འབར་འབྲུག་གི་སྐབས།

གཅུང་ཀུན་དགའ་བཟང་པོ་སོགས་ཀྱི་རྣམ་ཐར།

༈ གཅུང་ཀུན་དགའ་བཟང་པོ་ནི། རྗེ་རིག་འཛིན་ཆོས་དབྱིངས་རྡོ་རྗེའི་གཅུང་དུ་འཁྲུངས། རྗེ་དེ་ཉིད་དང་བླ་མ་མང་པོ་བསྟེན། སྔོན་འགྲོ་གཏོང་དུས་ནས་དཔག་པར་དཀའ་བའི་མཚན་མ་བཟང་པོ་བྱུང་ཞིང༌། རྗེ་ལ་འཇམ་དཀར་གྱི་རྗེས་གནང་ཞུས་ནས། བསྙེན་པ་གཏོང་བར་གཞུང་ནས་བཤད་པའི་རྟགས་མཚན་ཕལ་ཆེར་སྣང༌། འབའ་རའི་གདན་ས་ལོ་མང་པོ་བཞུགས་པས། སྒྲུབ་ཚུགས་བཟང་བ་དང་གང་ཅི་ནས་མཆོག་དམན་ཀུན་དད་མོས་ཆེ་ཞིང༌། ཕྱིས་གདན་ས་བཀྲ་ཤིས་ཆོས་གླིང་དུ་བཞུགས་ནས་མཛད་ཕྲིན་བསྐྱངས་སོ། །གཞན་ཡང་རིག་འཛིན་ཆོས་དབྱིངས་རྡོ་རྗེའི་གཅུང་གྲྭ་གདུང་སྲས་སྔགས་འཆང་ཟིལ་གནོན་རྡོ་རྗེ་ཞེས་བྱ་བ་ཞིག་ཀྱང་བྱུང་ཞིང༌། དེ་དག་གི་སྲས་རྒྱུད་དུ་བློ་གྲོས་ནོར་བུ་ཞེས་པ་བྱོན། དེའི་སྲས་བློ་བཟང་འགྱུར་མེད་རྡོ་རྗེ་དགུང་གྲངས་ཞེ་དགུ་ཙམ་བཞུགས། དེ་ལ་སྲས་རྗེ་བཙུན་བསྟན་འཛིན་ནོར་བུ་༼༡༩༡༦་་་༡༩༨༨༽དང༌། ཟིལ་གནོན་༼༡༩༣༡༽གཉིས་བྱུང༌། དེའི་སྲས་སུ་ད་ལྟ་ཇོ་པདྨ་ཆོས་སྐྱབས་དང༌། བྱམས་པ་དཔལ་ལྡན་སོགས་འཁྲུངས། ཁོང་རྣམ་གཉིས་དུས་འགྱུར་སྐབས་འཕགས་ཡུལ་དུ་ཕེབས་ནས། རྡ་རམ་སར་དགོན་གནས་གསར་དུ་བཞེངས་པ་དང༌། སྐྱེས་མཆོག་འབའ་ར་བའི་བཀའ་འབུམ་གྱི་དཔེ་རྒྱུན་དང་ལུང་རྒྱུན་སྤེལ་བ་སོགས་ཀྱིས་བསྟན་འགྲོའི་དོན་མཛད་བཞིན་ད་ལྟར་སྐུ་འཚོ་གཞེས་སུ་བཞུགས་སོ། །           འདིར་སྨྲས་པ། སྡེ་སྣོད་གསུམ་དང་ཁྱད་པར་རྒྱུད་སྡེ་བཞི། ། རི་ཆོས་སྐོར་གསུམ་ལྷག་པར་ཁྲིད་ཆེན་བརྒྱད། ། མདོར་ན་བཀའ་བསྟན་མན་ངག་རྒྱ་མཚོའི་མཛོད། ། བརྒྱུད་པ་འདི་འདྲ་རིན་ཆེན་འབྱུང་གནས་དངོས། །   ཞེས་དོན་བརྒྱུད་དཔལ་ལྡན་འབྲུག་པའི་མཁས་གྲུབ་བླ་མ་རྒྱ་མཚོའི་རྣམ་ཐར་ལེགས་བཤད་ནོར་བུའི་གཏེར་མཛོད་ཀྱི་འབྲུག་ལུགས་བླ་མ་བརྒྱུད་པའི་རྣམ་ཐར་དངོས་བསྟན་པ་ལས། སྐྱེས་མཆོག་འབའ་ར་བ་ནས་བརྒྱུད་པའི་འབར་འབྲུག་གི་སྐབས་ཏེ་བདུན་པའོ།། །།

