང་བ་དང༌། ཕྱིས་ལྕགས་ལུག་ལོར་ཅིག་ཅར་དཔལ་གྱི་ནགས་ལྗོངས་ཀྱི་རྡོ་རྗེ་འཛིན་པར་རྡོར་འཛིན་གཞན་ལས་ལྷག་པའི་བསྐོ་བཞག་གནང་ཞིང༌། ཤིང་ཕག་ལོར་དོན་གྱི་སླད་དུ་མཚན་ནས་སྨོས་ན་མཁན་པོ་རྒྱལ་དབང་རྫོགས་པའི་སངས་རྒྱས་དཔག་བསམ་དབང་པོ། འཁོར་དགྲ་བཅོམ་པ་རྣམ་པར་གྲོལ་བའི་ཡེ་ཤེས་མངོན་དུ་མཛད་པ་ཆོས་རྗེ་མི་ཕམ་བློ་གྲོས་དང་རྒྱལ་དབང་པད་དཀར་སོགས་རིག་གྲོལ་སྨྲ་བའི་དགེ་འདུན་གྱི་དབུས་སུ་དགུན་ཟླ་བཞི་པའི་གྲལ་ཚེས་བཟང་པོ་མངོན་དུ་གྱུར་པར་བསྙེན་པར་རྫོགས། མཁན་པོ་དེ་ཉིད་ཀྱིས། ཡོངས་འཛིན་སྤྲུལ་སྐུ་དང་འདི་གཉིས་སྒེར་ལ་དཔལ་ལྡན་ལྷ་མོའི་རྗེས་གནང༌། ཕྱག་ཆེན་གྱི་ཁྲིད་བསྩལ་ཅིང༌། གཞན་ཀུན་མཁྱེན་བཀའ་འབུམ་གྱི་ལྗགས་ལུང་སོགས་གནང་ནས་རྗེས་སུ་བཟུང༌། དུས་འཁོར་བསྡུས་རྒྱུད་རྒྱུགས་འབུལ་མཛད་པ་སོགས་གསན་སྦྱང་མཐར་ཕྱིན་པ་མཛད། ཅོག་གྲྭ་སྙན་གྲགས་དཔལ་བཟང་སོགས་བླ་མ་མང་པོ་ལས་བཀའ་ཆོས་གསན། འདི་ཉིད་སྐུ་ན་ཕྲ་མོ་ནས་གྲུབ་རྟགས་ཀྱི་སྙན་གྲགས་ཆེ་ཞིང༌། བཟང་ལ་སྐུ་བཙུན་པས་ངུར་སྨྲིག་འཛིན་པའི་བརྟུལ་ཞུགས་ཆེན་པོར་བཞུགས་ཤིང༌། གཞན་སྣང་དབང་དུ་འདུས་པའི་ཕྲིན་ལས་ཀྱི་སྣང་བས་དཔལ་རིར་གྲྭ་ཚང་འཛུགས་པ་སོགས་བསྟན་པའི་བྱ་བའང་རྒྱ་ཆེར་མཛད་པ་ཞིག་ཡིན་པས། གྲུབ་དབང་སྐུ་ཕྲེང་ལྔ་པ་ཀུན་དགའ་མི་འགྱུར་རྡོ་རྗེས་མཛད་པའི་འཁྲུངས་རབས་གསོལ་འདེབས་ལས་ཀྱང༌། མཐའ་ཡས་རྨད་བྱུང་སྙིང་རྗེའི་གཞན་དོན་ལ། །ལྷག་པར་དགྱེས་ནས་རྣམ་མང་འགྲོ་བའི་ཁམས། །ཡང་དག་ངེས་གསང་བདུད་རྩིས་བརླན་མཛད་པ། །ངུར་སྨྲིག་འཛིན་པ་ཆེ་དེར་གསོལ་བ་འདེབས། །ཞེས་གསུངས་སོ། །འདིའི་རྣམ་ཐར་ཤིན་ཏུ་དཀོན་པས་ལོ་ཆེན་དཔལ་རྒྱས་དབང་པོས་མཛད་པའི་རྒྱལ་དབང་དཔག་བསམ་དབང་པོའི་རྣམ་ཐར་སོགས་ལས་འབྱུང་བ་ལྟར་ཡིན་ནའང་ད་དུང་འཁྲུངས་འདས་ལོ་ཚིགས་གསལ་པོ་མ་རྙེད་དོ། །

