གྲུབ་དབང་ཤཱཀྱ་ཤྲཱི་ནས་བརྒྱུད་པའི་སྐབས།

གྲུབ་དབང་ཤཱཀྱ་ཤྲཱིའི་རྣམ་ཐར།

            འཕགས་ཡུལ་གྲུབ་བརྒྱའི་སྤྱི་མེས་ས་ར་ཧ། ། གངས་ཅན་མདའ་སྣུན་གཉིས་པ་གླིང་ཆེན་རས། ། སླར་ཡང་ཟུང་འཇུག་སྒྱུ་འཕྲུལ་རོལ་པའི་གར། ། གྲུབ་དབང་ཤཱཀྱ་ཤྲཱིའི་ཞབས་ལ་འདུད། །   ༈ གྲུབ་དབང་ཤཱཀྱ་ཤྲཱིའི་རྣམ་ཐར་ནི། ཁམས་ཆབ་མདོ་བེ་རུའི་འབྲོག་སྡེར། ཡབ་སྣ་རུ་དོན་ལྡན་དང༌། ཡུམ་ཉ་མཚོ་སྒྲོན་གྱི་སྲས་སུ། རབ་བྱུང་བཅུ་བཞི་པའི་ཆུ་གླང་༼༡༨༥༣༽ལོར་འཁྲུངས། སྐུ་ཆུང་ངུ་ནས་དམ་པའི་ཡོན་ཏན་ལྷན་སྐྱེས་སུ་མངའ། ནར་སོན་པ་དང་གྲུ་དགོན་མཆོག་སྤྲུལ་མདུན་ཚངས་པར་སྤྱོད་པའི་སྡོམ་པ་མནོས་ཤིང་དགོན་དེར་སྒྲིགས་ཞུགས་མཛད། མདོ་ཁམས་དྲུག་པ་བསྟན་པའི་ཉི་མ་དང༌། གྲུབ་དབང་ཚོགས་གཉིས་རིན་པོ་ཆེ་ལས་ཕྱག་ཆེན་དང་ཆོས་དྲུག་སོགས་སྨིན་གྲོལ་གྱི་གདམས་པ་རྣམས་ཚུལ་བཞིན་གསན་ནས། ཕྱག་ཆེན་ལྷན་སྐྱེས་ཀྱི་རང་ངོ་ལུས་གནད་དང་བཅས་རྟག་ཏུ་བསྐྱངས་པས་དཀའ་ཐུབ་ཀྱི་དཔེར་འོས་པ་བྱུང༌། སྐུ་གཞོན་པའི་དུས་ཁས་ཉེན་པ་བྱུང་ཡང་གང་བྱུང་ལམ་དུ་བསླངས་ཏེ་བསྒོམས་པས་ཉམས་རྟོགས་ཀྱི་རྩལ་འཕྲལ་དུ་རྒྱས། གསང་ལམ་མཁའ་འགྲོ་སྙན་བརྒྱུད་ཀྱི་བཀའ་བབ་ཁྱད་པར་ཅན་བྱུང་ནས། བདེ་ཆེན་མཆོག་གི་ཉེ་རྒྱུ་གཞན་ལུས་ལས་ཀྱི་ཕྱག་རྒྱ་ཐོ་ཚ་བ་ཆོས་བཟང་སྒྲོལ་མ་ཞེས་པ་མཚན་ལྡན་གྱི་ཌཱ་ཀི་དེ་ཉིད་གསང་ཡུམ་དུ་བཞེས་ཏེ། སྒྲུབ་གནས་ཐོག་མར་གྲུ་གུའི་གཟིམས་ཕུག་ཅེས་པར་རྩེ་གཅིག་ཏུ་སྒྲུབ་པ་མཛད་པ་ནས་བཟུང༌། ལྷ་བྲག་པདྨ་ཡང་རྫོང༌། རྡོ་རྗེའི་ཕུག་རིང་སོགས་སུ་ངེས་དོན་སྙིང་པོའི་སྒྲུབ་པ་ལ་ཡུན་རིང་གཞོལ་བས། ཉམས་རྟོགས་ཀྱི་ཡོན་ཏན་ཇི་ལྟ་བ་བཞིན་འཁྲུངས་ནས་གྲུབ་ཐོབ་ཀྱི་སྙན་པས་ཕྱོགས་ཀུན་ཁྱབ། འབྲུག་ཡོངས་འཛིན་ཤེས་བྱ་ཀུན་མཁྱེན་མདོ་ཁམས་སུ་ཕེབས་སྐབས་ལྗོངས་འདིར་སྦས་པའི་རྣལ་