དོན་བརྒྱུད་འབྲུག་པའི་སྐབས།

ལྷ་རི་ཁ་བ་ཆོས་རྗེ་ནམ་མཁའ་བཟང་པོ་དང་གྲ་ཕུ་བ་སྐྱེས་མཆོག་སྨོན་ལམ་པའི་རྣམ་ཐར།

ལྷ་རི་ཁ་བ་ཆོས་རྗེ་ནམ་མཁའ་བཟང་པོ་དང༌། གྲ་ཕུ་བ་སྐྱེས་མཆོག་སྨོན་ལམ་པར་གྲགས་པ་གཉིས་ནི། ཆོས་རྗེ་ཤེས་རབ་དཔལ་ལས་རྟོགས་པ་ཐོབ། གཞན་ཆོས་ཀྱིས་འབྲེལ་བའི་བླ་མ་ནི་ཤིན་ཏུ་མང༌། བྱེ་བྲག་ཏུ་ཆོས་རྗེ་ཤེས་རབ་དཔལ་བས་ཕུ་བོ་ཤི་བའི་ཤུལ་ན་གསེར་མང་པོ་ཡོད་པར། ཉིན་གཅིག་དོལ་མདར་བསོད་སྙོམས་པ་བྱུང་ངོ་ཅོག་ལ་བཞི་ནམ་རེ་བཀྱེས། ལྷག་མ་གསེར་མང་པོ་ཡོད་པ་ནམ་མཁའ་བཟང་པོ་ལ་བསྐུར་ནས་སྒོམ་ཆེན་པ་སྒྲུབ་རྒྱགས་མེད་པ་དང༌། མཚན་ཉིད་པ་སློབ་གཉེར་གྱི་རྒྱགས་མེད་པ་རྣམས་ལ་དུམ་རེ་ཕུལ། བླ་མ་བཟང་པོ་རྣམས་ལ་འབྱོར་བ་ཆེ་ཡང་གསེར་འབུལ་བ་གྱིས་གསུངས་པས། གསུང་བཞིན་བསྒྲུབས་ཏེ། སྐྱི་ཤོད་ནས་ས་སྐྱའི་བར་གྱི་བླ་མ་རྣམས་ལ་གསེར་ཕུལ་ཞིང་གདམས་པ་ཞུས་པས། བླ་མ་དང་གདམས་པ་ཤིན་ཏུ་མང༌། ཆོས་རྗེ་ནམ་མཁའ་བཟང་པོ་བས་དང་པོར་གླང་ལུང་བཏབ། ཕྱིས་ཆབ་ཚན་ཁར་བླ་མའི་གདན་ས་མཛད། སྐྱེས་མཆོག་སྨོན་ལམ་པས་མུ་ཏིག་བཏབ། རྣམ་པ་གཉིས་ཀས་ཆོས་དོན་དུ་གཉེར་བའི་སློབ་མ་མང་དུ་བསྐྱངས། ལྷོ་བྲག་ཚུན་གཡོར་ཕྱོགས་འབྲོག་དང་བཅས་པར་འབྲུག་པའི་བསྟན་པ་གཟུང་བ་ཡིན་ནོ། །སྐྱེས་མཆོག་པའི་སློབ་མ་ལ་རྫ་སྣ་བ། རྒྱལ་དབང་རྗེས་ལུང་མང་བར་མཚན་གསོལ་བ་དེས། སྒྲུབ་སྐོར་གྱི་བཀའ་ལུང་ལའང་ཕན་ཤིན་ཏུ་ཐོགས་སོ། །དེ་དག་ལ་སོགས་པ་ཉིས་སྟོང་བརྒྱད་བརྒྱའི་སློབ་བརྒྱུད་ལ་བུ་ཆུང་བརྒྱུད། བུ་ཆེན་དང་བུ་ཆུང་བརྒྱུད་པ་དེ་གཉིས་ཀ་བསྡོམས་པ་ལ་བར་འབྲུག་ཅེས་གྲགས་ཤིང༌། བར་འབྲུག་ཉི་ཟེར་གྱི་རྡུལ་ཞེས་མང་བའི་དཔེར་གླེང་ངོ༌། ། འདིར་སྨྲས་པ། ཐ་སྙད་ཚིག་ལོའི་སྤྲིན་པས་མ་བསྒྲིབས་པར། ། ངེས་དོན་སྙིང་པོའི་བསྟན་པ་ཉིན་བྱེད་དབང༌། ། གངས་ཅན་ཤར་རིའི་ཕྲག་ཏུ་འཕགས་པ་ལས། ། མཛད་ཕྲིན་འོད་སྟོང་འཛམ་གླིང་ཁྱབ་ཅིང་འབར། །   ཞེས་དོན་བརྒྱུད་དཔལ་ལྡན་འབྲུག་པའི་མཁས་གྲུབ་བླ་མ་རྒྱ་མཚོའི་རྣམ་ཐར་ལེགས་བཤད་ནོར་བུའི་གཏེར་མཛོད་ཀྱི་འབྲུག་ལུགས་བླ་མ་བརྒྱུད་པའི་རྣམ་ཐར་དངོས་བསྟན་པ་ལས། ཆོས་རྗེ་གཙང་པ་རྒྱ་རས་པ་ཆེན་པོ་ཡབ་སྲས་ལས་བརྒྱུད་པའི་བར་འབྲུག་གི་སྐབས་ཏེ་གསུམ་པའོ།། །།

ཆོས་རྗེ་ཛ་སྤོ་བ་ཤེས་རབ་དཔལ་གྱི་རྣམ་ཐར།

ཆོས་རྗེ་རྫ་སྤོ་བ་ཤེས་རབ་དཔལ་ནི། རྐྱང་ཆེན་སྤྲུལ་སྐུའི་དབོན་པོ། རྐྱང་ཆེན་ནང་སོའི་ཞབས་ཏོག་དང་ལས་ཀ་བྱེད་བཞིན་པ་ལ། ཆོས་མ་བྱས་ན་ད་ལྟའི་སྤྱོད་པ་འདིས་མི་འོང་པ་འདུག་དགོངས་ནས། སྤྲུལ་སྐུ་ལ་གདམས་པ་ཞུས་ཏེ། རི་བོའི་ཕུ་འཁྱག་པ་དཀར་མོར་ཐུགས་དམ་མཛད། ཁོང་རང་གི་ཕུ་བོ་དབོན་རིན་གྲུབ་ཀྱིས་རྒྱགས་སྐྱེལ་གྱིན་ཡོད་པ་ལ། ལན་གཅིག་རྒྱགས་ཟད་པས་རྐྱང་ཆེན་དུ་ལེན་དུ་བྱོན་པས། དབོན་པོ་རིན་གྲུབ་ན་རེ། རྒྱགས་སྐྱེལ་སོང་ཡོད་པ་ལ་ལམ་དུ་མ་མཇལ་ལམ་ཟེར། དེར་ལོག་བྱོན་པས་སུ་ཡང་མ་བྱུང་འདུག་པར། ད་ཁྱོད་ལ་མི་རེའོ་སྙམ་ཐུགས་ཐག་ཆོད་དེ། རྒྱལ་ཁམས་ལ་བྱོན། ཡབ་ཏུ་སྐྱེས་མཆོག་བསམ་གཏན་དཔལ་བར་མཇལ། ཐེངས་ཤིག་ཆོས་གསུངས་པའི་ཆོས་ཁྲིའི་འཁྲིས་སུ་བཞུགས་པས། སྐྱེས་མཆོག་པས་ཁོང་གི་དབུ་སྐྲ་ནས་འཐེན་འཐེན་མཛད། སྤྱན་ནམ་མཁའ་ལ་གཟིགས་ཀྱི་འདུག་པས། ཁོང་གིས་ཀྱང་གཟིགས་པ་ན། དམ་པ་སངས་རྒྱས་སྐུ་གཟི་བརྗིད་དང་ལྡན་པ་ཞིག་གཟིགས། དེ་ལྟར་སྐྱེས་མཆོག་པ་དང༌། སྔོན་པོ་ཡོན་རྡོར་བ་ལའང་གདམས་པ་གསན། ལྷ་ལུང་དུ་བྱོན་ནས་རིག་པའི་འབྲུག་སྒྲ་ལ་ཆོས་ཞུས། ཀོང་པོར་བྱོན་ནས་ཆོས་རྗེ་མཁའ་སྤྱོད་པ་ལ་གདམས་པ་མང་དུ་གསན། སྤོ་བོར་བྱོན་པའི་ཚེ་ཕྱག་ཕྱི་ཡང་མཛད། དེ་ལ་སོགས་པའི་བླ་མ་རྣམས་ལས་གདམས་པ་ཐོབ་ནས། གཞུང་གི་གྱུ་ར་དམར་རྩེར་སྒྲུབ་པ་མཛད། དེ་རྟིང་རྫ་སྤོར་ཡུན་རིང་དུ་བཞུགས་པས་ཆོས་རྗེ་རྫ་སྤོ་བར་གྲགས། དེ་ནས་ཆབ་ཚན་ཁར་བྱོན་ནས་དེའི་མན་ཁང་དུ་བཞུགས། དེ་རྗེས་ཆུ་ཚན་ཁའི་མཁར་དེ་ལ་བཞུགས། ཞལ་དཀར་མཛད་ནས་མཐོ་དམན་ཐམས་ཅད་ལ་ཞལ་སྟོན། གསོལ་རྒྱུར་ཟྭ་དང་སྔོ་ཚོད་ཀྱི་ཚོད་མ་མ་བཏབ་དགུ་བཏབ་པ་དང༌། རྒྱབ་མདུན་གྱི་གསང་རྫས་གཉིས་ཀ་ལ་འགྱེད་མོ་ཆེ་མཛད། སྐུ་ཚེའང་རིང་དུ་བཞུགས། ཕྱག་ཏུ་བྱུང་བའི་དངོས་པོ་རྣམས་གྲྭ་ས་སོ་སོར་དགེ་འདུན་ལ་འབུལ། གྲུབ་ཐོབ་ཆེན་པོར་གྲགས་སོ། །དེ་ལ་ཆོས་རྗེ་ནམ་མཁའ་བཟང་པོ། སྐྱེས་མཆོག་སྨོན་ལམ་དཔལ་བ། འཇམ་དབྱངས་པ་སོགས་སློབ་མ་མང་པོ་བྱུང་ངོ༌། །

