རྒྱལ་དབང་ཀུན་གཟིགས་ཆོས་སྣང་ནས་བརྒྱུད་པའི་སྐབས།

རྒྱལ་དབང་བརྒྱད་པ་ཀུན་གཟིགས་ཆོས་ཀྱི་སྣང་བའི་རྣམ་ཐར།

    གངས་ཅན་བསྟན་འགྲོའི་པད་ཚལ་སྐྱོང་བའི་གཉེན། ། ཀར་འབྲུག་བསྟན་པ་གསལ་བའི་ཉིན་མོར་བྱེད། ། བརྒྱུད་གསུམ་རིན་ཆེན་འོད་ཀྱི་ཕྲེང་བ་ཅན། ། རྒྱལ་དབང་ཀུན་གཟིགས་ཆོས་ཀྱི་སྣང་བར་འདུད། ། ༈ རྒྱལ་དབང་བརྒྱད་པ་ཀུན་གཟིགས་ཆོས་ཀྱི་སྣང་བའི་རྣམ་ཐར་ནི། ཀོང་པོ་ཉང་ཁའི་ཡུལ་དུ། ཡབ་ཚེ་དབང་མགོན་པོ་དང༌། ཡུམ་པད་མ་སྐྱིད་མོའི་སྲས་སུ། རབ་བྱུང་བཅུ་གསུམ་པའི་ས་བྱི་༼༡༧༦༨༽ལོར་བལྟམས། དང་པོར་མཚན་ནོར་བུ་བསམ་འཕེལ་བཏགས། དཔའ་བོ་རྡོ་རྗེ་གཙུག་ལག་དགའ་བས་རྒྱལ་དབང་འབྲུག་པ་བདུན་པའི་སྤྲུལ་སྐུར་ལུང་བསྟན། རྗེ་དེ་ལ་གཙུག་ཕུད་ཕུལ། མཚན་དཀར་བརྒྱུད་བསྟན་པའི་རྒྱལ་མཚན་འགྱུར་མེད་ཡོངས་གྲུབ་དམ་ཆོས་ཉི་མ་ཞེས་གསོལ། དགུང་ལོ་དྲུག་པར་གསང་གླིང་དུ་ཁྲིར་གསོལ་ཞུས། དགུང་ལོ་བཅུ་པར་བདེ་ཆོས་སུ་ཕེབས་ཏེ། རྗེ་འཇམ་དཔལ་དཔའ་བོའི་མདུན་ནས་དགེ་ཚུལ་གྱི་སྡོམ་པ་བཞེས། མཚན་མི་ཕམ་ཀུན་གཟིགས་ཆོས་ཀྱི་སྣང་བ་པད་དཀར་བཞད་པའི་དགེ་མཚན་འགྱུར་མེད་རྡོ་རྗེའི་སྙིང་པོ་མཆོག་ཏུ་གྲུབ་པའི་སྡེར་གསོལ། དཔལ་ལྡན་འབྲུག་པའི་དབང་ལུང་གདམས་ངག་རྒྱ་ཆེར་གསན། དེ་ནས་ལོ་གཉིས་ཙམ་ན་ཡོངས་འཛིན་རིན་པོ་ཆེ་ཞིང་བརྗེས་པས། དགུང་ལོ་བཅོ་ལྔའི་ཐོག་རྗེ་བཀའ་བརྒྱད་ཕྲིན་ལས་ཡར་འཕེལ་གསང་གླིང་དུ་སྤྱན་དྲངས་ཏེ། རྗེ་འདི་པ་ཞི་བར་གཤེགས་ཀྱི་བར་ལོ་དྲུག་བདུན་ཙམ་འབྲལ་མེད་དུ་བསྟེན་ཏེ། སུམ་རྟགས། སྙན་ངག །སྡེབ་སྦྱོར། ལྷ་བྲིས་སོགས་རིག་གནས་དང༌། ཆོས་དྲུག་ཕྱག་ཆེན་སོགས་དབང་ལུང་ཉམས་ཁྲིད་ཡུན་རིང་གསན་པས། གནས་ལུགས་ཀྱི་རང་ཞལ་གཟིགས། རྩ་བའི་བླ་མར་འཛིན། དགུང་ལོ་བཅུ་བཞི་བར་ངག་དིབ་པ་དང་ཐུགས་རིག་མི་གསལ་བ་ལ་རྗེ་བཀའ་བརྒྱད་རིན་པོ་ཆེར་བཀའ་དབང་གསན་པ་ནས་བཟུང་རིམ་གྱིས་དྲག་ཏུ་སོང་ནས་ཤེས་རབ་ཀྱི་མེ་འབར། རྗེ་འཛི་སྒར་བཞི་པ་དཀར་བརྒྱུད་ཕྲིན་ལས་རྣམ་རྒྱལ་ལམ་རྡོ་རྗེ་དྲག་པོ་རྩལ་ལས། སྔ་རྗེས་ཅི་རིགས་སུ་ཚེ་དཔག་མེད་རྩ་གསུམ་དྲིལ་སྒྲུབ་དང༌། འཁོར་ལོ་བདེ་མཆོག །རྡོ་རྗེ་ཕུར་པ་སོགས་ཀྱི་དབང༌། འབྲུག་པ་སྐུ་གོང་མ་ནས་གསན་པའི་མགོན་པོ་ཕྱག་བཞི་པ་ཐེལ་ལུགས། ཏྲཀྴད་གཉོས་ལུགས། ལྷ་མོ་དུད་སོལ་མའི་སྲོག་གཏད། རོལ་རྡོར་གཏེར་བྱོན་སྐོར་གྱི་དབང་ལུང༌།…

འཛི་སྒར་ལྔ་པ་ཆོས་ཀྱི་ཉི་མའི་རྣམ་ཐར།

༈ འཛི་སྒར་སྐུ་ཕྲེང་ལྔ་པ་མི་ཕམ་ཆོས་ཀྱི་ཉི་མ་ནི། ཁམས་ཀརྨ་དགེ་རུ་རྗེ་གཏུག་ཚང་དུ། རབ་བྱུང་བཅུ་གསུམ་པའི་ས་རྟ་༼༡༧༩༨༽ལོར་སྐུ་འཁྲུངས། འབྲུག་ཐམས་ཅད་མཁྱེན་པ་ཆོས་ཀྱི་སྣང་བ་མཆོག་ནས་འཁྲུལ་མེད་རྡོ་རྗེའི་ཚིག་གིས་ངོས་འཛིན་གསལ་བར་མཛད། སྐུ་འཁྲུངས་པ་ནས་བཟུང་རྒྱལ་སྲས་བྱང་ཆུབ་སེམས་དཔའི་རྣམ་པར་ཐར་པའི་ངང་ཚུལ་དང་ལྡན་ཞིང༌། ཡི་གེའི་ཕྱི་མོ་ནས་བཟུང་རིག་པའི་གནས་ཀུན་ལ་སྦྱངས། འབྲུག་ལུགས་ཀྱི་ཆོ་གའི་ཕྱག་ལེན་འདོན་དབྱངས་རོལ་མོ་ཕྱག་རྒྱ་གར་ཐིག་སོགས་ཐུགས་ལ་ངེས་པར་མཛད། ཀུན་གཟིགས་ཆོས་ཀྱི་སྣང་བ་རིགས་བདག་ཏུ་བསྟེན་ནས། འབྲུག་ལུགས་ཕྱག་ཆེན་དང་ཆོས་དྲུག་སོགས་ཀྱི་གདམས་པ་དཔག་མེད་གསན་བསམ་མཛད། སི་ཏུ་པདྨ་ཉིན་བྱེད་དབང་པོ་ལས་རྒྱལ་བའི་བཀའ་འགྱུར་གྱི་ལྗགས་ལུང་སོགས་སྨིན་གྲོལ་རྒྱབ་རྟེན་གྱི་རིམ་པ་མང་པོ་གསན། གཞན་ཡང་ཆགས་མེད་མཆོག་སྤྲུལ་རིན་པོ་ཆེ་སོགས་མཁས་གྲུབ་ཀྱི་བཤེས་གཉེན་དུ་མར་གཏུགས་ཏེ་དབང་ཁྲིད་མན་ངག་དང་བཅས་པ་གསན་ཅིང༌། ཉམས་བཞེས་མཛད་པས་དངོས་ཅན་དངོས་མེད་ཐམས་ཅད་དབང་དུ་འདུས་པའི་ནུས་པ་མངའ། དབུས་ཀྱི་གདན་ས་གསང་སྔགས་ཆོས་གླིང་དུ་ཐེངས་མང་ཕེབས་ཤིང༌། འབུལ་བསྙེན་གྱིས་མཉེས་པར་མཛད། གདན་ས་འཛི་སྒར་ཕྱོགས་དང་ས་ཡུལ་སྟོད་སྨད་མང་པོར་ཞབས་ཀྱིས་བཅགས་ཤིང༌། གདུལ་བྱའི་རེ་བ་ཡིད་བཞིན་དུ་བསྐངས་ནས་སྐལ་ལྡན་མང་པོ་སྨིན་གྲོལ་ལ་བཀོད། གདན་སར་རྟེན་གསུམ་གསར་བཞེངས། སྒྲུབ་མཆོད་གསར་འཛུགས། དགེ་འདུན་གྱི་དར་སྤེལ་སོགས་བསྟན་པ་འཛིན་སྐྱོང་དང་འགྲོ་བའི་དོན་རྒྱ་ཆེར་གནང་བའི་མཐར། དགུང་ལོ་ལྔ་བཅུ་ང་གསུམ་པ་ལྕགས་ཁྱི་༼༡༨༥༠༽ལོར་ངོ་མཚར་བའི་ལྟས་དང་བཅས་གཟུགས་སྐུའི་བཀོད་པ་དབྱིངས་སུ་བསྡུས་སོ། །རྗེ་འདི་ལ་འཇམ་མགོན་ཀོང་སྤྲུལ་རིན་པོ་ཆེས་བཀའ་འདུས་དང་གསོ་རིག་རྒྱུད་བཞིའི་བཤད་ལུང་གསན་པས་མཚོན་ཆོས་ཀྱིས་འབྲེལ་བའི་ཞལ་སློབ་མང་ངོ༌། །

ཅོག་གྲྭ་ལྔ་པ་མི་ཕམ་བསྟན་པའི་ཉི་མའི་རྣམ་ཐར།

  ༈ རྒྱལ་དབང་བརྒྱད་པའི་སློབ་མ་ཅོག་གྲྭ་སྐུ་ཕྲེང་ལྔ་པ་མི་ཕམ་བསྟན་པའི་ཉི་མ་ནི། རང་ལུགས་འབྲུག་པ་དཀར་བརྒྱུད་ཀྱི་དབང་བརྒྱུད་མན་ངག་ཡོངས་རྫོགས་ཐོས་བསམ་སྒོམ་གསུམ་མཛད་ནས། ཕྱག་ཆེན། ཆོས་དྲུག་སོགས་ཀྱི་བཀའ་རྩོམ་ཡང་མང་དུ་གནང༌། སྔར་སྡིངས་ཆེ་དགོན་དུ་ཡོད་པའི་ཡིག་རིགས་མི་འདྲ་བ་དྲུག་ཅུ་རྩ་བཞིའི་མ་ཎི་རྡོ་བརྐོས་སོགས་ཀྱི་མ་ཡིག་ཀྱང་ཕྱག་བྲིས་མཛད་པར་གྲགས། སྒྲུབ་སྡེ་དང༌། འོག་མིན་བདེ་ཆེན་རྩེ་ཞེས་པའི་ཅོག་གྲྭའི་གཟིམ་ཆུང་གསར་བཞེངས་དང༌། མདོ་དབུས་ཁམས་གསུམ་དང༌། ལ་དྭགས། འབྲུག་ཡུལ་སོགས་ནས་འདུས་པའི་སློབ་མའི་ཚོགས་ཤིན་ཏུ་མང་བས་སྒར་གསེབ་ཏུའང་མི་ཤོང་བར་གྲགས། ལྷག་པར་ལ་དྭགས་རྒྱལ་པོའི་དབུ་བླ་མཛད་སྐབས་ལ་དྭགས་རྒྱལ་པོས་རྒྱལ་ཁམས་གཞན་ལ་བཙན་གནོད་མི་བྱེད་པའི་དམ་བཅའ་བཞག་སྟེ། རྒྱལ་པོ་ཉིད་ཀྱི་ཕྱག་མདའ་སྒམ་ཤིང་ཙནྡན་སྟེང་གསེར་དངུལ་གྱི་རྒྱན་དང༌། རིན་ཆེན་དུ་མས་ཕྲ་རྒྱན་གྱིས་མཛེས་པའི་རིན་ཐང་བྲལ་བ་ཕུལ་བ་སོགས་རྒྱལ་ཁམས་ཆོས་ལ་བཀོད་པའི་མཛད་འཕྲིན་རྒྱ་ཆེར་བསྐྱངས། དགུང་གྲངས་ལྔ་བཅུའི་སྐོར་བཞུགས་པར་བཤད་དོ། །ཕྱག་ཆེན་བརྒྱུད་འདེབས་རྣམས་སུ་ཡོངས་འཛིན་ལྔ་པ་ཡེ་ཤེས་གྲུབ་པ་ནས་རྗེ་འདི་ཉིད་དང༌། དེ་ནས་ངེས་དོན་བསྟན་པའི་ཉིན་བྱེད་ལ་བརྒྱུད་པར་གསུངས་པས། ཡོངས་འཛིན་ལྔ་པ་བླ་མར་བསྟེན་པ་དང་སློབ་མའི་གཙོ་བོར་རྒྱལ་དབང་དགུ་པ་ངེས་དོན་བསྟན་པའི་ཉིན་བྱེད་ཡིན་པར་གསལ་ལོ། །

ཡོངས་འཛིན་ལྔ་པ་ཡེ་ཤེས་གྲུབ་པའི་རྣམ་ཐར།

༈ རྒྱལ་དབང་བརྒྱད་པའི་སློབ་མ་ཡོངས་འཛིན་ལྔ་པ་ཡེ་ཤེས་གྲུབ་པ་ནི། ཀོང་པོ་རྒྱ་ལ་སེང་གཏམ་དུ། བོད་ཆོས་རྒྱལ་གྱི་རྒྱུད་པ་མ་ཉམས་པ་ཞིག་གི་སྲས་སུ། རབ་བྱུང་བཅུ་གསུམ་པའི་ལྕགས་གླང་༼༡༧༨༡༽ལོར་སྐུ་འཁྲུངས། ཀུན་གཟིགས་ཆོས་ཀྱི་སྣང་བ་དང་འཛི་སྒར་རྡོ་རྗེ་དྲག་པོ་ཟུང་དགོངས་པ་རྩེ་མཐུན་གྱིས། གོང་མ་འཇམ་དཔལ་དཔའ་བོའི་སྤྲུལ་སྐུར་ངོས་འཛིན་གནང༌། དགུང་གྲངས་དགུར་ཕེབས་པར། རྒྱལ་དབང་འབྲུག་པས་བཀྲ་ཤིས་མཐོང་སྨོན་དུ་གདན་དྲངས། དེར་རྒྱལ་བ་མཆོག་ནས་གཙུག་ཕུད་བཞེས་ཏེ། མི་ཕམ་དཀར་བརྒྱུད་བསྟན་པའི་ཉིན་བྱེད་འཇམ་དཔལ་ཡེ་ཤེས་གྲུབ་པ་ཕྲིན་ལས་སྣང་བ་རྒྱས་པའི་སྡེ་ཞེས་མཚན་གསོལ། དགེ་བསྙེན་གྱི་སྡོམ་པ་བསྩལ། མི་རིང་བར་བདེ་ཆེན་ཆོས་འཁོར་དུ་བཞུགས་ཁྲི་ལ་མངའ་གསོལ། མཐུ་ཆེན་ལྔ་པ་ཞབས་དྲུང་འཇམ་དཔལ་རྡོ་རྗེ་ལས་ཚེ་བདག་གི་དབང་ཆེན་སོགས་བཀའ་ཆོས་ཅི་ཡང་གསན། དགུང་ལོ་བཅུ་དགུར་མཐུ་ཆེན་ཞིང་བརྗེས་པས་དགོངས་རྫོགས་རྟེན་བཞེངས་སོགས་མཛད་པ་འཕྲོ་བསྐྱངས། རྒྱལ་དབང་ཀུན་གཟིགས་ཆོས་ཀྱི་སྣང་བ་རིགས་ཀྱི་བདག་པོར་བསྙེན་ཏེ། རིམ་བཞིན་རབ་ཏུ་བྱུང་དང་བསྙེན་རྫོགས་བསྒྲུབས། མཚན་དཔལ་ལྡན་ཆོས་དབྱིངས་ལྷུན་གྲུབ་བསྩལ། ཤིང་རྟ་གཉིས་ཀྱི་བཀའ་སྲོལ་ལྟར་བྱང་ཆུབ་ཏུ་ཐུགས་བསྐྱེད། དཔལ་དུས་ཀྱི་འཁོར་ལོའི་བྱིས་པ་འཇུག་པའི་དབང་བདུན་གོང་མ་གོང་ཆེན་རྡོ་རྗེ་སློབ་དཔོན་བདག་པོ་ཆེན་པོའི་དབང་དང་བཅས་པའི་དབང་མོ་ཆེ་དང༌། གསེང་ལམ་བླ་སྒྲུབ། ཕྱག་ཆེན། ཆོས་དྲུག་གི་ཞིབ་ཁྲིད་ལ་སོགས་པ་དཔལ་ལྡན་འབྲུག་ལུགས་ཀྱི་སྨིན་གྲོལ་ལུང་གསུམ་གཙོ་བོར་གྱུར་པའི་བཀའ་གསར་རྙིང་གི་ཆོས་ཚུལ་དཔག་ཏུ་མེད་པ་ཞིག་གསན། གྲུབ་དབང་རང་རིག་ཡེ་ཤེས་ཀྱི་རོལ་གར་ཤྲཱི་ཧེ་རུ་ཀ་ཆེན་པོ་གར་ཞ་གྲུབ་ཆེན་འཇམ་དབྱངས་རྣམ་རྒྱལ་ལས་ཀྱང་བསྲེ་སྙན་གྱི་སྐོར་གསན། ཁམས་སྤྲུལ་སྒྲུབ་བརྒྱུད་ཉི་མ་ལ་འཇའ་ཚོན་པོད་དྲུག་སོགས་དབང་ལུང་དུ་མ་མནོས་ཏེ་གདམས་པའི་མཛོད་དུ་གྱུར། ཉེར་གསུམ་ཙམ་ལ་རྐྱེན་ངན་གྲོགས་ཤར་གྱིས་རྔོག་གི་གདན་ས་བྲག་དམར་ཆོས་འཁོར་གླིང་དུ་ཐུགས་དམ་བཅད་རྒྱ་དམ་པོར་ལོ་དྲུག་ལ་བཞུགས་ཆོག་པ་བྱུང་ནས། གདམས་པ་ཞུས་པ་རྣམས་གསན་རྐྱང་ཙམ་དུ་མ་ལུས་པར། ཡི་དམ་གྱི་བསྙེན་པ་དང༌། ཕྱག་ཆེན། ཆོས་དྲུག་སོགས་ལ་ཐུགས་དམ་རྩེ་གཅིག་དྲིལ། ལྷག་པར་རྡོ་རྗེ་གཏུམ་པོའི་བསྙེན་པ་དུང་ཕྱུར་ལྗགས་བཟླས་གནང་བས་མཚོན་ཡི་དམ་ལྷ་ཚོགས་ཀྱི་བསྐྱེད་བཟླས་དཔག་ཏུ་མེད་པ་མཛད་པས་ཉམས་རྟོགས་ཁྱད་པར་ཅན་ལ་དབང་ཐོབ། སྐབས་དེར་ཤུགས་ལྡན་ཞེས་པའི་དྲེགས་པ་ཅན་དེས་རྒྱལ་དབང་འབྲུག་པར་བརྫུས་ཏེ། ལན་དུ་མར་དྲོད་ཉུལ་བའི་མཐར། ཆོས་གཏམ་མཛད་དེ་ཚར་བཅད་པའི་ཚེ། གཟུགས་དངོས་སུ་བསྟན་ནས། ཁྱེད་བུ་སློབ་རྣམས་ཀྱིས་གསོལ་མཆོད་མི་འཚལ་ཡང༌། ཕྲིན་ལས་གང་དགོས་བདག་གིས་བསྒྲུབ་པར་བགྱིའོ། །ཞེས་ཁས་བླངས་དམ་བཅའ་ཞུས་པ་དང༌། ཨོ་རྒྱན་མཁའ་འགྲོའི་གླིང་དུ་རིག་འཛིན་ཆེན་པོ་དང་མཇལ་བ་སོགས་ངོ་མཚར་དག་པའི་གཟིགས་མོ་ཤིན་ཏུ་མང༌། གཞན་ཡང་ཆུ་ཤུལ་ལྕོག་མོ་རི་ཁྲོད་དུ་ལོ་མང་པོར་ཐུགས་དམ་ལ་བཞུགས། དེ་ནས་ལྟོས་བཅས་རྣམས་ཀྱིས་གསོལ་བཏབ་ངོར་དང༌།…