འཇམ་གླིང་རིག་འཛིན་ཆོས་དབྱིངས་རྡོ་རྗེའི་རྣམ་ཐར།

༈ གྲོ་མོ་བཀའ་བརྒྱུད་སྤྲུལ་སྐུའི་སློབ་མའི་གཙོ་བོ་རིག་འཛིན་ཆོས་དབྱིངས་རྡོ་རྗེ་ནི། མང་ཡུལ་སྐྱིད་གྲོང་གྲྭ་འཇམ་གླིང་གདུང་འཛིན་སྔགས་འཆང་ཤེས་རབ་འབྱུང་གནས་ཀྱི་སྲས་གཅིག་པུར་གྱུར་པ་དཔལ་ལྡན་ངག་དབང་ནོར་བུ་ནི་དམ་པ་འདི་ཉིད་ཀྱི་ཡབ་དང༌། ཡུམ་དོན་གྲུབ་རྒྱལ་མོའི་སྲས་སུ་རབ་བྱུང་བཅུ་གསུམ་པའི་ཆུ་འབྲུག་༼༡༧༧༢༽ལོར་འཁྲུངས། སྲས་བཞིའི་ཆེ་ཤོས་ཡིན། གཅུང་ཆོས་གྲགས་རྒྱ་མཚོའི་སྤྲུལ་སྐུར་གྲགས། རྗེ་སྨན་སྒོམ་པས། མཚན་ཀུན་བཟང་རིག་འཛིན་ཆོས་དབྱིངས་རྡོ་རྗེ་རྣམ་པར་རྒྱལ་བའི་སྡེར་གསོལ། པཎ་ཆེན་བློ་བཟང་དཔལ་ལྡན་ཡེ་ཤེས་ཀྱིས། མཚན་ཚེ་དབང་རྡོ་རྗེ་མི་འགྱུར་ནམ་མཁའ་ཞེས་བསྩལ། རྗེ་དེ་གཉིས་ལས་དབང་ལུང་ཡང་མང་པོ་ཞུས། དགུང་ལོ་ལྔ་དྲུག་སྐབས་གྲུབ་མཆོག་ཕྲིན་ལས་དཔལ་བཟང་ལས། འབར་ཆོས་དབང་ཁྲིད་ལུང༌། ཡབ་ལས་ཀྱང་རྟ་མགྲིན་ཡང་གསང་ཁྲོས་པའི་དབང་བཞི། རྟ་པོད་ཀྱི་ལྗགས་ལུང༌། གུར་དྲག་གི་དབང་བཞི། མགོན་པོ་ཕྱག་བཞི་པའི་རྗེས་གནང་སོགས་གསན། ཀློག་དང་ལྷ་བྲིས་སོགས་འབད་པ་ཆེར་མ་དགོས་པར་ཤེས། རྗེ་བསྟན་འཛིན་རྡོ་རྗེ་ལ་གཙུག་ཕུད་ཕུལ་ཏེ། སྐྱབས་གསུམ་འཛིན་པ་དགེ་བསྙེན་གྱི་སྡོམ་པ་མནོས། ཚེ་དབང༌། ཀུན་རིག་གི་དབང་ལུང་སོགས་ཞུས། རྗེ་བླ་མ་རིག་འཛིན་འཕྲིན་ལས་བདུད་འཇོམས་ལས། འཇའ་ཚོན་ཆོས་སྐོར་སོགས་དབང་ལུང་དཔག་མེད་གསན། ཁྱད་པར་གྲོ་མོ་བཀའ་དགོན་དུ་རྗེ་གྲུབ་ཐོབ་སྤྲུལ་སྐུ་ངག་དབང་ཆོས་ཀྱི་རྒྱ་མཚོའི་ཞལ་སྔ་ནས། བདེ་མཆོག་དྲིལ་བུ་ལུགས་ཀྱི་དབང་བཞི། ཕག་མོའི་བྱིན་རླབས། ཕྱག་ཆེན་གྱི་ངོ་སྤྲོད། ནཱ་རོ་ཆོས་དྲུག་དང་གཏུམ་མོ་ཞག་བདུན་མའི་ཁྲིད། མེ་དབང༌། རླུང་དང་འཁྲུལ་འཁོར་རྣམས་ལེགས་པར་སྦྱངས་པས། དེ་མ་ཐག་ཏུ་བདེ་དྲོད་ཆེ་རབ་ཏུ་སྐྱེས། རི་ཆོས་སྐོར་གསུམ། ཐར་གྲུ་སྐོར་གསུམ་སོགས་རང་ལུགས་ཀྱི་དབང་ཁྲིད་ལུང་གང་བཞུགས་རྣམས་ཐོབ་སྟེ་བཀའ་དྲིན་ཤིན་ཏུ་ཆེ་བའི་བླ་མར་འཛིན། གཞན་ཡང་ཡོངས་འཛིན་བློ་བཟང་བསྟན་འཛིན་དང༌། རས་ཆེན་བློ་གྲོས་རྒྱལ་མཚན་སོགས་བླ་མ་མང་པོ་བསྟེན། བཅུ་བདུན་ས་སྤྲེ་ལོར་གོར་བོད་དུས་ཟིང་སྐབས། ལྷ་སྲུང་གི་བྱིན་མཐུས་དགོན་པ་དང་རྗེ་ཉིད་ལ་གནོད་པ་ཆེར་མ་བྱུང་བར། རང་གནས་བཀྲ་ཤིས་ཆོས་གླིང་དུ་བཅད་རྒྱར་ལོ་གསུམ་བཞུགས། ཐུན་མཚམས་སུ་དམ་ཆོས་ཐར་རྒྱན་ལ་གཟིགས་པས།…

གྲུབ་ཆེན་རྡོ་རྗེ་རྒྱལ་མཚན་གྱི་རྣམ་ཐར།

༈ དེའི་སློབ་མ་གྲུབ་ཆེན་རྡོ་རྗེ་རྒྱལ་མཚན་ནི། རྗེ་གཙང་པ་རྒྱ་རས་ཀྱི་ཞལ་སློབ་བྲག་སྒོམ་སངས་རྒྱས་རིན་ཆེན་སྤྲིན་ཟམ་དགོན་དུ་བཞུགས་པའི་རྣམ་ཐར་ནང༌། ཚེ་ལོ་ཉི་ཤུ་པ་ལའང་གནས་དེར་གྲུབ་ཐོབ་འོང་ཞེས་གསུངས་པ་ལྟར། རི་ཁྲོད་ཡ་མཚན་ཅན་དེར་གྲུབ་ཆེན་འདི་ཉིད་བཞུགས་པ་སྟེ། དེ་ཡང་དམ་པ་འདི་ལ་སྟོད་ནས་བཟུང་བལ་ཡུལ་དང་གངས་ཏི་སེ་མན། ཀོང་པོ་ཙ་རི་ཡན་གྱི་དབུས་གཙང་གི་གནས་ཐམས་ཅད་འཁོར་བར་བགྱིས་ཤིང༌། སྙིང་རུས་དང་དཀའ་སྤྱད་མཐར་ཕྱིན་པ། ཕྱིས་གནས་དེར་བསྡད་རྩིས་ཀྱིས་འབའ་རར་རས་ཕུད་གཏོང་ལ་ཕྱིན་སྐབས། དོན་གྲུབ་སྡིངས་ན་གཟིམས་པའི་རྨང་ལམ་དུ་སྐྱེས་པ་བཞིན་བཟང་གོས་ལྗང་ཁུ་གྱོན་པ་ཞིག་ཡོང་ནས། དར་མཛོད་ཅིག་གཏང་སྟེ་ད་བྱོན་རན་པའི་བསྐུལ་མ་ཡང་ཡང་བྱུང༌། དེ་ནི་སྤྲིན་ཟམ་དགོན་གྱི་གཞི་བདག་སྟེ། ཕྱིས་དགོན་གནས་དེ་ཉམས་གསོ་བགྱིས་ནས་བཞུགས་པའི་དུས་སུ་མཐུན་རྐྱེན་ཐམས་ཅད་ཐོགས་མེད་དུ་བསྒྲུབས་པའི་གྲུབ་ཐོབ་ཆེན་པོ་ཞིག་ཡིན་ནོ། །

