སྨད་འབྲུག་གི་སྐབས།

ལོ་རས་སྐུ་སྐྱེ་གཙང་ཆེན་ཆོས་ཀྱི་དབང་ཕྱུག་གི་རྣམ་ཐར།

༈        རྒྱལ་བ་ལོ་རས་པའི་སྐུ་སྐྱེར་གྲགས་པ་གཙང་ཆེན་ཆོས་ཀྱི་དབང་ཕྱུག་ནི། རབ་བྱུང་བདུན་པའི་ནང་རོང་སྤང་ཆེན་དུ་འཁྲུངས། མཁས་བཙུན་གཟི་བརྗིད་པ་ལས་རས་ཆུང་སྙན་རྒྱུད་སྐོར་གསན། རིན་ཕུག་དང༌། ཡོམ་ཆོས་སྡིངས་སོགས་དྭགས་ཀོང་ལྷོ་རྒྱུད་ཕྱོགས་སུ་དགོན་གནས་དུ་མ་བཏབ། འདི་རྒྱལ་དབང་རྗེ་དང་དུས་མཉམ་པས། རྒྱལ་དབང་རྗེའི་རྣམ་ཐར་དུ། དགུང་ལོ་སོ་གསུམ་ལ་ནུབ་ཅིག་རྨི་ལམ་དུ་བུད་མེད་དཀར་མོ་ཞིག་གིས་དར་ཆེན་ཡུག་ཚང་མ་ཞིག་ཕུལ་ནས། ལྷོ་ཕྱོགས་ཀྱི་རྒྱུད་འདི་ལ་ཕེབས་པ་ཞིག་ཞུ་ཟེར་བ་ཞིག་བྱུང་ནས། དེ་ནས་རིང་པོར་མ་ལོན་པར་ཆོས་རྗེ་གཙང་ཆེན་པས་ལྷ་སར་གདན་དྲངས་ནས། གསེར་གྱི་འཁོར་ལོ་ཞིག་གིས་གཙོ་བྱས་པའི་འབུལ་བ་དཔག་ཏུ་མེད་པ་བྱས་ཏེ། རྗེའི་དྲུང་ནས་ཙ་རི་ལ་ཅིས་ཀྱང་ཕེབས་པ་ཞུ་ཞེས་ཞུ་བ་ནན་ཆེར་མཛད་པ་ལ་བརྟེན་ནས་མྱུར་དུ་ཕེབས་པའི་ཞལ་བཞེས་མཛད། སོ་བདུན་ལ་ཙ་རིར་ཐེགས་སྐབས། ཀོང་པོ་ང་ལར་ཕེབས་དུས་ཆོས་རྗེ་གཙང་ཆེན་པའི་ཇ་འདྲེན་པས་སླེབས། ཐབ་འཛིན་པས་དགོན་དུ་སླེབས་སོ། །དགོན། རྫོང༌། ང་ལ། སྤྲོག་པ་རྣམས་ཀྱིས་རྟ་ཕྱུགས་དང་ནས་ཀྱི་བརྒྱ་འབུལ་མང་དུ་བྱས། དེ་ནས་ཆོས་ར་བ་རྣམས་ཀྱིས་གདན་དྲངས། དེར་ཕ་བོང་ཞིག་ལ་ཕྱག་རྗེས་ཤིན་ཏུ་གསལ་བ་ཞིག་བྱོན། དེར་ཞག་པོ་ཁ་ཡར་བཞུགས། དགུང་ལོ་ཞེ་གསུམ་ལ་ཆོས་རྗེ་གཙང་ཆེན་པ་སྐུ་གཤེགས་ནས་ཡོམ་ཆོས་སྡིངས་སུ་ཕེབས། གནང་སྦྱིན་དཔག་ཏུ་མེད་པ་མཛད་ཅེས་བྱུང་བས་ཕན་ཚུན་འབྲེལ་བ་ཤིན་ཏུ་ཟབ་པར་སྣང་ངོ༌། །དཔའ་བོ་གཙུག་ལག་ཕྲེང་བའི་ཆོས་འབྱུང་དུ། ཞྭ་དམར་བཞི་པ་ཆོས་ཀྱི་གྲགས་པའི་རྣམ་ཐར་སྐབས། རྒྱལ་བ་ལོ་རས་ཀྱི་སྐུ་སྐྱེ་བ་གཙང་ཆེན་ཆོས་ཀྱི་དབང་ཕྱུག་མཁས་གྲུབ་ཆེན་པོ་དེས། སྔོན་ཅིག་ཆར་དུ་དབུ་རི་བའི་འགྲོ་མགོན་མཛད་པ་ན་ལས་ཚན་གྱི་ཆགས་སྡང་ཆེས་པས་ཐུགས་སྐྱོ་བ་སྐྱེས་ཏེ། དབུ་རི་པང་མོ་རྒོད་པ་ལ་གཏད་ནས། ཅིག་ཆར་ཤར་མའི་གནས་སྒོ་འབྱེད་དུ་བྱོན་པར་རྟེན་འབྲེལ་མ་འགྲིག་པས་མཚོ་དཀར་ཁྱུང་རྫོང་དུ་ལོ་གསུམ་སྒྲུབ་པ་མཛད་པས། སྒམ་པོ་ལྷ་རྗེས། སླེབས་རོམ་དང༌། རིན་ཕུག་གི་གནས་ཕུལ་བར་གཟིགས་ནས་རིན་ཕུག་ཏུ་སྒྲུབ་སྡེ་མཛད། ཕྱིས་ཡོམ་ལ་སོགས་པ་མང་དུ་བཏབ་སྟེ་ཕྲིན་ལས་ཤིན་ཏུ་ཆེ་ཞིང༌། ཆོས་རྗེ་ཉིད་ཞ་ལུ་བའི་དགེ་བཤེས་ཡིན་པའི་དབང་གིས་བུ་ལུགས་ཀྱི་ཀུན་རིག་དུས་འཁོར་སོགས་དང༌། གླིང་ལུགས་ཀྱི་བདེ་མཆོག་དང༌། ཁྲིད་ཆེན་བརྒྱད་སོགས་དར་ཞིང་བསྟན་པ་ལ་ཆེས་ཕན་པ་བྱུང་སྐབས། ར་ལུང་ནས་རྒྱལ་དབང་ཆོས་རྗེ་དགུང་ལོ་ཉི་ཤུ་རྩ་གྲངས་པ་ཞིག་སྤྱན་དྲངས་ནས་དགོན་པ་རྣམས་ཕུལ་ཅིང༌། རྒྱལ་དབང་ཆོས་རྗེ་རང་ཡང་གསུང་ཆོས་རྣམས་གསན་པར་བཞེད་པ་ལ། སྒར་ལ་བུད་མེད་མང་དུ་འདུག་པ་གཟིགས་པས་འདི་མི་མཛད་པ་ཞུ་ཞེས་ཡང་ཡང་ཞུས་ཀྱང་གསན་དུ་མ་བཞེད་པས། གཙང་ཆེན་ཆོས་རྗེ་ཐུགས་མ་རངས་ཏེ།…

