ལྷོ་འབྲུག་མཁས་གྲུབ་ཐོར་བུའི་སྐབས།

ལྷོ་འབྲུག་སློབ་དཔོན་བསོད་ནམས་བཟང་པོའི་རྣམ་ཐར།

༈ གྲུབ་དབང་བསོད་ནམས་བཟང་པོ་ནི། ཤར་ཕྱོགས་ཀུར་སྟོད་དུང་དཀར་ཉེ་འདབས་གླིང་བྱ་བར། ཡབ་ལྷུན་རྫོང་པ་ཕུན་ཚོགས་དབང་འདུས་དང༌། ཡུམ་བསོད་ནམས་སྒྲོལ་མའི་སྲས་སུ་རབ་བྱུང་བཅོ་ལྔ་པའི་ཆུ་སྦྲུལ་༼༡༨༩༣༽ ལོར་འཁྲུངས། དགུང་གྲངས་གསུམ་ཙམ་ལ་ཞབས་དྲུང་སྐུ་ཕྲེང་ལྔ་པ་འཇིགས་མེད་ཆོས་རྒྱལ་ལ་གཙུག་ཕུད་ཕུལ་ཏེ། མཚན་བསོད་ནམས་བཟང་པོར་བཏགས། བདུན་པར་ཀུར་སྟོད་ལྷུན་གྲུབ་རྩེ་རབ་སྡེར་ཆོས་སྒོར་ཞུགས། རིམ་བཞིན་གནས་བརྟན་པད་དཀར་དང་དོན་ཡོད་རྡོ་རྗེ་ལས་ཡི་གེ་འབྲི་ཀློག་དང༌། འབྲུག་ལུགས་ཆོས་སྤྱོད་རིམ་པ་ལ་སྦྱངས་གོམས་ཕུལ་དུ་གྱུར། དབུ་ཅན་དབུ་མེད་སོགས་ཡིག་རིགས། གསེར་བཟོ་ཤིང་བཟོ་སོགས་བཟོ་རིགས། མཆོད་རྟེན་ཐིག་རྩ་དང་དཀྱིལ་འཁོར་བྲི་ཐིག་སོགས་ལས་རབ་འབྱམས་ཀུན་ཐོགས་པ་མེད་པར་མཁྱེན། བཅུ་དྲུག་ལ་འབྲུག་རྒྱལ་དང་པོ་ཨོ་རྒྱན་དབང་ཕྱུག་གི་བཀའ་ལྟར་ངལ་བ་ཁྱད་བསད་ཀྱིས་བོད་ཁམས་ཆབ་མདོ་གྲུ་གུ་གསོལ་སྡེར་ཁར་གྲུབ་དབང་ཤཱཀྱ་ཤྲཱིའི་ཞབས་དྲུང་དུ་ཕེབས་ནས། ཕྱག་ཆེན། ཆོས་དྲུག །རོ་སྙོམས་སོགས་དང༌། ཁྱད་པར་ཐུན་མིན་སྙན་བརྒྱུད་ཀྱི་ཆོས་སྐོར་རྣམས་གསན་བསམ་མཐར་ཕྱིན་མཛད་དེ། གྲུབ་དབང་མཆོག་ཞི་བར་གཤེགས་ཀྱི་བར་ཕལ་ཆེར་འབྲལ་མེད་དུ་བཞུགས་ནས་ཚུལ་བཞིན་བསྙེན། རྟོགས་ལྡན་སྨིན་གྲོལ་ལས་ལུས་སྦྱོང་འཁྲུལ་འཁོར་སྐོར་དང༌། རོ་སྙོམས་དང་བླ་སྒྲུབ་ཀྱང་གསན་པར་མཛད། གཞན་ཡང་རྒྱལ་དབང་འབྲུག་ཆེན་བཅུ་པ་མི་ཕམ་ཆོས་ཀྱི་དབང་པོ། འཛི་སྒར་བདུན་པ་བསྟན་འཛིན་དཔལ་བཟང༌། གྲུབ་སྲས་འཕགས་མཆོག་རྡོ་རྗེ། ལྷོ་འབྲུག་རྗེ་མཁན་པོ་སྲིད་ཞི་རྣམ་རྒྱལ། སྤ་གྲོ་རྗེ་ཤེས་རབ་རྒྱལ་མཚན་གྱི་སྐུ་སྐྱེ་གནས་བརྟན་ཤེས་རབ་རྣམ་རྒྱལ་སོགས་ལས་འབྲུག་ལུགས་ཀྱི་དབང་ལུང་ཁྲིད་གསུམ་དང༌། ཀཿཐོག་སི་ཏུ་ཆོས་ཀྱི་རྒྱ་མཚོ། མཁྱེན་བརྩེ་ཆོས་ཀྱི་བློ་གྲོས། གཏེར་ཆེན་མཆོག་གླིང་གི་སྲས་མོའི་སྲས་བསམ་གཏན། བདུད་འཇོམས་ཡེ་ཤེས་རྡོ་རྗེ་སོགས་ལས་རྙིང་མའི་དབང་ལུང་ཁྲིད་མན་ངག་བཅས་གསན་བསམ་རྒྱ་ཆེར་མཛད། ལྷོ་བྲག་མཁར་ཆུར་ལོ་གསུམ་དང༌། སྦས་ཡུལ་འཁན་པ་ལྗོངས་སུ་ལོ་གསུམ་བཅད་རྒྱར་བཞུགས། སྐབས་དེར་གྲུབ་ཆེན་ངག་དབང་བསམ་གཏན་གྱི་སྐྱེས་རབས་རྨི་ལམ་དུ་གསལ། གཞན་བོད་ཁམས་དང་དབུས་གཙང༌། འབྲུག་ཤར་ནུབ་སོགས་ངེས་མེད་ཀྱི་དབེན་གནས་རྣམས་སུ་སྤོང་བའི་བརྟུལ་ཞུགས་ལྷུར་བཞེས་ཏེ་རིམ་གཉིས་ལ་བརྩོན་པས་ཉམས་རྟོགས་མཐོན་པོར་ཕེབས་ཤིང༌། སྐྱེས་ཆེན་དུ་མས་བསྔགས་པའི་ཡུལ་དུ་གྱུར། གསང་བའི་ལས་རྒྱར་པདྨ་ལྷ་སྒྲོན་དང་དོན་གྲུབ་པདྨོ་གཉིས་བཞེས་པ་ལས་སྲས་མོ་གཉིས་འཁྲུངས། ཕྱོགས་མཐར་བསྟན་འགྲོའི་དོན་རྒྱ་ཆེར་མཛད་པ་ལས། བོད་ཙ་རི་སྐྱིད་ཕུག་གི་གདན་སར་གུ་རུ་ལྷ་ཁང་དང་སྒྲུབ་སྡེ།…

ལྷོ་འབྲུག་མཁས་གྲུབ་བསྟན་འཛིན་རྒྱ་མཚོའི་རྣམ་ཐར།

༈ ལྷོ་འབྲུག་མཁས་གྲུབ་བསྟན་འཛིན་རྒྱ་མཚོ་ནི། ལྷོ་ཁ་བཞི་སྨན་ལྗོངས་ཀྱི་ཤར་སྟོད་ཀྱི་ཡུལ་ཀ་བཞི་ལུང་ཆེན་དུ། ཡབ་བསོད་ནམས་དོན་གྲུབ་དང་ཡུམ་བཀྲ་ཤིས་དཔལ་མོའི་སྲས་སུ་རབ་བྱུང་བཅོ་ལྔ་པའི་ཆུ་ལུག་༼༡༨༨༣༽ ལོར་སྐུ་བལྟམས། ཡབ་ཀྱིས་སངས་རྒྱས་ནོར་བུར་བཏགས། དགུང་གྲངས་བདུན་པར་སྤུངས་ཐང་བདེ་བ་ཅན་དུ། མཁན་དམ་ཆོས་རྒྱལ་མཚན་གྱི་དྲུང་དུ་གཙུག་ཕུད་ཕུལ་ཏེ། ཚངས་སྤྱོད་དགེ་བསྙེན་གྱི་སྡོམ་པ་མནོས། མཚན་ངག་དབང་བསྟན་འཛིན་རྒྱ་མཚོར་གསོལ། བཅུ་གཅིག་པར་མཁན་འཇམ་དབྱངས་རིན་ཆེན་ལ་དགེ་ཚུལ་གྱི་སྡོམ་པ་ཞུས། སྐྱབས་མགོན་འཇིགས་མེད་ཆོས་རྒྱལ་གྱི་ཞབས་དྲུང་ནས་འབྲུག་ལུགས་བསྐྱེད་རྫོགས་ཀྱི་ཆོས་སྐོར་མང་པོ་གསན། བཅུ་དྲུག་ནས་འབྲི་གུང་རྡོར་འཛིན་ལྔ་རིག་སྨྲ་བའི་དབང་ཕྱུག་གི་ཞབས་གཏུགས་ཏེ་སྒྲ་དང་དབུ་མའི་སྐོར་སོགས་གཙུག་ལག་རིག་གཞུང་མང་པོ་གསན་སྦྱོང་གནང་བཞིན་པའི་སྐབས། གྲུབ་དབང་ཤཱཀྱ་ཤྲཱིའི་སྙན་པ་ཐོས་པའི་མོད་ལ་སྐུ་ལུས་བ་སྤུ་ལྡང་བའི་དད་པ་བྱུང་ཞིང༌། ཆོས་རྒྱལ་རིན་པོ་ཆེར་ཁམས་ལ་འགྲོ་འདུན་ཡོད་པའི་སྙན་འབུལ་ཞུས་པ་ལྟར་བཀའི་གནང་བ་ཐོབ། བཅོ་བརྒྱད་པར་ཨ་རྩ་བླ་མ་དང་གྲྭ་མཆེད་དངོས་གྲུབ་ལྷན་ར་ལུང་བརྒྱུད་རིམ་བཞིན་ལྷ་སར་ཕེབས། དེར་གནས་མཇལ་དང༌། གོང་ས་རྒྱལ་བ་ཐུབ་བསྟན་རྒྱ་མཚོའི་ཞལ་སྔ་ནས་བསྙེན་པར་རྫོགས། དེ་ནས་བཟུང་སྐུ་ཚེར་འདུལ་བ་འཛིན་པའི་མཆོག་ཏུ་བཞུགས། དེ་ནས་ཨ་རྩ་བླ་མའི་ཞབས་རྗེས་བསྙེགས་ཏེ་བྱང་ཐང་དང་ལ་ལུང་མང་པོ་དཀའ་ངལ་བརྒྱ་སྟོང་གིས་བསྒྲོད་དེ་མདོ་ཁམས་གྲུ་གུའི་རི་ཁྲོད་དུ་ཕེབས། གྲུབ་དབང་རིན་པོ་ཆེ་ཤཱཀྱ་ཤྲཱིའི་ཞལ་མཇལ། ཐུགས་བརྩེ་བ་ཆེན་པོའི་སྒོ་ནས། ཐོག་མར་ལམ་ཟབ་བླ་མཆོད་ཀྱི་བཀའ་དབང་བསྩལ་ཅིང༌། ཕྱག་རྒྱ་ཆེན་པོ་དང་ནཱ་རོ་ཆོས་དྲུག་སོགས་ཉམས་ཁྲིད་དུ་བསྩལ། གཞན་ཡང་བདེ་མཆོག་པདྨ་བཛྲ་གྱི་དབང་དང་བདེ་མཆོག་བཅུ་གསུམ་མ་སོགས་གསར་རྙིང་དབང་ཆོས་གང་གནང་བ་ཐམས་ཅད་གསན། དབྱར་སྟོན་ཟླ་རེར་བསོད་སྙོམས་མཛད་དེ་གང་བྱུང་དེས་ཆོག་གིས་དཀའ་སྤྱད་ཆེན་པོས་གསན་སྒོམ་ཕྲུགས་མར་མཛད་བཞིན་བཞུགས། སྐབས་དེར་གཏུམ་མོའི་དྲོད་ཀྱི་བོགས་འདོན་ཆུ་རས་གཏོང་ཉིན་ཐོ་རངས་ནས་ནམ་ལངས་ཀྱི་བར་དུ་ཆུ་རས་ཐེངས་བཅུ་དྲུག་རེ་སྐེམ་པ་དང༌། ཉེ་འགྲམ་གྱི་འཁྱག་རོམ་ཆུར་ཞུ་བ་དང༌། དབྱར་དགུན་མེད་པར་རས་གོས་རྐྱང་པས་ཆོག་པ་སོགས་བདེ་དྲོད་ཀྱི་རྟགས་དང༌། ཐུར་མའི་ཕྱག་ལེན་མཛད་དུས་འདྲེན་ཐེངས་རེས་ཆུ་ཐོད་ཕོར་གང་ལྷག་ཙམ་རེ་དྲངས་ཐུབ་པ་སོགས་རྩ་ཐིག་རླུང་གསུམ་འབྱོངས་པའི་ལམ་རྟགས་ཀྱི་ཡོན་ཏན་བརྗོད་ལས་འདས་པ་འཁྲུངས། འཇམ་མགོན་མི་ཕམ་རིན་པོ་ཆེ་ལས་ཀྱང༌། ཚིག་བདུན་རྣམ་བཤད་དང་རྟོགས་ལྡན་རྒན་པོའི་མཛུབ་ཁྲིད་སོགས་ཐོབ། དེ་ནས་ཉམས་ཁྲིད་ཕལ་ཆེར་ཚར་བ་རྣམས་རི་ཁྲོད་སོ་སོར་གཏོང་མཛད་པར་བརྟེན། བླ་མ་དང་འབྲལ་མི་ཕོད་བཞིན་དུ་རིམ་པར་མདོ་དབུས་བརྒྱུད་འབྲུག་བུམ་ཐང་དུ་ཕེབས། ཆོས་རྒྱལ་ཆེན་པོས་དགྱེས་འཛུམ་དང་བཅས་ལེགས་སོའི་གནང་ཆ་བསྩལ། བོད་དུ་ལོ་བཅུ་གྲངས་འགོར་བའི་རིང་ཡབ་དང་མིང་སྲིང་འགའ་ཞིག་མི་རྟག་པར་གྱུར་པ་དང༌། ཡུལ་དུས་གནས་སྐབས་ཀྱང་སྔར་ལས་གཞན་དུ་འགྱུར་བའི་སྣང་ཚུལ་རྣམས་གཟིགས་རྐྱེན་གྱིས་ངེས་འབྱུང་གི་གསོས་སུ་སྨིན་ཏེ། ཟླ་ཤས་ནས་སྦས་ཡུལ་གླང་མོ་བྲག་ཏུ། དགུང་གྲངས་སོ་གཉིས་ནས་བཟུང་ལོ་གསུམ་གྱི་བཅད་རྒྱར་གཞོལ། ཐོག་མར་ལམ་ཟབ་བླ་སྒྲུབ་དང༌།…

རྣལ་འབྱོར་པ་རྒྱལ་མཚན་དམར་པོའི་རྣམ་ཐར།

༈ རྣལ་འབྱོར་པ་རྒྱལ་མཚན་དམར་པོ་ནི། ལྷོ་ཡུལ་ཀུར་སྟོད་སྨིན་རྒྱས་ནང༌། ཡབ་ངག་དབང་དང༌། ཡུམ་དངོས་གྲུབ་མོ་གཉིས་ཀྱི་སྲས་སུ། རབ་བྱུང་བཅོ་ལྔ་པའི་ཤིང་ཕག་༼༡༨༧༥༽ལོར་འཁྲུངས།༼ཆུ་ཕག་ལ་འཁྲུངས་པར་བཤད་པ་ནི་ནོར།༽དགུང་གྲངས་བཅོ་བརྒྱད་བར་ཁྱིམ་ན་བཞུགས། བཅུ་དགུ་པར་རྐང་པ་ལ་སྟ་གྲིས་རྨས་རྐྱེན་ལོ་གཅིག་རིང་ཞ་བར་གྱུར་པས། དེའི་རིང་ཀློག་ཡིག་རང་སྦྱོང་གིས་ཤེས་པ་བྱུང༌། ཁྱིམ་པའི་བྱ་བར་ཡིད་སྐྱོ་ནས། དགོན་པ་བཀའ་བབ་ཆོས་གླིང་དུ་བླ་མ་ཆོས་ཉིད་རང་གྲོལ་གྱི་སྤྱན་སྔར་བཅར། དེར་སྔགས་བཙུན་བྱས་ནས་འབྲི་ཀློག་འཛིན་གསུམ་སོགས་སློབ་གཉེར་སྦྱོང་ཞོར་བླ་མའི་ཞབས་ཞུ་ཆུ་ལེན་ཤིང་འཐུ་སོགས་གང་དགོས་བསྒྲུབས། གཟུགས་སྟོབས་དང་རྐང་རྩལ་ལ་སུས་ཀྱང་འགྲན་པར་མི་ནུས། དེ་ནས་ཐུན་མོང་སྔོན་འགྲོ་རྣམས་གསན་ཏེ་ལོ་ཁ་ཡར་འདས་པའི་དུས་ཤིག་ན༑ བླ་མས་ཐུགས་བརྩེ་ཆེན་པོས་ཁོང་དང་ཆོས་གྲོགས་གསུམ་ཙམ་ལ་དམིགས་བསལ་དུ་ཀུན་བཟང་བླ་མའི་ཞལ་ལུང་ལྟར་སྔོན་འགྲོའི་བསགས་སྦྱང་རྣམས་རིམ་གྱིས་གཏོང་བཅུག་མཐར། རྫོགས་ཆེན་དངོས་གཞིའི་ཁྲིད་རིམ་རྣམས་ཉམས་ཁྲིད་མཛད་ནས་གནང༌། དེ་རྗེས་སེང་གེ་རྫོང་དང༌། རོང་མོ་སྟེང་ཕྱོགས་སུ་སྒོམ་སྒྲུབ་མཛད་ནས་བཞུགས་པའི་སྐབས་ཤིག་ལ་གྲུབ་དབང་ཤཱཀྱ་ཤྲཱིའི་སྙན་པ་ཐོས་པས་དད་པའི་སྤུ་ལོང་གཡོས་ཏེ། བོད་ཁམས་ཕྱོགས་སུ་ངལ་བ་ཁྱད་དུ་བསད་ནས་ལམ་དུ་ཞུགས། གདན་ས་གྲུ་གུ་གསོལ་སྡེར་ཁར་འབྱོར་ཚེ་གྲུབ་དབང་རིན་པོ་ཆེ་སྐུ་མཚམས་དང་ཁེལ་བས། བཀའ་བཞིན་རྫོགས་ཆེན་ཁྲིད་གཉེར་བླ་མ་ངག་དབང་ཐུབ་བསྟན་གྱི་དྲུང་དུ་ཟླ་བ་གསུམ་བཞུགས། མཐར་གྲུབ་དབང་མཆོག་གི་ཞལ་མཇལ། རིམ་གྱིས་ཕྱག་རྫོགས་ཀྱི་གདམས་པ་སྤྱི་དང༌། ཁྱད་པར་རྫོགས་ཆེན་སྙིང་ཐིག་ཐམས་ཅད་ཀྱི་བཅུད་བསྡུས་པའི་སྙིང་ཐིག་ཡིད་བཞིན་ནོར་བུ་ཞེས་གྲུབ་དབང་མཆོག་གི་དགོངས་པའི་ཟབ་ཆོས་སྙན་བརྒྱུད་ཀྱི་ཆོས་སྐོར་རྣམས་ཁམས་པ་ཐུབ་བསྟན་དང༌། བོད་པ་རྡོ་རྗེ་རིན་ཆེན། འབྲུག་པ་རྒྱལ་མཚན་གསུམ་མ་གཏོགས་གཞན་ལ་གནང་བ་མེད་དོ་གསུངས་ནས། མན་ངག་ཁྱད་པར་ཅན་ཐམས་ཅད་བསྩལ། མཚན་ཡང་ཀུན་བཟང་པདྨ་བདེ་ཆེན་རྩལ་ཞེས་གསོལ། དེར་འཚོ་བ་བསོད་སྙོམས་ལ་བསྟེན་ནས་རྣམ་གཡེང་གི་དབང་དུ་ཅུང་ཟད་མ་སོང་བར་ལོ་གསུམ་གྱི་རིང་ཐོས་བསམ་སྒོམ་གསུམ་ཅིག་ཅར་མཛད། སྔ་ཕྱིར་ཁམས་སུ་ཐེངས་གསུམ་ཕེབས་ནས་གདམས་ངག་ལ་ཞུན་ཐར་བཅད། དེ་ནས་བླ་མའི་ཞལ་ནས། བླ་རྒན་རྒྱལ་མཚན་ཁྱོད་རང་ད་ནི་འདིར་ངའི་དྲུང་དུ་འོང་མི་དགོས། རང་ཡུལ་དུ་འབྱོར་ནས་མཉམ་བཞག་བྱེད་དེ་ཆེད་དུ་སྒྲུབ་པར་བརྩོན་མི་དགོས། ལག་ཏུ་ཕྲེང་བ་ཐོགས་མི་དགོས། ཉིན་མཚན་མེད་པར་ཉལ་སྡོད་པས་ཆོག །ཅེས་དང༌། ཡང་གཞན་ལ་ཆོས་བཤད་ནས་སློབ་མ་བརྒྱ་དང་བརྒྱད་ལས་མི་ཉུང་བ་སྤེལ་ཅིག་ཨང་གསུངས་ནས་དབུགས་དབྱུང་གཟེངས་བསྟོད་ཀྱི་བཀའ་ལུང་སྤྱི་བོར་བཅིང༌། རང་ཡུལ་དུ་བྱོན་རྗེས། གླིང་རྒྱས་རྩེར་བསམ་གཏན་གྱི་ཁང་ཆུང་ཞིག་བཅོས་ནས་ལོ་ཤས་བཞུགས། དེར་གྲོང་ཐག་ཉེ་བའི་སྐྱོན་བྱུང་བས་ཞམ་རི་ཁྲོད་དུ་ཕེབས་ཏེ། ས་སྡེ་བཙུགས་ནས་སྒྲུབ་པ་མཛད།…

ལྷོ་འབྲུག་སློབ་དཔོན་སྨོན་ལས་རབ་བཟང་གི་རྣམ་ཐར།

༈ སློབ་དཔོན་སྨོན་ལམ་རབ་བཟང་ནི། འབྲུག་ཀྲོང་གསར་མང་སྡེ་སྟང་སྦིས་ཚང་ཁ་ཞེས་པར། རབ་བྱུང་བཅོ་ལྔ་པ་ས་སྟག་༼༡༨༧༨༽ལོར་འཁྲུངས། སློབ་དཔོན་ཚུལ་ཁྲིམས་མཐར་ཕྱིན་གྱི་སྐྱེ་བར་གྲགས། ཞབས་དྲུང་ཐུགས་སྤྲུལ་ལྔ་པ་འཇིགས་མེད་ཆོས་རྒྱལ་ནས་ཆོས་མིང་སྨོན་ལམ་རབ་བཟང་ཞེས་བཏགས། སྐུ་ན་ཕྲ་དུས་ནས་ཀྲོང་གསར་གྲྭ་ཚང་དང༌། དབང་འདུས་གྲྭ་ཚང་གཉིས་སུ་རེ་མོས་སུ་བཞུགས་ཏེ། གར་ཐིག་དབྱངས་གསུམ་སོགས་གྲྭ་ཚང་གི་སློབ་གཉེར་སྤྱི་དང༌། ཁྱད་པར་ལྷ་བྲིས་པ་བསྟན་འཛིན་དབང་དྲག་བསྟེན་ནས་ལྷ་བྲིས་དང་འཇིམ་བཟོ་སོགས་ལ་སྦྱོང་བརྩོན་མཐར་ཕྱིན་མཛད་དེ་མཁས་པར་གྱུར། ཀྲོང་གསར་རྫོང་གི་སྒྲོལ་མ་ལྷ་ཁང་ནང་གི་ལྡེབས་རིས་སྒྲོལ་མ་ཉེར་གཅིག་དང་རྣམ་རྒྱལ་མ་དང༌། ཕྱག་ན་རྡོ་རྗེའི་འཇིམ་སྐུ་སོགས་སྐུ་བརྙན་མང་པོ་ཞིག་རྗེ་འདིའི་ཕྱག་རྩལ་ལས་གྲུབ་པ་ཡིན་འདུག །གཞན་ཡང་ཁྱད་ཆོས་དུ་མས་ཕྱུག་པའི་སོར་མོའི་སྒྱུ་རྩལ་གྱི་ཕྱག་ཤུལ་ཧ་ཅང་མང༌། རྗེ་མཁན་རབས་ཞེ་གསུམ་པ་བསྟན་འཛིན་ལྷུན་གྲུབ་སོགས་ལས་འབྲུག་ལུགས་ཀྱི་དབང་ལུང་ཁྲིད་མང་པོ་གསན། རིག་གནས་སྐོར་མང་པོ་ཞིག་ནི་གསན་མ་དགོས་པར་གཟིགས་པ་ཙམ་གྱིས་མཁྱེན་པའང་བྱུང༌། དེ་ནས་གོང་ས་ཨོ་རྒྱན་དབང་ཕྱུག་གིས་ཤིང་རྟ་༼༡༨༩༤༽ལོར་བུམ་ཐང་སྐུ་རྗེ་ལྷ་ཁང་གསར་བཞེངས་མཛད་སྐབས་སུ་ཁོང་ལྷ་བཟོའི་ཁྲོད་ན་ཡོད་པས། གོང་ས་རྒྱལ་བཙུན་ཟུང་གི་ཐུགས་ལ་མ་བབ་པའི་རྐྱེན་ཞིག་གིས་བསྐུལ་ཏེ། བུམ་ཐང་མཚམས་པ་ལ་དང༌། མོན་ལ་དཀར་ཆུང་རྣམས་བརྒལ་ནས་བོད་ཕྱོགས་སུ་བྱོན། ཐོག་མར་ལྷ་སར་ལོ་གཅིག་ཙམ་རིང་གནས་སྐོར་དང་ལྷ་བྲི་བ་སོགས་མཛད་ཅིང་བཞུགས། སྐབས་དེ་དུས་མདོ་ཁམས་ཕྱོགས་ན་གྲུབ་དབང་ཤཱཀྱ་ཤྲཱི་མཚན་གྲགས་ཤིན་ཏུ་ཆེ་བར་བརྟེན། ཞབས་དྲུང་དུ་བཅར་འདོད་ཆེན་པོ་བྱུང་ཏེ། ལྷ་ཡོན་ཅུང་ཟད་བྱུང་བ་རྣམས་བསྣམས་ནས་ཁམས་སུ་ཕེབས། སྔ་མའི་ལས་འཕྲོ་བཟང་པོ་དུས་སུ་སྨིན་ཏེ་ཞལ་མཇལ་བ་ཙམ་གྱིས་དད་པ་ཐོབ་ཅིང༌། རིམ་བཞིན་གདམས་ངག་བཀའ་རྒྱ་ལྔ་དང༌། སྙན་རྒྱུད་ཟབ་པའི་མཐར་ཐུག་སོགས་སྨིན་གྲོལ་རྒྱབ་རྟེན་དང་བཅས་པ་ཚང་རྫོགས་སུ་གསན་བསམ་ལྷུར་བཞེས། ལྷག་པར་ཆོས་དྲུག་ལ་བཀའ་བབ་ཅིང་ཉམས་བཞེས་རྩལ་དུ་བཏོན་པས། ནམ་ཐོ་རངས་ཙམ་ནས་ནམ་ལང་བར་ཆུ་རས་བཅུ་དྲུག་ཙམ་བསྐམས་ནུས་པ་དང༌། དབྱར་དགུན་མེད་པར་རས་རྐྱང་ཐུབ་པ། ཐུར་མའི་ཕྱག་བཞེས་ལ་རྟགས་དངོས་སུ་ཐོན་པ་སོགས་ཉམས་རྟོགས་བཟང་པོ་འཁྲུངས། གྲུབ་དབང་གི་རྣམ་ཐར་དུའང་སྒོམ་པ་ནཱ་རོ་ཆོས་དྲུག་ཉམས་སུ་ལེན་པའི་སློབ་གྲས་སུ་བཞག་པར་མཛད་དོ། །ཆོས་མགོན་བརྒྱད་པ་མཐུ་སྟོབས་ཆོས་ཀྱི་རྒྱ་མཚོ་ལས་ཀྱང་སྔ་རྗེས་སུ་འབྲུག་ལུགས་ཀྱི་དབང་ལུང་དཔག་མེད་གསན་པས་གདམས་པའི་མཛོད་དུ་གྱུར། དེ་ནས་གྲུབ་དབང་རིན་པོ་ཆེ་ཙ་རི་སྐྱིད་ཕུག་ཏུ་ཕེབས་པའི་སྐབས་ཕྱག་ཕྱི་མཛད་ཅིང༌། གནས་དེར་ལོ་ངོ་གསུམ་ཙམ་ལ་དཔོན་སློབ་འབྲལ་མེད་དུ་བཞུགས་པའི་མཐར། སོ་བཞི་ལྕགས་ཕག་ལོར་འབྲུག་ཏུ་འབྱོན་ཁར་བླ་མས་སྐུ་རྟེན་གསེར་ཟངས་ཀྱི་ཚེ་དཔག་མེད། གསུང་རྟེན་རྡོར་གཅོད་གསེར་བྲིས། ཐུགས་རྟེན་རྡོར་དྲིལ་དང་གནས་ཀྱི་ལུང་བསྟན་བཅས་གནང་ནས། ཐོག་མར་བུམ་ཐང་ཐར་པ་གླིང་གི་ལྟག་ཆོས་བྲག་དབེན་གནས་སུ་བྱོན་ནས་ཐུགས་དམ་ལ་རེ་ཞིག་བཞུགས། དེར་སྔར་ནས་ཞལ་ཤེས་ཟིན་བྲིས་བཏབ་པ་རྣམས་ཕྱོགས་བསྒྲིགས་ཀྱིས་ཟབ་ལམ་ནཱ་རོ་ཆོས་དྲུག་གི་ཁྲིད་ཡིག་སོགས་བརྩམས། དེ་ནས་བླ་མའི་ལུང་བསྟན་བཞིན་འབྲུག་ཤར་ཕྱོགས་བཀྲ་ཤིས་སྒང་དུ་མཁའ་གླིང་དགེ་བགྲེས་བཀྲ་ཤིས་ཚེ་རིང་གིས་གདན་ཞུས་ལྟར་ཕེབས་ཤིང༌། ལས་དང་སྨོན་ལམ་གྱི་མཐུས་རྫོང་དཔོན་སྲས་རྡོ་པོའམ་ཕྲིན་ལས་སྟོབས་རྒྱལ་གྱིས་དབུ་བླར་བཟུང་ནས་མཆོད་ཡོན་ཐུགས་ནང་གཤིན་པ་ཞིག་ཏུ་གྱུར།…

ལྷོ་འབྲུག་ཡོ་བྲག་བླ་མ་རིག་འཛིན་རྡོ་རྗེའི་རྣམ་ཐར།

༈ གྲུབ་དབང་ཤཱཀྱ་ཤྲཱིའི་ཞལ་སློབ་འབྲུག་ཡོ་བྲག་བླ་མ་རིག་འཛིན་རྡོ་རྗེ་ནི། འབྲུག་ལྷུན་གྲུབ་རྩེའི་རྫོང་ཁོངས་ཀུར་སྟོད་སྒང་གཟུང་ངར་ཞེས་པར། ཡབ་སངས་རྒྱས་དཔལ་འབྱོར་དང༌། ཡུམ་ཚེ་རིང་ཆོས་འཛོམས་ཟུང་གི་སྲས་སུ། རབ་བྱུང་བཅོ་ལྔ་པའི་ས་བྱི་༼༡༨༨༨༽ལོར་སྐུ་བལྟམས། ཆོས་ཀྱི་བག་ཆགས་བཟང༌། ཆོས་རྗེ་པད་དཀར་རྒྱ་མཚོའི་རྣམ་འཕྲུལ་དུ་གྲགས། དགུང་ལོ་དྲུག་ནས་ལྷུན་རྩེའི་རྫོང་གྲྭ་ཚང་བླ་མ་གནས་བརྟན་ལ་གཙུག་ཕུད་ཕུལ་ནས་མཚན་རིག་འཛིན་རྡོ་རྗེར་གསོལ། འབྲི་ཀློག་དང་ཆོ་ག་སྦྱངས། ནར་སོན་པ་དང་དཀའ་བ་དང་དུ་བླངས་ཏེ། བོད་མདོ་ཁམས་སུ་ཆོས་འཚོལ་དུ་ཕེབས། དེར་གྲུབ་དབང་ཤཱཀྱ་ཤྲཱིའི་ཞབས་ལ་གཏུགས་ཤིང༌། ཕྱག་ཆེན་དང་ཆོས་དྲུག་སོགས་བཀའ་གཏེར་སྨིན་གྲོལ་གྱི་རིམ་པ་རྣམས་རྫོགས་པར་ཞུས། མཉེས་པ་གསུམ་གྱིས་སྲི་ཞུ་སྒྲུབ་པར་མཛད། དེ་ནས་བླ་མའི་བཀའ་བཞིན་ལྷོ་ཡུལ་དུ་ཕེབས་ནས་གནས་ཆེན་སེང་གེ་རྫོང་སོགས་དབེན་གནས་དུ་མར་སྒྲུབ་པར་མཛད་ཅིང༌། ཁྱད་པར་ཡོ་བྲག་དགོན་གནས་སུ་རྒྱུན་རིང་བཞུགས་ཏེ། གནས་ཁང་སྨྱུག་མ་ལས་བྱས་པ་དང༌། འཚོ་བའང་བསོད་སྙོམས་ཙམ་ལ་བསྟེན་ནས་ཉམས་བཞེས་ཐུན་བཞིའི་རིམ་པ་མ་ཆག་པར་བརྩོན་པར་མཛད། སྐབས་དེར་ཉམས་ལ་རྗེ་གྲུབ་པའི་དབང་ཕྱུག་མཇལ་ཞིང་འོད་དུ་ཞུ་ནས་རང་ལ་ཐིམ་པའི་སྣང་བ་ཞིག་བྱུང་བས། སྔར་དང་མི་འདྲ་བའི་ཉམས་རྟོགས་ཁྱད་པར་ཅན་འཁྲུངས། རིམ་པས་རྫོང་དཔོན་ཀུན་བཟང་རྣམ་རྒྱལ་གྱིས་སྦྱིན་བདག་མཛད་དེ། ཡོ་བྲག་དབེན་གནས་སུ་གཙུག་ལག་ཁང་རྟེན་དང་བརྟེན་པ་བཅས་གསར་བཞེངས་གནང༌། སྐལ་བཟང་འདུས་པ་རྣམས་ལ་ཁམས་དབང་མོས་པ་དང་འཚམས་པའི་མདོ་རྒྱུད་མན་ངག་གསར་རྙིང་གི་ཆོས་ཚུལ་རྣམས་བསྟན་ནས་རྗེས་སུ་འཛིན་པར་མཛད་པས། ཞལ་སློབ་ཀྱང་བླ་མ་ཆོས་བཟང༌། ཚེ་མཚམས་པ་ཚེ་དབང༌། གནས་བགྲེས་ཚེ་རིང༌། སློབ་ཟླ་བ་དཔལ་འབྱོར། སློབ་རྒྱ་མཚོ། དྲག་ཤོས་ཀུན་བཟང་རྣམ་རྒྱལ་སོགས་ངུར་སྨྲིག་འཆང་བ་དང་གོས་དཀར་འཆང་བ་བཟང་ལ་མང་བ་བྱུང༌། དེ་ནས་དགུང་གྲངས་ང་ལྔ་པ་ཆུ་རྟ་༼༡༩༤༢༽ལོའི་ཆོ་འཕྲུལ་ཟླ་བའི་ནང་བདུད་རྩི་སྨན་སྒྲུབ་འཚོགས་བཞིན་པར། ཚེས་བཅུ་གསུམ་ཉིན་ངོ་མཚར་བའི་ལྟས་བཅས་གཟུགས་སྐུ་ཆོས་དབྱིངས་སུ་བསྡུས་སོ། །རྫོང་དཔོན་གྱིས་བདག་རྐྱེན་དང་འབྲེལ་གྲུབ་དབང་བསོད་ནམས་བཟང་པོས་དབུ་འདྲེན་མཛད་དེ། སྐུ་གདུང་ལས་རིང་བསྲེལ་འཁྲུངས་པ་རྣམས་བཞུགས་པའི་གདུང་རྟེན་ཡང་གནས་དེར་ལེགས་པར་བཞེངས་སོ། །