འབྱོར་འདི་འདྲ་བ་བཞུགས་པ་ངོ་མཚར་ཆེ་ཞེས་བསྟོད་བསྔགས་ཚད་མེད་མཛད། མཚན་ཡང་ཤཱཀྱ་ཤྲཱི་ཞེས་གསོལ། འཇམ་དབྱངས་མཁྱེན་བརྩེའི་དབང་པོའི་ཞལ་སྔ་ནས་རྗེ་ཉིད་ཀྱི་གཏེར་བྱུང་དབང་ཆོས་རྒྱས་པར་བསྩལ་ཅིང༌། ཆོས་བདག་ཏུ་མངའ་གསོལ། རྫོགས་ཆེན་ཡང་གསང་བླ་མེད་ཀྱི་ལྟ་སྒོམ་ཚད་དུ་ཕྱིན་པ་ཞིག་རེད་འདུག་ཅེས་བསྔགས་བརྗོད་གནང༌། འཇམ་མགོན་བླ་མ་མི་ཕམ་རིན་པོ་ཆེ་ནས་ཀྱང༌། རྟོགས་པ་ཀློང་དུ་གྱུར་པའི་རྣལ་འབྱོར་གྱི་དབང་ཕྱུག་ཆེན་པོ་ཉིད་ནི་རྡོ་རྗེ་འཆང་གི་དགོངས་པ་མངོན་དུ་གྱུར་པ་རེད་ཅེས་ཡང་ཡང་གསུངས་ཤིང༌། ཤཱཀྱ་ཤྲཱི་ལ་ཛྙཱ་ནའི་མཚན་བསྣན་ནས་མངའ་གསོལ། གཞན་ཡང་ཀོང་སྤྲུལ་ཡོན་ཏན་རྒྱ་མཚོ། ཨ་འཛོམས་འབྲུག་པ་རིན་པོ་ཆེ། རྫ་དཔལ་སྤྲུལ་རིན་པོ་ཆེ་སོགས་ལས་དབང་ཆོས་གསན་ཞིང༌།…

རྒྱལ་དབང་བཅུ་པ་མི་ཕམ་ཆོས་ཀྱི་དབང་པོའི་རྣམ་ཐར།

  ༈ རྒྱལ་དབང་བཅུ་པ་མི་ཕམ་ཆོས་ཀྱི་དབང་པོ་ནི། ཁམས་ཆབ་མདོ་རྫ་རྒྱུད། རིགས་རུས་ཕུན་སུམ་ཚོགས་པ་ཟླ་ནག་ཚང་དུ། ཡབ་རྒྱལ་དབང་ཀརྨ་པ་བཅུ་བཞི་པའི་སྐུ་དབོན་རྡོ་རྗེ་ཚེ་རིང་གི་སྲས་སུ། རབ་བྱུང་བཅོ་ལྔ་པའི་ཤིང་སྤྲེལ་༼༡༨༨༤༽ལོར་འཁྲུངས། དམ་པ་དུ་མས་སྐྱེས་སྤྲུལ་ཡིན་པར་གསལ་བར་གཟིགས་ཀྱང༌། སྐུ་གོང་མར་ཞིང་ཁམས་གཞན་དུ་དགོངས་པ་གཏད་ཁར་སློབ་གཉེར་མཐར་མ་སོན་བར་དུ་གསང་སྒོ་བསྡམས་པ་འགབ་ཚུལ་སོགས་ཞལ་ཆེམས་ཕྱག་བྲིས་གནང་བའི་ལུང་བསྟན་ལྟར། རེ་ཞིག་དཔལ་འབྲུག་པའི་ཆོས་སྡེ་འཛི་སྒར་དགོན་དུ་གདན་དྲངས་ནས་སློབ་གཉེར་གནང་ནས་བཞུགས། དེ་སྐབས་ལྷ་ཐོག་ཀེ་རེ་དང༌། ཐར་རྩེ་གཉིས་འཁྲུགས་པའི་བར་ལ་དཔལ་དགའ་སྤྲུལ་སྐུའི་ཡབ་འདས་རྐྱེན་དུ་གྱུར་པ་མཆོག་སྤྲུལ་འདི་ཉིད་ཀྱིས་ཡེ་ཤེས་ཀྱི་སྤྱན་གྱིས་གསལ་བར་གཟིགས་ནས་གསུངས་པས། མི་རིང་བར་བསྔོ་ཞུས་འབུལ་མི་འབྱོར། དེ་འདྲ་བ་ལྐོག་གྱུར་མཁྱེན་ཚུལ་མང་དུ་མཆིས། དགུང་གྲངས་བདུན་ལ་དཔལ་སྤུངས་སུ་ཕེབས་ཏེ་འཇམ་མགོན་ཀོང་སྤྲུལ་མདུན་ནས་བྱབས་ཁྲུས་སོགས་ཞུས། དེ་ནས་མཚུར་ཕུར་གདན་ཞུས་མཛད་པའི་མཐར། གདན་ས་ཆེན་པོ་བྱར་གསང་སྔགས་ཆོས་གླིང་དུ་གསེར་ཁྲིར་མངའ་གསོལ། ཡོངས་འཛིན་དྲུག་པ་འཇམ་དཔལ་ཤེས་བྱ་ཀུན་གཟིགས་ཀྱིས་གཙུག་ཕུད་བཞེས་ཏེ། དགེ་བསྙེན་གྱི་སྡོམ་པ་མནོས། མཚན་མི་ཕམ་ཆོས་ཀྱི་དབང་པོ་ཕྱོགས་ལས་རྣམ་པར་རྒྱལ་བའི་སྡེར་གསོལ། འགའ་ཞིག་ཏུ་མི་ཕམ་ཆོས་ཀྱི་ཉིན་བྱེད་དམ། འཇིགས་མེད་ཕྲིན་ལས་རབ་རྒྱས་ཞེས་ཀྱང་གསལ། འབྲས་ལྗོངས་བླ་མ་ཨོ་རྒྱན་བསྟན་འཛིན་ལས་རིག་གནས་སྐོར་སོགས་སྐུ་ཡོན་གསན་སྦྱང་གི་རིམ་པ་ལ་ཐུགས་བརྩོན་ཆེན་པོར་གནང༌། དཔལ་ལྡན་འབྲུག་པའི་དབང་ལུང་ཁྲིད་གསུམ་མང་ཆེ་བ་ནི་ཡོངས་འཛིན་དྲུག་པ་ཤེས་བྱ་ཀུན་མཁྱེན་གྱི་ཞལ་སྔ་ནས་གསན། གསན་འཕྲོར་གྱུར་པ་རྣམས་ཅོག་གྲྭ་བདུན་པ་ཆོས་ཀྱི་རྒྱལ་མཚན་ལས་གསན། ཁྱད་པར་དུ་གྲུབ་དབང་ཤཱཀྱ་ཤྲཱི་ཛྙཱ་ན་ཁམས་ནས་གདན་དྲངས་ཏེ། གསང་སྔགས་ཆོས་གླིང་གི་ཉེ་འདབས་སུ་རི་ཁྲོད་གསར་དུ་བཞེངས་ནས་བཞུགས་སུ་གསོལ་ཅིང༌། ངེས་གསང་ཕྱག་རྫོགས་ཀྱི་ཟབ་ཁྲིད་རྣམས་གསན་བཞེས་གནང་ནས་རིགས་ཀྱི་བདག་པོར་བཞེས། བྱར་ཕུ་ནགས་ཀྱི་དགོན་པར་ལོ་གསུམ་ཕྱོགས་གསུམ་ལ་བཞུགས། ཉམས་རྟོགས་ལ་དབང་འབྱོར། དཔལ་ཙ་རི་ཏྲར་ཡེ་ཤེས་ཀྱི་མཁའ་འགྲོ་མ་བུད་མེད་ཕལ་པའི་ཚུལ་གྱིས་མྱོང་གྲོལ་རྩྭ་མཆོག་ཀླུ་བདུད་རྡོ་རྗེ་དངོས་སུ་ཕུལ། གཅིག་ཅར་གྱི་ལམ་བར་ཞིག་ཏུ་ཞབས་རྗེས་གསལ་བར་བྱོན་ཡང་སྒྲོ་སྐུར་ཡོང་ཞེས་དེ་འཕྲལ་སྦས་པར་གྲགས། འཛི་སྒར་བདུན་པ་ངག་དབང་བསྟན་འཛིན་དཔལ་བཟང་དང༌། འཁྲུལ་ཞིག་ལ་དྭགས་ངག་དབང་པདྨ་ཆོས་ཀྱི་རྒྱལ་པོ་སོགས་སློབ་ཚོགས་རྣམས་ལ་དཀྱིལ་ཆོག་རྡོར་ཕྲེང༌། བདེ་མཆོག་དྲུག་ཅུ་མ། བླ་མ་རིགས་དྲུག་གི་དབང་དང༌། སྒྲུབ་ཐབས་བརྒྱ་རྩའི་རྗེས་གནང༌། རྗེས་གནང་ཉེར་གཉིས་མ། གྲུབ་ཐོབ་བརྒྱ་རྩའི་བྱིན་རླབས། དཔལ་མགོན་ཕྱག་བཞི་པ་སོགས་ཆོས་སྲུང་ཡོངས་རྫོགས་ཀྱི་རྗེས་གནང༌།…

གྲུབ་སྲས་འཕགས་མཆོག་རྡོ་རྗེའི་རྣམ་ཐར།

༈ གྲུབ་སྲས་འཕགས་མཆོག་རྡོ་རྗེ་ནི། ཁམས་གྲུ་རི་གསོལ་སྡེར་ཁར། ཡབ་གྲུབ་དབང་ཤཱཀྱ་ཤྲཱི་དང༌། ཡུམ་ཐོ་ཚ་བ་ཆོས་བཟང་སྒྲོལ་མ་གཉིས་ཀྱི་སྲས་སུ། རབ་བྱུང་བཅོ་ལྔ་པའི་ཆུ་སྦྲུལ་༼༡༨༩༣༽ལོར་འཁྲུངས། འཇམ་དབྱངས་མཁྱེན་བརྩེའི་དབང་པོའི་ཐུགས་སྤྲུལ་དུ་གྲགས། རིམ་པས་ཡབ་ལས་རང་གཏེར་དག་སྣང་སྙན་རྒྱུད་ཀྱི་སྐོར་སོགས་ཀྱི་སྨིན་གྲོལ་ཆ་ཚང་དང༌། སྔོན་འགྲོ་དང་དངོས་གཞི་ཕྱག་རྫོགས་ཀྱི་ཉམས་ཁྲིད་ཞིབ་ཆ་བསྩལ་ནས་རྟོགས་པ་དོན་གྱི་རྒྱལ་ཚབ་ཏུ་མངའ་གསོལ། ཀཿཐོག་པ་སི་ཏུ་ཆོས་ཀྱི་རྒྱ་མཚོའི་དྲུང་ནས་བསྙེན་པར་རྫོགས། ཕན་ཚུན་བཀའ་ཆོས་སྤེལ་མར་གསན་བཞེས་གནང༌། གཞན་ཡང་ཁམས་སྤྲུལ་དྲུག་པ་བསྟན་པའི་ཉི་མ་དང༌། ཆབ་མདོ་འཕགས་པ་ལྷ་ཕྲིན་ལས་རྒྱ་མཚོ། གཏེར་ཆེན་ཉི་མ་གྲགས་པ། གོང་ས་བཅུ་གསུམ་པ་ཆེན་པོ་ཐུབ་བསྟན་རྒྱ་མཚོ། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས། ཞེ་ཆེན་རྒྱལ་ཚབ་རིན་པོ་ཆེ། རྒྱལ་དབང་འབྲུག་པ་སྐུ་ཕྲེང་བཅུ་པ། ཨ་འཛོམ་འབྲུག་པ་རིན་པོ་ཆེ་སོགས་གསར་རྙིང་རིས་མེད་ཀྱི་དམ་པའི་སྐྱེས་བུ་མང་པོ་བསྟེན་ཅིང༌། སྨིན་གྲོལ་ཟབ་ཆོས་མང་དུ་གསན། འཆད་པ་དང་རྩོམ་པ་སོགས་མཁས་པའི་བྱ་བ་ལ་ཐོགས་པ་མེད་པར་གྱུར། དགུང་ལོ་ཉེར་ལྔ་པར་བལ་ཡུལ་དུ་ཕེབས་ནས། ཡབ་རྗེ་དམ་པའི་དགོངས་བཞེད་བཞིན་རང་བྱུང་མཆོད་རྟེན་འཕགས་པ་ཤིང་ཀུན་སོགས་བལ་ཡུལ་མཆོད་རྟེན་རྣམ་གསུམ་ཉམས་གསོ་མཐར་ཕྱིན་པ་མཛད། རབ་ཏུ་གནས་པའི་མེ་ཏོག་འཐོར་བའི་ཚེ་འཕེལ་གདུང་གི་ཆར་བབས་པ་སོགས་ངོ་མཚར་ཁྱད་དུ་འཕགས་པ་བྱུང༌། གཞན་ཡང་བྱར་སྐྱིད་ཕུག །སེར་བཀྲ་ཤིས་སྟེང༌། གྲུ་གུ་གསོལ་སྡེར་ཁར་སྒྲུབ་སྡེ་གསར་འཛུགས་དང༌། གཙུག་ལག་ཁང་རྟེན་དང་བརྟེན་པ་བཅས་གསར་བཞེངས་མཛད། གྲུབ་དབང་རིན་པོ་ཆེའི་འདྲ་སྐུ་བཞེངས་པ་ལས། ཕྱིས་དབུ་སྐྲ་ཉག་མ་མཐོ་གང་ལྷག་འཁྲུངས་པའི་ངོ་མཚར་ཅན་བྱུང༌། རྫོང་སར་མཁྱེན་བརྩེ་ཆོས་ཀྱི་བློ་གྲོས་དང༌། དིལ་མགོ་མཁྱེན་བརྩེ་བཅས་ལ་གྲུབ་དབང་དགོངས་གཏེར་སྐོར་རྫོགས་པར་ཕུལ་བ་སོགས་གྲུབ་དབང་རིན་པོ་ཆེའི་ཕྲིན་ལས་ཕྱོགས་བརྒྱར་སྤེལ། གྲུ་གུ་ལྷ་བྲག་ཕུག་ཏུ་མི་ལོ་བཅུ་གསུམ་ཙམ་ངེས་དོན་སྙིང་པོའི་སྒྲུབ་པ་ལ་གཞོལ་བས། ཉམས་རྟོགས་ཁྱད་པར་ཅན་འཁྲུངས། སྐུ་ཆིངས་གསོལ་སྐབས་སྐུ་མི་སྣང་བར་རང་བཞིན་གྱིས་མདུད་པ་ཐེབས་པ་དང༌། མཚན་མོ་ཟླ་འོད་ལ་སྐུ་ལ་གྲིབ་མ་སྐྱ་ཡམ་ཙམ་ལས། གཞན་གྱི་གྲིབ་མ་ལྟར་མེད་པ་སོགས་ངོ་མཚར་མང༌། སྒྲུབ་པ་གཙོ་བོར་མཛད་པའི་ཞར་དུ་གོ་འཇོ་མཁར་ལེར་རི་ཁྲོད་དུ་སྒྲུབ་ཆེན་བཙུགས་ཤིང༌། དུད་གྲངས་སུམ་བརྒྱ་ཙམ་གྱིས་ལོ་གཅིག་ལ་སྒོ་བཤས་སྤོང་བར་ཁས་བླངས་པས་མཚོན་མདོ་ཁམས་ཀྱི་སྐྱེ་བོ་བགྲང་ལས་འདས་པ་ཕན་བདེའི་ལམ་ལ་བཀོད། སྐལ་བཟང་གི་སློབ་མ་དུ་མ་རྗེས་སུ་བཟུང་ཞིང་སྨིན་གྲོལ་གྱི་ཕ་ཕོགས་ཡིད་བཞིན་དུ་སྩོལ་བ་སོགས་བསྟན་འགྲོའི་དོན་ཆེན་མཛད་བཞིན་པར།…

ཡོངས་འཛིན་བདུན་པ་ངག་གི་དབང་པོའི་རྣམ་ཐར།

༈ ཡོངས་འཛིན་བདུན་པ་ངག་གི་དབང་པོའམ་འཇིགས་བྲལ་བདེ་ཆེན་གླིང་པ་ནི། བོད་ལྷོ་ཁ་གོང་དཀར་རྫོང་ཁོངས། སོ་ཟུར་གནུབས་གསུམ་གྱི་ནང་ཚན་སོའི་གདུང་རྒྱུད་དུ། རབ་བྱུང་བཅོ་ལྔ་པའི་ཤིང་ལུག་༼༡༨༩༥༽ལ་སྐུ་འཁྲུངས། རྟགས་མཚན་མང་པོ་བྱུང་བར་བརྟེན་ནས་ཡོངས་འཛིན་དྲུག་པའི་ཡང་སྲིད་དུ་ངོས་འཛིན་གནང་སྟེ། གདན་ས་ཆེན་པོ་བདེ་ཆེན་ཆོས་འཁོར་དུ་གསེར་ཁྲིར་མངའ་གསོལ། རྒྱལ་དབང་འབྲུག་པ་སྐུ་ཕྲེང་བཅུ་པ་མི་ཕམ་དབང་པོས་གཙུག་ཕུད་བཞེས་ཤིང༌། མཚན་འཇམ་དཔལ་དོན་རྒྱུད་བསྟན་འཛིན་ཞེས