ཁམས་སྤྲུལ་གཉིས་པ་ཀུན་དགའ་བསྟན་འཕེལ་གྱི་རྣམ་ཐར།

༈ དེའི་སློབ་མ་ཁམས་སྤྲུལ་གཉིས་པ་ཀུན་དགའ་བསྟན་འཕེལ་ནི། ཁམས་ཆབ་མདོའི་རྫ་རྒྱུད་དབེས་མདར། ཡབ་ཉ་རྒྱས། ཡུམ་ལྷ་མོ་དཀར་མོ་སྐྱིད་གཉིས་ཀྱི་སྲས་སུ་རབ་བྱུང་བཅུ་གཅིག་པའི་ས་ཡོས་༼༡༦༣༩༽ལོར་བལྟམས། མཐུ་ཆེན་གསུམ་པ་དང་འཁྲུངས་ལོ་གཅིག །ཆུང་དུས་གཅེན་སི་ཏུ་ཕྲིན་ལས་རབ་བརྟན་དང་ལྷན་དུ་ཀརྨ་དགོན་ཆེན་དུ་བཞུགས་ཏེ། འབྲི་ཀློག་སོགས་རིག་གནས་ལ་མཁས་པར་མཛད། དེ་ནས་རྗེ་ཡོངས་འཛིན་ཀུན་དགའ་ལྷུན་གྲུབ་མཆོག་གིས་གོང་མའི་ཡང་སྤྲུལ་ཡིན་པ་དང་བདེ་ཆོས་སུ་ཡར་ཕེབས་དགོས་ཚུལ་གྱི་བཀའ་འཕྲིན་བསྩལ་ཚུལ། རྗེ་གོང་མའི་བུ་ཆེན་བསོད་ནམས་རྒྱ་མཚོའི་རང་རྣམ་ཚིགས་བཅད་ལས། ཡོངས་འཛིན་རིན་པོ་ཆེའི་བཀའ་ཤོག །བསྐུར་ནས་གནང་བ་འབྱོར་བྱུང་བར། །གྲུབ་པའི་དབང་ཕྱུག་རིན་པོ་ཆེའི། །སྤྲུལ་སྐུ་ཀརྨའི་ཤོད་ཀྱི་གནས། །རྫ་ཆུ་མདུན་དུ་འབབས་པའི་ངོགས། །ས་འབུར་དུ་དོད་པ་ནགས་ཚལ་བརྒྱན། །ཁང་རུལ་ཞིག་ལ་ཁད་པའི་སྒོ། །ཤར་སྟོད་བྱང་ཤར་བསྟན་པའི་ནང༌། །སྤྲུལ་པའི་སྐུ་ཉིད་ཀྱ་དང་ཚེ། །བཀྲ་ཤིས་དག་གི་མཚན་འཛིན་པ། །མཁུར་ཚོས་གཡས་པར་ཤ་མཚན་བཅས། །སྔར་གྱི་གྲགས་པ་མ་ཡིན་ཀྱང༌། །ད་ལྟ་གྲགས་པའི་ས་འཛིན་པའི། །མི་ཆེན་པོའི་རིགས་སུ་ངེས་པར་འདུག །ལོ་རྙིང་པ་འདི་ལ་གདན་མ་དྲངས། །ཕྱིས་བར་ཆད་ཆེ་བས་གདན་འདྲེན་དཀའ། །གཉེར་རྒོད་མ་སོགས་ཙབ་ཙུབ་ཀྱི། །དམ་སེལ་འགྲོ་བར་མ་ཡིན་པའི། །ཁྱོད་གསོལ་བ་ཐོབ་ལ་གང་དགོས་ནོར། །སྤྲད་ནས་ཁྱོད་ཀྱིས་བླུས་ནས་འབྱོན། །ཞེས་སོགས་ཀྱི་བཀའ་ཕེབས་པ་ལྟར་རྩ་འཛིན་ལེགས་པར་ཞུས་ཤིང༌། རྫ་རྒྱུད་གྱིང་ཐང་དུ་རྗེ་བསོད་ནམས་རྒྱ་མཚོས་ཟབ་ཆོས་བཙུགས་སར་ཐོག་ཅིག་བཞུགས་རྗེས། ཚོགས་བརྒྱ་མའི་མཐིལ་དུ་གདན་དྲངས་ཏེ་ཁྲི་གསོལ་མཛད། དེ་ནས་གོང་མའི་སློབ་ཆེན་དཀོན་མཆོག་རྒྱ་མཚོ། ཕྲིན་ལས་རྒྱ་མཚོ། དཀོན་མཆོག་རིན་ཆེན། སངས་རྒྱས་རིན་ཆེན། གཞན་ཕན་རིན་ཆེན་སོགས་དང༌། འབྲུག་པ་གཉེར་རྒོད་མ་སོགས་སྦྱིན་བདག་མང་པོས་དབུས་སུ་ཕེབས་རྫོངས་ཁྲི་འབུལ་བསམ་ལས་འདས་པ་བཅས། རྗེ་བསོད་ནམས་རྒྱ་མཚོ་དང་ལྷན་དུ་རིམ་གྱིས་རི་བོར་ཆེར་ཕེབས། དེར་ཞབས་དྲུང་རིན་པོ་ཆེ་སྐུ་མཚམས་དང་ཁེལ་ཀྱང་ནན་ཞུས་ངོར། ཐུགས་ཀྱི་གཟིགས་པ་ཆེན་པོས་སངས་རྒྱས་དབོན་གྱི་ཞལ་གཟིགས་གུར་ལྷ་བརྒྱད་ཀྱི་དབང༌། ཇོ་བོ་སྤྲག་བཙན་གྱི་བཀའ་གཏད་འདོན་ཐབས་མན་ངག་དང་བཅས་པ་གནང༌། དེ་ནས་བདེ་ཆོས་སུ་ཡོངས་འཛིན་རིན་པོ་ཆེའི་སྤྱན་སྔར་བྱོན། ཚིགས་གསུམ་གྱི་བསླབ་པ་རིམ་གྱིས་མནོས་ཤིང༌། མཚན་ཀུན་དགའ་བསྟན་འཕེལ་དུ་གསོལ། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་དང་བསྲེ་སྙན་སོགས་ཟབ་ཁྲིད་དུ་མ། དཔལ་འཁོར་ལོ་སྡོམ་པ་དང་རྡོ་རྗེ་རྣལ་འབྱོར་མ་སོགས་ཀྱི་སྨིན་དབང་དཔག་མེད་ཞུས། གསན་སྒོམ་སྟབས་སུ་མཛད་པས། ཡུན་རིང་ངལ་བ་མ་དགོས་པར་སེམས་ཉིད་ལྷན་ཅིག་སྐྱེས་པའི་ཉམས་མྱོང་མཐའ་རུ་ཕྱིན་ཏེ། རྗེ་ཡོངས་འཛིན་དམ་པའི་ཞལ་ནས་ཀྱང༌། མདོ་ཁམས་ངག་དབང་བསྟན་འཕེལ་གྱི་སྤྲུལ་པ་ཁྱོད་ལ་ཡང་ཐང་ལ་བྱུང་ཡང་བྱུང་འདུག་གསུངས་ནས་ཤིན་ཏུ་མཉེས། གཞན་ཡང་ས་སྐྱ་ཞབས་དྲུང་ཀུན་དགའ་བསོད་ནམས་ལ་ལམ་འབྲས་ཀྱི་ཁྲིད་རྒྱས་པ་གསན་ཞིང༌། མཐུ་ཆེན་མི་ཕམ་ཆོས་ཀྱི་དབང་ཕྱུག་ལ་དབང་ཆོས་སྤེལ་མར་གསན་བཞེས་གནང་བ་སོགས་བླ་མ་དུ་མ་བསྟེན། ཁམས་སུ་མ་ཕེབས་པར་དགོན་པ་བདེ་ཆོས་ཀྱི་སྒྲིགས་རྒྱུན་རང་དུ་བཞུགས། གསུང་སྙན་པས་དང་པོར་དགོན་པའི་དབུ་མཛད་ཆེན་མོའི་གོ་ས་དང༌། བར་དུ་རྡོ་རྗེ་སློབ་དཔོན་མཛད། ལྷ་སྔགས་ཏིང་ངེ་འཛིན་དང་ཕྱག་རྒྱ་ཌཱ་དྲིལ་ལ་མཁས་པའི་སྙན་གྲགས་ཐོན།…