རྟོགས་ལྡན་མགོན་པོ་ཡེ་ཤེས་ཀྱི་རྣམ་ཐར།

༈ རྟོགས་ལྡན་མགོན་པོ་ཡེ་ཤེས་ནི། སྟོད་ལུང་པ། འགྲོ་དོན་རྒྱ་ཆེ་བས་ལྷ་སའི་འཁོར་ས་སོགས་ཀྱང་བཀབ། ཀམ་པོར་ཀནྐི་བརྒྱ་རྩ་བཞེངས། འབྲུག་དང་ར་ལུང་དུ་འབུལ་བ་མང་པོ་མཛད་ཅིང༌། ཁྱད་པར་སྒོམ་ཆེན་རྣམས་ལ་སེང་ལྡེང་གི་ཌ་མ་རུ་བརྒྱ་རྩ་བརྒྱད་གནང༌། གཞན་ཡང་བརྟུལ་ཞུགས་ཀྱི་སྤྱོད་པས་འགྲོ་བ་དཔག་ཏུ་མེད་པ་སྨིན་གྲོལ་ལ་བཀོད་དོ། །

དབོན་ཙ་རི་རས་ཆེན་གྱི་རྣམ་ཐར།

༈ ལོ་རས་དབོན་ཙ་རི་རས་ཆེན་ནི། འཁྲུངས་ས་གཞུང་དགེ་རོང་སྟོང་སྡེའི་གྲོང་སྨད། ཡབ་རྒྱ་སྨྱོན་པ་འབུམ་ཞེས་ཁ་དྲག་པ་ཞིག་དང༌། ཡུམ་གཅུང་བཟའ་སྒོམ་མ་ཞེས་བྱ་བ་ལོ་རས་ཀྱི་ལྕམ་མོ་གཉིས་ཀྱི་སྲས་སུ་འཁྲུངས། ནོར་ལོངས་སྤྱོད་བསམ་གྱིས་མི་ཁྱབ་པ་ཡོད་པ་ལ་ཡབ་སྔ་མོར་འདས་པའི་དགེ་བ་ལ་བཏང༌། དགུང་ལོ་དགུ་པ་ལ་ཆོས་རྗེ་ལོ་རས་ལ་གོ་མིའི་དགེ་བསྙེན་མཛད། ཆོས་རྗེ་སེ་མོ་དོ་ལ་གཤེགས་དུས། བླ་མ་སྤ་རི་བའི་སར་སྡོད་དགེ་ཚུལ་སྒྲུབས། སློབ་གཉེར་གྱིས་གསུངས། བཅུ་གསུམ་པའི་ཚེ་ཆོས་རྗེ་ཇོ་མོ་གངས་ལ་བྱོན་པ་ཐོས་ནས་ཕྱག་ཕྱིར་བྱོན། ཉེ་གནས་མཛད། གདམས་ངག་ཚང་བར་གནང༌། སྐྱོར་མོ་ལུང་དུ་བྱོན་ནས་བསྙེན་རྫོགས་བསྒྲུབས། ཆོས་རྗེ་གཤེགས་རྗེས་གདན་ས་མཛད་དགོས་ཞུས་ཀྱང་མ་གནང་སྟེ། སྤྱན་སྔ་སྟོན་པ་ཆོས་ལུང་གི་གདན་ས་ལ་བརྫངས། བླ་མ་བདེ་གཤེགས་ལྷ་ཁང་དུ་བཀོད། ཞེ་དྲུག་པ་ལ་གནས་མཆོག་དཔལ་གྱི་ཙ་རིར་བྱོན་ནས་ལོ་གསུམ་བཞུགས། ཐམས་ཅད་ཀྱི་མིག་ལྟོས་བྱ་ས་མཛད། དེ་འཁོར་རྗེས་ཏི་སེ་ལ་སྐོར་གཅིག་བྱོན། དེ་དུས་ས་འབྲིའི་ས་སྣ་ན་བཞུགས་པ་ཀུན་གྱིས་ཞབས་ཏོག་ཕུལ་ཕྱིན་བསྒྲུབས། དེ་ནས་འཁོར་ཏེ་གདན་ས་མཛད་ནས་ཕྲིན་ལས་རྒྱ་ཆེར་བསྐྱངས་པའི་སློབ་མ་རྟོགས་ལྡན་མགོན་པོ་ཡེ་ཤེས། གྲུབ་ཐོབ་གསེར་སྒོ་བ། ཁྱི་སྒོམ་ཆེན་པོ་ལ་སོགས་པ་མཁས་པ་དང་གྲུབ་པ་བསམ་གྱིས་མི་ཁྱབ་པ་བྱུང་ངོ༌། །