་གསོལ། རིམ་བཞིན་རང་ལུགས་འབྲུག་པ་དཀར་བརྒྱུད་པའི་འདོན་ཆོས་སྤྱོད། དབྱངས་ཐིག་གར་གསུམ། གཞུང་རིག་གནས་ལ་གསན་སྦྱང་གནང་བས། རིག་གནས་སྤྱི་དང་ཁྱད་པར་སྙན་ངག་ལ་ཤིན་ཏུ་མཁས་པར་འགྱུར། རྒྱལ་དབང་བཅུ་པ་མི་ཕམ་དབང་པོའི་ཞལ་སྔ་ནས་རང་ལུགས་གདམས་ངག་རྩ་བ་ལྔ་སོགས་སྨིན་གྲོལ་རྒྱབ་རྟེན་དང་བཅས་པ་བུམ་པ་གང་འབྱོའི་ཚུལ་དུ་གསན། གཞན་ཡང་གྲུབ་དབང་ཤཱཀྱ་ཤྲཱི་ལས་ཕྱག་རྫོགས་སྐོར། རྒྱལ་དབང་ཀརྨ་པ་སྐུ་ཕྲེང་བཅོ་ལྔ་པའི་མདུན་ནས་རིན་ཆེན་གཏེར་མཛོད། ཞྭ་དེའུ་འཁྲུལ་ཞིག་མདོ་སྔགས་གླིང་པའི་དྲུང་ནས་རྒྱལ་བ་ལྷ་བཙུན་པ་ནམ་མཁའ་འཇིགས་མེད་ཀྱི་དག་སྣང་རིག་འཛིན་སྲོག་སྒྲུབ་ཀྱི་སྐོར་སོགས་དབང་ལུང་ཁྲིད་གསུམ་མང་པོ་གསན། དེ་ནས་བཟུང་རིག་འཛིན་སྲོག་སྒྲུབ་འདི་ཉིད་ཉམས་བཞེས་ཐུགས་དམ་གྱི་མཐིལ་དུ་གནང་བར་གྲགས། སྨིན་གླིང་གདུང་འཛིན་དགའ་བཞི་ལས་སྨིན་གླིང་གི་ཆོས་སྐོར་ཡོངས་རྫོགས་གསན། དགུང་གྲངས་ཉེར་ལྔ་ཙམ་གྱི་བར་གདན་ས་བདེ་ཆོས་སུ་འཁོར་ལོ་གསུམ་གྱི་བསྟན་པ་སྤེལ་བའི་མཐར། བདེ་ཆོས་གྲྭ་ཚང་འདུལ་ཁྲིམས་གཙང་བའི་དབང་གིས་ལྟར་སྣང་དགོན་པ་དང་ཅུང་ཟད་འཕྲོད་མིན་ལྟ་བུས་བླ་སློབ་བར་དམ་ཚིག་ཉམས་ཆག་ཕྲན་བུ་བྱུང་ནས། དབུས་གཙང་གཉིས་ཀྱི་མཚམས་ཇོ་མོ་ཁ་རག་གངས་རིའི་མགུལ་དུ་ཀུན་བཟང་རྣམ་གྲོལ་གླིང་ཕྱག་བཏབ་ཅིང༌། གཙུག་ལག་ཁང་རྟེན་དང་བཅས་གསར་བཞེངས་མཛད་ནས་དེར་རྒྱུན་བཞུགས་གནང༌། གུ་རུ་རིན་པོ་ཆེས་བྱིན་གྱིས་བརླབས་ནས་དགོངས་གཏེར་དག་སྣང་མང་པོ་ཞིག་གཏན་ལ་ཕབ། ཆོས་སྐྱོང་ཇག་པ་མེ་ལེན་དང་ཁ་རག་ཁྱུང་བཙུན་གྱིས་བཀའ་འབངས་ཕྲིན་ལས་བསྒྲུབས་ཤིང༌། གོང་ས་རྒྱལ་བ་བཅུ་གསུམ་པའི་བཀའ་དགོངས་ལྟར་དམག་ཟློག་དང་ཚེ་སྒྲུབ་ཀྱི་ཕྱིར་གཞུང་ནས་འདུས་པ་རྣམས་ལ་གསོལ་ཕོགས་ཀྱང་གནང་སྐད། དཔལ་གྱི་བསམ་ཡས་སུ་ལོ་འཁོར་བཅུ་གཉིས་སྤྲེལ་ལོ་ལ་