འཁྲུལ་ཞིག་སྐུ་ཕྲེང་གཉིས་པ་ཕྲིན་ལས་མཆོག་གྲུབ་ཀྱི་རྣམ་ཐར།

༈ ཡོངས་འཛིན་ཀུན་དགའ་ལྷུན་གྲུབ་ཀྱི་སློབ་མ་འཁྲུལ་ཞིག་སྐུ་ཕྲེང་གཉིས་པ་ཕྲིན་ལས་མཆོག་གྲུབ་ནི། མདོ་སྟོད་རྫ་རྒྱུད་སྨད། གྱིང་ཐང་སྡེ་པའི་དཔོན་རིགས་སུ། རབ་བྱུང་བཅུ་གཅིག་པའི་ནང་ཙམ་ལ་སྐུ་འཁྲུངས། ཆུང་ངུ་ནས་རིག་རྩལ་རྒྱས་ཤིང་མཛད་སྤྱོད་ཡ་མཚན་ཆེ། དགུང་ལོ་བདུན་ཙམ་ལ་ཀར་འབྲུག་རྣམས་ཀྱིས་འཁྲུལ་ཞིག་པའི་སྤྲུལ་སྐུར་ངོས་འཛིན་ཞལ་མཐུན་གནང་བར། གྲྭ་པ་ཁ་ཤས་དེར་སོང་ནས་སྡེ་པ་ཚང་གི་སྲས་དེ་ལུང་མཐུན་གྱི་སྤྲུལ་སྐུ་ཡིན་པར་ཞུས་པས། བུ་ཆེ་བ་ཡིན་པ་དང་ས་ཐག་རིང་བར་བསྙད་དེ་གཏོང་དུ་མ་འདོད། སྐབས་དེར་ཁྱེའུ་དེས་ལྐོག་ཏུ་ད་ལྟ་ཁྱེད་རྣམས་ཡར་སོང༌། སང་ཕོད་ཟླ་བ་བརྒྱད་པའི་ཚེས་བཅོ་ལྔའི་དགོང་མོར་ཤོག་དང་ང་རང་འགྲོའོ་གསུངས། གསུངས་པ་ལྟར་ཕྱི་ལོའི་ཟླ་ཚེས་དང་བསྟུན་ཏེ་བསུར་སོང་བས། རྩེ་གྲོགས་བྱིས་པ་ཞིག་དང་བཅས་སྒར་དུ་ཕེབས། ཕྱི་ཉིན་ཡབ་གཞིས་ནས་ར་མདའ་བྱུང་ཡང་ཁ་བ་ཆེན་པོ་བབས་པས་བགྲོད་མ་ནུས་པར་སླར་ལོག །གདན་སར་ཕེབས་འཕྲལ་གོང་མའི་ཁྲི་ལ་མངའ་གསོལ་ཞིང༌། མཚན་འཁྲུལ་ཞིག་པ་ཕྲིན་ལས་མཆོག་གྲུབ་ཅེས་གསོལ། སྤྲུལ་སྐུ་སླར་འཕྲོག་པར་དོགས་ཏེ་མངར་ལྗང་ནང་ཞེས་པའི་ས་ཆ་ཞིག་ཏུ་སྦས་ནས་བཞུགས་པས། ས་དེར་མངར་ལྗང་བླ་མ་ཕུག་ཅེས་གྲགས། དེར་བྲག་ལ་ཕྱག་ཞབས་ཀྱི་རྗེས་སོགས་གྲུབ་པའི་རྟགས་མཚན་རྣམས་གསལ། རིག་གནས་དང་སྡེ་སྣོད་གསུམ་ལ་སྦྱངས་པ་མཐར་ཕྱིན་ནས་མཁས་པའི་རྩེར་སོན། ཡི་དམ་མང་པོའི་བསྙེན་སྒྲུབ་མཛད། ཡང་ཟབ་དཀོན་མཆོག་སྤྱི་འདུས་ཀྱི་བསྙེན་པའི་སྐབས་སེང་གདོང་མའི་ཞལ་གཟིགས། བསྟན་སྲུང་ཇག་པ་མེ་ལེན་ཕྱི་བཞིན་འབྲངས་ཤིང་དངོས་སུ་ཕྲིན་ལས་བསྒྲུབས་པ་མང་བས་དགོན་འདིའི་ཐུན་མིན་གྱི་བཀའ་སྲུང་དུ་གྱུར་པར་གྲགས། དེ་ནས་དབུས་ཕྱོགས་སུ་ཕེབས། བདེ་ཆེན་ཆོས་འཁོར་དུ་ལོ་མང་ཙམ་བཞུགས་ནས་ཡོངས་འཛིན་རིན་པོ་ཆེ་ཀུན་དགའ་ལྷུན་གྲུབ་དང༌། ཆོས་ཀྱི་མགོན་པོ་སོགས་བླ་མར་བསྟེན་ནས་དཔལ་འབྲུག་པའི་ཟབ་ཆོས་གཙོ་བོར་གྱུར་པའི་གསར་རྙིང་རྒྱུད་སྡེའི་དབང་དང་གདམས་པས་ཐུགས་རྒྱུད་ཡོངས་སུ་གཏམས། སྐབས་དེར་ས་སྐྱའི་གདན་ས་གཙང་རྟ་ནག་སོགས་ཆོས་སྡེ་རྣམས་ལ་གྲྭ་སྐོར་ཡང་མཛད་པས། རྟ་ནག་མཁན་པོ་འཇམ་དབྱངས་བརྟན་པའི་རྡོ་རྗེ་ཞེས་བརྟན་མཁས་ཡོན་ཏན་རྒྱ་མཚོའི་མངའ་བདག་ཏུ་བཞུགས་པ་དེ་ཉིད་དད་དེ་ཕྱག་ཕྱིར་འབྲངས་པས། ཐུགས་སྲས་འཁྲུལ་ཞིག་ས་སྤྲུལ་ཞེས་པ་བྱུང༌། ༼འདིའི་སྤྲུལ་བརྒྱུད་འོག་ཏུ་གསལ་༽ གོང་ས་རྒྱལ་བ་སྐལ་བཟང་རྒྱ་མཚོའི་དྲུང་དུ་ཕེབས་སྐབས་གོང་ས་མཆོག་ཀྱང་རྗེ་འདིའི་ཡོན་ཏན་ལ་ཐུགས་དགྱེས་ནས། འབོལ་གདན་སུམ་བརྩེགས་ཀྱིས་བཀུར་བཟོས་དང༌། འཁྲུལ་ཞིག་པཎྚི་ཏ་ཞེས་པའི་མཚན་བསྟོད་བསྩལ། བཀའ་ཤོག་དང་ལས་ཐམ་བཅས་ཀྱི་འཇའ་ས་གནང༌། རྒྱ་སིལ་སོགས་དངོས་སྐྱེས་མང་དུ་བསྩལ། གཞུང་སའི་བཀའ་ལྟར་རྒྱལ་བའི་བཀའ་འགྱུར་ཞུ་དག་སོགས་མཛད། དེ་ནས་བཟུང་འཁྲུལ་ཞིག་པཎྚི་ཏ་ཞེས་མཁས་བཙུན་བཟང་པོའི་གྲགས་སྙན་ཕྱོགས་མཐར་ཁྱབ། ཡོངས་འཛིན་རིན་པོ་ཆེའི་བཀའ་བཞིན་སླར་གདན་ས་འཁྲུལ་ཞིག་དགོན་དུ་ཕེབས། དེར་སློབ་ཚོགས་མང་དུ་འདུས་ཤིང༌། བཤད་སྒྲུབ་འཁོར་ལོ་གསུམ་གྱིས་བསྟན་པ་སྤེལ་བའི་མཛད་ཕྲིན་རླབས་ཆེན་བསྐྱངས་པའི་མཐར།…