འཇམ་དབྱངས་མགོན་པོའི་རྣམ་ཐར།

༈ འཇམ་དབྱངས་མགོན་པོ་ནི། ཡུལ་མྱང་སྟོད། བྱེ་བྲག་ཁམ་གྲོང༌། ཡབ་ཁྱུང་པོ་བསོད་ནམས་དཔལ་དང༌། ཡུམ་འདྲེ་མོ་ཁྱི་འདྲེན་དཔལ་གྱི་སྲས་སུ་རབ་བྱུང་བཞི་པའི་ས་འབྲུག་༼༡༢༠༨༽ལོར་བལྟམས། སློབ་དཔོན་གཙང་སྟོན་ལ་གསོར་བཅུག །ཁོང་གིས་ཕྱག་དྲུག་པའི་ཕྲིན་ལས་གཏོང་བའི་དུས་སུ་ཕྱག་དྲུག་པ་ཡུད་ཙམ་ཞིག་གཟིགས། མཚན་བསོད་ནམས་མགོན་པོ་བཏགས། ལྷའི་ཡུལ་དུ་སྐྱེ་བ་སོགས་སྐྱེ་བ་མང་པོ་དྲན། རྨི་ལམ་རྒྱུན་དུ་ཟིན་ཡང་འོད་གསལ་དུ་འགྲོར་མ་འདོད། ལོ་བཞི་ལྔ་ནས་སྒོམ་རང་སྐྱེས་སུ་བྱུང་ནའང་ངོ་མ་ཤེས། ལོ་དྲུག་བདུན་ལོན་པའི་ཚེ་སློབ་དཔོན་ལྕེ་སྟོན་སངས་རྒྱས་དང༌། ལྕེ་སྟོན་མགོན་པོ་དང༌། གཡུ་ཐོག་ཇོ་རྒྱལ་ལ་སོགས་པས་མེ་ཏོག་སྡུད་པའི་ཆོས་གསུང་བ་བློ་ལ་ཟིན་ནས་བྱིས་པའི་ཟླ་བོ་ལ་བཤད། གཞན་བགྲོ་གླེང་བྱེད་པ་ལ་སོགས་པ་ཐམས་ཅད་ཀྱང་ཟིན། ཇོ་གཟུངས་ལ་ཀློག་བསླབས་པས་ཟླ་བ་གཅིག་དང་ཞག་བཅུ་བདུན་ལ་མཁས་པར་ཤེས། ལོ་བཅུ་ལོན་པའི་ཚེ་ཡུམ་གྲོངས། གཉེན་ཆད་བྱས་པའི་བུད་མེད་ལ་བོར་བྱིན་ནས་ཆོས་ལ་བྲོས་ནས་གཡས་རུར་ཕྱིན། བླ་མ་མར་སྟོན་ལ་རབ་ཏུ་བྱུང་ནས་མིང་ཤེས་རབ་འབྱུང་གནས་སུ་བཏགས། ཁྲིད་ཞུས་པས་སྔར་གྱི་སྒོམ་དང་ཁྱད་པར་མ་བྱུང༌། འུ་ཡུག་སོགས་སུ་མཚམས་དམ་པོར་བྱས་ཏེ་བསྒོམས། རིན་པོ་ཆེ་མར་སྟོན་གྱི་མཁན་པོ་དང༌། དུང་ལུང་པས་སློབ་དཔོན་དང༌། སློབ་དཔོན་གཅུང་པོས་གསང་སྟེ་མཛད་ནས་བསྙེན་པར་རྫོགས། ཁྲོ་ཕུ་ལོ་ཙཱ་བ་ལ་བྱ་ཐང་དུ་སེམས་ཉིད་ངལ་གསོ་དང༌། རིན་ཆེན་འབྲུ་དགུ་རྣམས་ཞུས། སྟན་གཅིག་ལོ་བཅུ་བཞི་དང༌། ཤ་མི་ཟ་བ་ལོ་བཅུ་བདུན་གྱི་བར་བྱས། ཀོ་བྲག་པས་ཧོར་ཟློག་པའི་རིམ་གྲོ་བསྐུལ་བ་ལ་དགེ་བཤེས་ཉི་ཤུ་རྩ་གསུམ་ཙམ་མངགས་པ་ལ། ཁོང་གིས་ཚོང་འདུས་ཡན་ཆད་ཀྱི་རིམ་གྲོ་སྐུལ་བ་པོ་བྱས་པས། མི་རྣམས་ན་རེ། བཙུན་ཆུང་འདི་འདྲའི་ཤེས་རབ་ཆེ་བ་འཇམ་དབྱངས་རང་ཡིན་ཟེར་བས། འཇམ་དབྱངས་མགོན་པོར་གྲགས། དེ་ནས་དབུ་རི་བའི་སྙན་པ་གསན་ནས་དབུ་རིར་བྱོན་ནས་ལོ་བརྒྱད་ཀྱི་བར་བསྟེན། ཤིན་ཏུ་ཐུགས་ལ་འདོགས་པ་བྱུང་ནས་འབྲུག་པའི་ཆོས་སྐོར་དབང་ལུང་ཐམས་ཅད་ཚང་བར་གསན། ལོ་ཉི་ཤུ་ལ་ས་གདོན་གྱི་རྟོག་པ་ཆེན་པོ་བྱུང་ནས། འདག་སྦྱར་བྱས་ནས་འཇམ་དཔལ་གྱི་བསྙེན་པ་བསྐྱལ་བས་ནད་ཀྱི་རྟོག་པ་སོལ། ལྷ་དང་གླེང་མོ་བྱས་ཆོག་པ་བྱུང་ཞིང་ཤེས་རབ་ཀྱང་ཆེ་བ་བྱུང༌། ལྷ་རི་མོ་དང༌།…