ཚོགས་འབུམ་རེ་དང་རྒྱུན་དུའང་ཚོགས་མཆོད་ཆད་མེད་གནང༌། ཨུ་རྒྱན་རིན་པོ་ཆེ་སོགས་ལྷག་པའི་ལྷ་མང་པོའི་དག་སྣང་ཞལ་གཟིགས་ཐོབ་པས། དགོངས་གཏེར་དང་མགུར་མ། བསངས་གསོལ་སོགས་གང་གསུང་ཐོགས་པ་མེད་ཅིང༌། མ་འོངས་དུས་ཀྱི་འཕོ་འགྱུར་སོགས་ཀྱི་ལུང་དང་བརྡ་བསྟན་གང་གནང་ཕྱིས་མངོན་སུམ་དུ་མཐོང་ཆོས་སུ་གྱུར་པས་མངོན་མཁྱེན་སྒྲིབ་མེད་མངའ། ལ་དྭགས་སྐྱབས་མགོན་སྟག་ཚང་སྐུ་ཕྲེང་ལྔ་པའི་ཡང་སྲིད་འདི་པ་འབྲི་གུང་ཕྱོགས་སུ་འཁྲུངས་པའི་ལུང་བསྟན་གསལ་པོ་གནང་ཞིང༌། ཕྱིས་དབང་ལུང་ཁྲིད་གསུམ་གྱིས་རྗེས་སུ་བཟུང༌། གཞན་ཡང་ཆུ་ངོགས་སྐུ་ཕྲེང་བདུན་པ་སོགས་བླ་སྤྲུལ་མང་པོའི་ཡང་སྲིད་ངོས་འཛིན་མཛད། དེ་ལྟར་བསྟན་འགྲོའི་དོན་མཐར་ཕྱིན་ཅིང༌། བོད་ཡོངས་སུ་དུས་འགྱུར་བྱུང་རྗེས། དགུང་ལོ་དྲུག་ཅུ་རེ་བརྒྱད་པ་ཆུ་སྟག་༼༡༩༦༢༽ལོར་སྲིད་ཇུས་གཡོན་ཐལ་གྱིས་ཉེས་པ་མེད་བཞིན་ངོ་རྒོལ་དྲག་པོ་བྱེད་བཅུག་ལ་ཉེ་བའི་སྐབས་ཀྱི་ཉིན་ཞིག །རང་གི་གདུང་སྲས་གར་ཞ་བླ་མ་ནོར་བུའི་ཡང་སྲིད་ལ། པ་ལགས་ཟངས་མདོག་དཔལ་རིར་འགྲོ་རན་འདུག་ཅེས་རྩེད་མོའི་ཚུལ་དུ་གསུངས་ཤིང༌། མཁའ་འགྲོའི་གར་འཆམ་ཞིག་ཀྱང་མཛད་ནས་གཟིམས་ཆུང་དུ་ཕེབས་འཕྲལ་ཧིག་སྒྲ་ལན་གསུམ་མཛད་དེ་དགོངས་པ་ཆོས་དབྱིངས་སུ་ཐིམ་པའི་ཚུལ་བསྟན་ཏོ། །སྐུ་གདུང་ལ་རིང་བསྲེལ་མང་པོ་འཕེལ།…

མཐུ་ཆེན་བརྒྱད་པ་ཆོས་ཀྱི་རྒྱ་མཚོའི་རྣམ་ཐར།

༈ མཐུ་ཆེན་བརྒྱད་པ་ཆོས་ཀྱི་རྒྱ་མཚོ་ནི། བོད་དབུས་གཙང་ཕྱོགས་སུ། རབ་བྱུང་བཅོ་ལྔ་པའི་མེ་ཕག་༼༡༨༨༧༽ལོར་འཁྲུངས། མཛད་རྣམ་ཞིབ་པར་མ་མཇལ་ཡང༌། བླ་མའི་གཙོ་བོར་ཡོངས་འཛིན་ཤེས་བྱ་ཀུན་མཁྱེན། ཅོག་གྲྭ་བདུན་པ་ཆོས་ཀྱི་རྒྱལ་མཚན། མདོ་ཁམས་དྲུག་པ་བསྟན་པའི་ཉི་མ། གྲུབ་དབང་ཤཱཀྱ་ཤྲཱི་སོགས་ལ་བསྟེན་པར་གསལ་ཞིང༌། ཙ་རི་གཅིག་ཅར་དུ་སྐུ་མཚམས་ལོ་གསུམ་དང༌། རང་དགོན་བདེ་ཆོས་སུ་ལོ་གསུམ་བཅས་སྒྲུབ་པ་ཡུན་རིང་མཛད་ནས་ཉམས་རྟོགས་འཁྲུངས། བོད་དབུས་དང་ཁམས་ཕྱོགས་སུ་དཔལ་ལྡན་འབྲུག་པའི་ལུགས་ཀྱི་སྨིན་གྲོལ་རྒྱབ་རྟེན་བཅས་པ་སྐལ་བཟང་སློབ་མའི་ཚོགས་ལ་རྒྱ་ཆེར་སྤེལ་བར་མཛད། མདོ་ཁམས་ཕྱོགས་སུ་ཐེངས་གསུམ་ཙམ་བྱོན་པར་གྲགས། ཀར་སྲས་ཀོང་སྤྲུལ་མདུན་ནས་རྒྱལ་དབང་ཀརྨ་པ་བཅུ་དྲུག་པ་དང་ལྷན་རིན་ཆེན་གཏེར་མཛོད་མཉམ་གསན་མཛད་ཅིང་འབྲེལ་བ་ཤིན་ཏུ་ཟབ། རྒྱ་གར་དུ་སྔ་རྗེས་ཐེངས་གསུམ་བྱོན་པ་ལས། དགུང་ལོ་བདུན་ཅུ་མེ་སྤྲེལ་༼༡༩༥༦༽ལོའི་ཟླ་བ་བཅུ་པའི་ནང་ཐེངས་གཉིས་པ་ཕེབས་ཏེ། ཝཱར་ཎ་དང༌། རྡོར་གདན་སོགས་གནས་གཟིགས་དང་ཀ་བློན་སྦུག་སོགས་སུ་ལོ་གཅིག་ཙམ་བཞུགས་སྐད། འབྱོན་ཐེངས་གསུམ་པ་ནི་བོད་དུ་དུས་འགྱུར་དྲག་པོ་བྱུང་ནས་བཞུགས་ཟོས་མ་བདེ་བར། དགུང་ལོ་དོན་གསུམ་ས་ཕག་ལོའི་ཟླ་བ་གཉིས་པའི་ཚེས་བཅུ་གཅིག་ལ་དགོན་པ་ནས་ཕེབས་ཏེ། ཡར་འབྲོག་བསམ་གྲུབ་དགོན་བརྒྱུད་འབྲུག་ནས་རྒྱ་གར་དུ་བྱོན། རིམ་པས་རྒྱ་གར་ནུབ་ཕྱོགས་ཁུ་ནུའི་ཡུལ་དུ་ཕེབས། དེར་ཁུ་ནུ་བླ་མ་བསོད་ནམས་འབྲུག་རྒྱལ་གྱིས་ཞུས་ངོར་དགའ་ལྡན་ཆོས་འཁོར་དུ་གཙོ་བོར་བཞུགས་ནས་འགྲོ་དོན་བསྐྱངས་པའི་མཐར། དགུང་ལོ་དོན་བརྒྱད་ཤིང་འབྲུག་༼༡༩༦༤༽ལོར་ཞི་བར་གཤེགས་སོ། །སྔ་ཕྱིར་ཞལ་སློབ་བྱུང་བ་ནི། རྒྱལ་དབང་འབྲུག་པ་བཅུ་གཅིག་པ། ཁམས་སྤྲུལ་རིན་པོ་ཆེ་སྐུ་ཕྲེང་བདུན་པ་དང་བརྒྱད་པ། འཁྲུལ་ཞིག་བརྒྱད་པ་ཨ་ལྡེའུ་རིན་པོ་ཆེ་གྲུབ་རིགས་ཁྱུ་མཆོག །ཁྲིད་དཔོན་རིན་པོ་ཆེ་པདྨ་ཆོས་རྒྱལ། ཚོགས་གཉིས་སྐུ་ཕྲེང་གཉིས་པ། འཛི་སྒར་ཐུགས་སྲས་རིན་པོ་ཆེ། གྲུབ་སྲས་ཨ་བོ་རིན་པོ་ཆེ། ལ་དྭགས་སྟག་སྣ་དོན་ཡོད་རྡོ་རྗེ། རྗེ་སེང་བྲག་རིན་པོ་ཆེ་ངག་དབང་ཆོས་ཀྱི་རྒྱལ་མཚན། ལྷོ་འབྲུག་རྗེ་མཁན་པོ་ཡོན་ཏན་འོད་སོགས་མཁས་གྲུབ་མང་པོ་བྱུང་ངོ༌། །