མཐུ་ཆེན་དྲུག་པ་ཆོས་ཀྱི་བཤེས་གཉེན་གྱི་རྣམ་ཐར།

༈ མཐུ་ཆེན་ཆོས་མགོན་དྲུག་པ་ཆོས་ཀྱི་བཤེས་གཉེན་ནི། ཀྱེ་རེ་ཞེས་པའི་གདུང་རྒྱུད་དུ། རབ་བྱུང་བཅུ་གསུམ་པའི་ས་ལུག་༼༡༧༩༩༽ལོར་སྐུ་བལྟམས། རྒྱལ་དབང་འབྲུག་པ་ཆོས་ཀྱི་སྣང་བས་ངོས་འཛིན་གནང་ཞིང་སེང་གེའི་ཁྲིར་མངའ་གསོལ། རྗེ་དེ་ཉིད་ལ་གཙུག་ཕུད་ཕུལ་བས། མཚན་མི་ཕམ་མཐུ་སྟོབས་ཀུན་བཟང་ཡོན་ཏན་འབྱུང་གནས་རྡོ་རྗེ་རིན་པོ་ཆེ་ཆོས་དབྱིངས་བཟང་པོའི་སྡེ་ཞེས་གསོལ། འབྲི་ཀློག་སོགས་སློབ་གཉེར་མཐར་ཕྱིན་མཛད། དགུང་ལོ་བཅུ་གཉིས་སླར་ཡང་དགེ་ཚུལ་གྱི་སྡོམ་པ་གསན། མི་ཕམ་ཆོས་ཀྱི་བཤེས་གཉེན་ཞེས་མཚན་གནང༌། བྱང་ཆུབ་མཆོག་ཏུ་ཐུགས་བསྐྱེད། བྱམས་ཆེན། པད་དཀར། འཛི་སྒར། ཨ་རྫོང༌། ཀླུ་མཁར། འབའ་སྦང་སྤྲུལ་སྐུ་སོགས་དང་ལྷན་ཅིག་ཏུ་ལམ་ཟབ་དང་ཚེ་དཔག་མེད་ཕྱི་ནང་གསང་སྒྲུབ་ཀྱི་དབང༌། སྒྲུབ་ཐབས་ཉེར་གཉིས། རིན་ཆེན་འབྱུང་གནས། མགོན་པོ་སོགས་ཀྱི་རྗེས་གནང༌། མི་ལའི་རྣམ་མགུར། ཞང་དང་ཀུན་མཁྱེན་བཀའ་འབུམ། དཀོན་སྤྱིའི་ལྷ་ཁྲིད་དང༌། ཕྱག་ཆེན་ལྷན་ཅིག་སྐྱེས་སྦྱོར་གྱི་ཉམས་ཁྲིད་སོགས་གསན། དེ་རྗེས་ལོ་གསུམ་གྱི་བཅད་རྒྱ་ངེས་པ་ཅན་གནང༌། དགུང་ལོ་ཉེར་གཉིས་ལ་རྗེ་མདོ་ཁམས་ལྔ་པས་སྤྱན་དྲངས་ཏེ། ཁམས་ཕྱོགས་སུ་ཕེབས། རིམ་བཞིན་འཁྲུལ་ཞིག །བྱམས་མེ། ཆོས་ཕུག་དགོན་སོགས་དང༌། ནང་ཆེན་རྒྱལ་ཁབ་ཏུ་ཕེབས། འཁྲུལ་ཞིག་མཆོག་སྤྲུལ་རིན་པོ་ཆེ་ལ་གྲུབ་རྒྱལ་ཚེ་དབང༌། ལམ་ཟབ་དང་མི་འཁྲུགས་དབང༌། རྗེས་གནང་ཉེར་གཉིས་བཅས་དང༌། ཆོས་སྤྱོད་ཆོ་ག །གསོལ་ཀ་སོགས་ཀྱི་ལུང༌། ཕྱག་ཆེན་གྱི་ཁྲིད་བཅས་བསྩལ། དེ་ནས་ཁམས་སྒར་ཕུན་ཚོགས་ཆོས་འཁོར་གླིང་དུ་བྱོན། དེར་ཡུན་རིང་བཞུགས་ཏེ། རྗེ་མི་ཕམ་སྒྲུབ་བརྒྱུད་ཉི་མ་ལས་ཕྱི་ནང་རིག་པའི་གནས་དང༌།…