རྒྱལ་བ་ལོ་རས་གྲགས་པ་དབང་ཕྱུག་གི་རྣམ་ཐར།

ཐུགས་སྟོབས་རི་དབང་ལྷུན་པོའི་གཏོས་དང་མཉམ། ། སྤངས་རྟོགས་ཡོན་ཏན་གསེར་ལྡན་མ་ལས་ལྕི། ། མཛད་པ་དབང་ཆེན་རྡུལ་བཞིན་གྲངས་མི་དཔོག ། རྒྱལ་བ་ལོ་རས་བརྒྱུད་པ་བཅས་ལ་འདུད། །   ༈ རྒྱལ་བ་ལོ་རས་གྲགས་པ་དབང་ཕྱུག་གི་རྣམ་ཐར་ནི། གཞུང་གི་གྲགས་ཆེན་ཞེས་པར། གདུང་ལོ། ཡབ་རྣལ་འབྱོར་ཤེས་རབ་དང༌། ཡུམ་མེ་བཟའ་སྐྱིད་ལ་སྲས་མེད་ནས། ལྷ་སར་ཇོ་བོ་ཐུགས་རྗེ་ཆེན་པོ་ལ་མཆོད་པ་རྒྱ་ཆེན་པོ་ཕུལ་ཅིང་བུ་འབྱུང་བར་གསོལ་བ་བཏབ་པས། སྤྱན་རས་གཟིགས་ཀྱི་བྱིན་རླབས་ལས་ཡུམ་ལ་ལྟས་བཟང་པོ་དང་བཅས། རབ་བྱུང་གསུམ་པའི་ས་ལུག་༼༡༡༩༩༽ལོར་འཁྲུངས། མཚན་ལོ་བདེ་བ་སྐྱོང༌། ཆོས་ཀྱི་བག་ཆགས་བཟང་བས་ལོ་གསུམ་བཞི་ནས་འབྲི་ཀློག་མཁྱེན། སྐུའི་ཆོ་བཟང་བས་ལོ་ལྔ་དང་དྲུག་གཉིས་ལ་ཆོས་ལ་འབྲོས་པར་བརྩམས། ཡབ་ཡུམ་གྱིས་མཐའ་བཞི་ཤག་དར་གྱི་བུ་མོ་ཇོ་མོར་བསུས། བདུན་པ་ལ་བྲོས་ནས་འབྲུག་ཏུ་སླེབས། དེར་རྗེས་སྦལ་ཏི་ལ་གཏད་ནས་སྐྱོར་མོ་ལུང་དུ་སྐྲ་བཅད། མཚན་གྲགས་པ་དབང་ཕྱུག་ཏུ་གསོལ། ཡུལ་ནས་བདས་མི་བྱུང༌། སྐོར་ཅིག་བྱོན་པ་ན་ཇོ་མོ་དང་ལྷན་ཅིག་རྐང་པ་ལྕགས་སུ་བཅུག་ཀྱང་མ་ཆགས་པར་སླར་ཆོས་རྗེའི་སྐུ་དྲུང་དུ་བྱོན། གདམས་ངག་རྣམས་ལེགས་པར་གསན། དེ་ནས་ཡབ་སྲས་ཞལ་དན་ནས་ཆོས་རྗེ་དཔོན་སློབ་གཏོས་ཆེ་བ་གཞུང་དུ་སྤྱན་དྲངས། མི་རྣམས་ཀྱིས་འཚེངས་པ་གསུམ་ཞེས་ཆོས་རྗེ་དཔོན་སློབ་འབུལ་བས་འཚེངས་པ། མཐའ་བཞི་ཤག་དར་ནོར་གྱིས་འཚེངས་པ། ཁོང་རང་ཆོས་མཛད་རྒྱུ་བྱུང་བས་འཚེངས་པ་ཟེར་རོ། །དེ་ནས་ཆོས་རྗེས་ཐུགས་ལ་བཏགས། གདམས་ངག་ཐམས་ཅད་སྦ་སྲི་མེད་པར་གནང༌། དགུང་ལོ་བཅུ་གསུམ་ལོན་པའི་ཚེ་ཁ་རག་ཏུ་བྱོན། དེར་ཇོ་དན་ཀུན་རྒྱལ་ཟེར་བ་ལོ་མཉམ་ཞིག་ཀྱང་ཕྱག་ཕྱིར་འབྱོར། ཁོ་བསོད་སྙོམས་ལ་སོང་བའི་ཤུལ་དུ་ཁ་བ་ཆེན་པོ་བབ། དེ་ལ་ཁོས་མ་ཐར། བླ་མ་ལ་གསོལ་ཟས་མེད་སྙམ་ཁོས་སྙིང་རུས་བསྐྱེད་འོངས་ནས་ཕུག་པའི་ཕྱི། ཆོས་རྗེས་ནང་ནས་བརྐོས་པས་འཕྲོད་ཙམ་བྱུང༌། དེར་སྙུན་གཞི་དམ་པོ་ཞིག་བྱུང་བ་སྡིག་སྒྲིབ་དག་པའི་རྟགས་བཟང༌། དེར་ལོ་གསུམ་བཞུགས། དེ་རྗེས་གནམ་མཚོ་ཕྱུག་མོའི་དོ་ལ་སྒོམ་པར་བྱོན། དེ་དུས་མཚོ་རུལ་དར་མ་ཆགས་པ་ལ།…