གྲོ་མོ་བཀའ་བརྒྱུད་སྤྲུལ་སྐུ་ཆོས་ཀྱི་རྒྱལ་མཚན་གྱི་རྣམ་ཐར།

༈ དེའི་སློབ་མ་གྲོ་མོ་བཀའ་བརྒྱུད་སྤྲུལ་སྐུ་ངག་དབང་ཆོས་ཀྱི་རྒྱ་མཚོ་ནི། སྦས་ཡུལ་འབྲས་མོ་ལྗོངས་ཀྱི་ཉེ་འདབས། གངས་ཆེན་མཛོད་ལྔ་ཟུང་དུ་འབྲེལ་བའི་མཚམས་ལ་མོ་ཞེས་པའི་ཡུལ་དུ། ཡབ་གཙང་ལ་སྟོད་བྲག་ནག་བླ་མ་པདྨ་འོད་འབར་དང༌། ཡུམ་ཀུན་བཟང་དཔལ་མོ་གཉིས་ཀྱི་སྲས་སུ། རབ་བྱུང་བཅུ་གསུམ་པའི་ཤིང་ཕག་༼༡༧༥༥༽ལོར་བལྟམས། སྐྱེས་མཆོག་འབའ་ར་བའི་སྐུ་ཕྲེང་གསུམ་པ་རྗེ་ཀརྨ་གསལ་བྱེད་ཀྱི་དངོས་སློབ་གྲུབ་དབང་དཀོན་མཆོག་རྒྱལ་མཚན་གྱི་སྐུ་སྐྱེ་ངག་དབང་བསྟན་འཛིན་ཉི་ཟླའི་སྤྲུལ་སྐུ་ཡིན། དགུང་ལོ་བཞི་ལྔ་ཙམ་ལ། ཐང་སྒོ་དགོན་དུ་གྲུབ་ཐོབ་དཀར་པོ་ཞེས་དགུང་ལོ་བརྒྱ་དང་དྲུག་ཅུ་ཙམ་བཞུགས་པ་ཞིག་ཡོད་པ་དེས། རྗེ་བསྟན་འཛིན་ཉི་ཟླའི་སྤྲུལ་སྐུར་འཁྲུལ་མེད་དུ་ཡིན་པའི་ངོས་འཛིན་མཛད། སྐུ་གོང་མའི་ཉེར་སྤྱད་ཕྱག་ཏུ་ཕུལ་བའང་ངོས་ཟིན་པས་ཡིད་ཆེས་སུ་གྱུར། གྲོ་མོ་བཀའ་བརྒྱུད་དགོན་གསར་གྱི་གདན་སའི་ཁྲི་ལ་མངའ་གསོལ། སྟོད་ནས་རྗེ་ཆོས་གྲགས་རྒྱ་མཚོས་མཚན་ངག་དབང་ཆོས་ཀྱི་རྒྱ་མཚོ་དཔལ་བཟང་པོ་ཞེས་ཆེད་དུ་བསྩལ། དེ་ནས་དགེ་རྒན་དབུ་མཛད་རྣམ་གྲོལ་ནས་ལྗགས་ཀློག་སོགས་སྐུ་ཡོན་གསན་སྦྱང་ཕུལ། དགུང་ལོ་དགུ་པ་ལ་འབའ་རར་རྗེ་ངག་དབང་ཆོས་གྲགས་རྒྱ་མཚོའི་དྲུང་དུ་བཅར་ཏེ། གཙུག་ཕུད་ཕུལ། འཁོར་ལོ་སྡོམ་པ་དང༌། བླ་སྒྲུབ་ཀྱི་དབང་ཁྲིད། ཕྱག་ཆེན་དང༌། གཏུམ་མོ་ཞག་བདུན་མའི་ཁྲིད། མེ་དབང༌། ནཱ་རོ་ཆོས་དྲུག་གི་ཁྲིད་ལུང་སོགས་དང༌། རི་ཆོས་སྐོར་གསུམ། ཐར་གྲུ་སྐོར་གསུམ་གྱི་ལུང་བཅས་གསན།  ཅུ་བཞི་ལ་བླ་མ་གཤེགས་པས། ཤངས་མོན་རྫོང་རི་ཁྲོད་དུ་གྲུབ་དབང་ཀརྨ་དཔལ་ལྡན་གྱི་སྤྱན་སྔར་བྱོན་ཏེ། ཕྱག་ཆེན་དང༌། ནཱ་རོ་ཆོས་དྲུག་སོགས་སླར་ཡང་ཉམས་ཁྲིད་དུ་བསྐྱངས་བར་མཛད་ཅིང༌། གཞན་ཡང་ཐབས་ལམ་གསང་ཁྲིད་ཀྱི་དབང་སོགས་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་ཇི་སྙེད་ཅིག་གསན་ནས། མཉེས་པ་གསུམ་གྱིས་མཉེས་པར་མཛད། པཎ་ཆེན་བློ་བཟང་དཔལ་ལྡན་ཡེ་ཤེས་ཀྱི་དྲུང་དུ་བསྙེན་པར་རྫོགས། སྤྱིར་ཆོས་འབྲེལ་གསན་པའི་བླ་མ་ནི་བཅུ་ཕྲག་གཅིག་ལྷག་ཙམ་དུ་སྣང་ལ། དེ་དག་གི་ནང་ནས་རྗེ་ངག་དབང་ཆོས་གྲགས་རྒྱ་མཚོ་ནི་ཡོངས་འཛིན་གྱི་ཐོག་མ་བཀའ་དྲིན་གསུམ་ལྡན་གྱི་རྩ་བའི་བླ་མ་དང༌། མོན་རྫོང་གྲུབ་དབང་ཀརྨ་དཔལ་ལྡན་ནི་ཉམས་རྟོགས་དོན་བརྒྱུད་ཀྱི་བྱིན་རླབས་འཕོ་བ་ཐོབ་པའི་བླ་མ་ཡིན་པས། དམ་པ་འདི་གཉིས་ནི་བཀའ་དྲིན་མཚུངས་པ་མེད་པའི་རྩ་བའི་བླ་མར་མཛད་དོ། །སྐུ་གཞོན་ནུ་ནས་བཀའ་བརྒྱུད་དགོན་གསར་དུ་སྐུ་མཚམས་ལ་བཞུགས་ནས་སྔོན་འགྲོ་བསགས་སྦྱང་དང༌། ཚེ་དཔག་མེད། རྟ་མགྲིན། དཀོན་མཆོག་སྤྱི་འདུས། གུར་དྲག་སོགས་ཀྱི་ལྗགས་བསྙེན་གནང༌།…

གྲུབ་དབང་བྱ་བཏང་ཀརྨ་དཔལ་ལྡན་གྱི་རྣམ་ཐར།

༈ ཡང་ཀུན་མཁྱེན་ངག་དབང་ཡེ་ཤེས་ཀྱི་སློབ་མ་གྲུབ་དབང་བྱ་བཏང་ཀརྨ་དཔལ་ལྡན་ནི། གཙང་གཡས་རུ་ཤངས་ཀྱི་འཆུམ་དགག་ཐོག་ཏུ། ཡབ་དགག་ཐོག་པ་དང༌། ཡུམ་ཁྱིམ་བུ་ཤར་མ་གཉིས་ཀྱི་སྲས་སུ། རབ་བྱུང་བཅུ་གཉིས་པའི་ས་གླང་༼༡༧༠༩༽ལོར་འཁྲུངས། དགུང་ལོ་བཅོ་བརྒྱད་པར་སྟག་སྣ་ཆོས་ཀྱི་ཕོ་བྲང་དུ་རྗེ་ཆོས་ཀྱི་དབང་པོའི་ཞབས་དྲུང་དུ་གཙུག་ཕུད་ཕུལ། མཚན་ཀརྨ་དཔལ་ལྡན་ཞེས་བསྩལ། དེ་ལ་སྨིན་གྲོལ་གྱི་ཟབ་ཆོས་ཀྱང་མང་དུ་གསན། ཉེར་དྲུག་ལ་ཀུན་མཁྱེན་ངག་དབང་ཡེ་ཤེས་འབའ་རའི་གདན་སར་ཕེབས་སྐབས། སྙན་པ་གསན་ཏེ་དྲུང་དུ་བྱོན། དད་པ་ཐུན་མོང་མ་ཡིན་པ་འཁྲུངས། དེ་ནས་བཟུང་དཔལ་འཁོར་ལོ་སྡོམ་པའི་དབང་བཞི་དང་རྡོ་རྗེ་རྣལ་འབྱོར་མའི་བྱིན་རླབས་སོགས་སྨིན་བྱེད་ཀྱི་དབང༌། ཁྲིད་ཆེན་བརྒྱད་སོགས་གྲོལ་བྱེད་ཀྱི་ཁྲིད། ཁྱད་པར་གྱི་བླ་སྒྲུབ་ཕྱི་ནང་གསང་གསུམ། ཕྱག་ཆེན་ཆོས་དྲུག་གི་ཡང་སྙིང་སོགས་གཏེར་ཆོས་དང༌། ཐར་གྲུ་སྐོར་གསུམ་གྱིས་མཚོན་པའི་དབང་ཁྲིད་ལུང་གསུམ་མཐའ་ཡས་པ་གསན། རིག་འཛིན་ཆེན་པོ་ཚེ་དབང་ནོར་བུ་ཉིད་ལ་གུ་རུ་པདྨས་རང་གཞན་དོན་གཉིས་ལྷུན་གྱིས་གྲུབ་ངེས་པའི་སློབ་མ་བདུན་ཅུ་དོན་ལྔའི་ནང་ནས། མཆོག་གི་སྐྱེས་བུ་སུམ་ཅུ་རྩ་དྲུག །ཉེ་བའི་བུ་བརྒྱད་འབྱུང་བར་ལུང་བསྟན་པ་ལྟར། རྗེ་འདི་ཉིད་ཐུགས་སྲས་དམ་པར་མཛད་ཅིང༌། རྡོ་རྗེའི་གསུང་གིས་ཆེས་ཆེར་བསྔགས་སྐད། དེ་ནས་ཐོས་བསམ་གྱིས་སྒྲོ་འདོགས་ལེགས་པར་ཆོད་དེ། དབེན་པའི་གནས་སུ་སྒོམ་པར་བཞེད་ནས། ཐོག་མར་ཤངས་དཀར་པོ་བྲག་གི་རི་ཁྲོད་དུ། སྔོན་འགྲོ་ཕྱག་དང་ཡིག་བརྒྱ་མཎྜལ་བླ་མའི་རྣལ་འབྱོར་རྣམས་རིམ་བཞིན་ཉམས་བཞེས་མཛད། དེ་རྗེས་ཟབ་ཕུ་ལུང་སོགས་གནས་རི་ཁྲོད་ངེས་མེད་དུ་བྱོན་ཏེ། ཚེ་བློས་བཏང་གི་སྒོ་ནས་སྒྲུབ་པ་ཁོ་ན་ལ་གཞོལ། བལ་ཡུལ་མཆོད་རྟེན། རང་བྱོན་འཕགས་པ་ཝ་ཏི་བཟང་པོ། བྱམས་སྤྲིན་གཙུག་ལག་ཁང་སོགས་གནས་མཇལ་དང༌། ལ་ཕྱི་ཆུ་དབར། ཆོས་གླིང་གཡུ་བྲག །བྲག་དཀར་རྟ་སོ། རྩྭའི་རྐང་ཚུགས་ཕུག །ལྷོ་བྲག་མཁར་ཆུ་སོགས་ལ་བྱོན་བཞུགས་མཛད་ཅིང༌། དེ་དག་གི་སྐབས་སུ་དཀའ་ཐུབ་བཅུད་ལེན་གྱི་སྒོ་ནས་སྙིང་རུས་དང་དཀའ་སྤྱད་མཐར་ཕྱིན་པར་མཛད་པས། གྲུབ་པ་བརྙེས་པའི་རྟགས་སུ་གཞན་སྣང་ཟིལ་གྱིས་གནོན་ནས་བློ་སྣ་ཆོས་སུ་སྒྱུར་ནུས་པ། རྨི་ལམ་དང་འོད་གསལ་ཟིན་པ་སོགས་ངོ་མཚར་ཅན་མང་དུ་མཆིས། ཁྱད་པར་ཟླ་བ་བཅུ་གཉིས་པའི་ནང༌།…