རས་པ་གསུམ་ལས་ལི་རས་དང་གཡག་རས་ཀྱི་རྣམ་ཐར།

རས་པ་གསུམ་ལས། ལི་རས་ལ་སྒྲོ་སྟོན་སོགས་སློབ་མ་ལེགས་པར་བྱུང་ངོ༌། །གཡག་རས་ཀྱིས་ཞུས་ལན་དུ་ཆོས་རྗེས་བཀའ་དྲིན་བཅུ་གཅིག་མའི་འགྲེལ་བ་མཛད། དེའི་སློབ་མ་ལ་སྟོད་པ་བདེ་མཆོག་སངས་རྒྱས། དེའི་སློབ་མ་སྤྲུལ་སྐུ་ཡེ་ཤེས། དེའི་སློབ་མ་རྫ་རི་རས་པ། དེའི་སློབ་མ་རྫ་སྤོ་བ་ཤེས་རབ་དཔལ་ལོ། །བདེ་མཆོག་སངས་རྒྱས་ཀྱི་སློབ་མ་རྫ་རི་རས་པ་ཤེས་རབ་དཔལ། དེའི་སློབ་མ་རྐྱང་ཆེན་རས་པ་གཞོན་ནུ་བསོད་ནམས། དེའི་སློབ་མ་དབོན་པོ་དབང་ཕྱུག་གཞོན་ནུ། དེའི་སློབ་མ་མཁས་བཙུན་དོན་གྲུབ་གཞོན་ནུ། དེའི་སློབ་མ་ཆོས་རྗེ་ཤེས་རབ་དཔལ་ཟེར་བའང་འདུག་གོ། །

ཆོས་རྗེ་གཙང་པ་རྒྱལ་རས་ཡེ་ཤེས་རྡོ་རྗེའི་རྣམ་ཐར།

༈ ཆོས་རྗེ་གཙང་པ་རྒྱ་རས་ཡེ་ཤེས་རྡོ་རྗེ་ནི། མྱང་སྟོད་ཁུ་ལེའི་ཆར་རྒྱའི་གྱད་རིགས་སུ། ཡབ་ཟུར་སོ་ཚབ་པེ་དང༌། ཡུམ་མར་བཟའ་དར་སྐྱིད་ཟུང་གི་སྲས་སུ་རབ་བྱུང་གསུམ་པའི་ལྕགས་སྦྲུལ་༼༡༡༦༡༽ལོར་འབྲོག་སྡེ་ཞིག་གི་ཁྱིམ་དུ་བལྟམས། སྐྱས་དང་ཐུག་ནས། བཟའ་མི་བྱིན་འགྲོ་ཚར་བས་ཡུམ་དངངས་ཏེ་སྦྲ་ཤུལ་དེར་བོར་ནས་སོང་བས། སླར་ཇི་ལྟར་འདུག་བལྟ་བར་ཇོ་ཇོ་འོང་པ་ན། གྲོད་པ་སྒོར་མོ་ཞིག་རྒོད་གཅིག་གི་གཤོག་པས་བཀབ་ནས་འདུག་པ་འཕུར་སོང་བས། ཁྱེའུ་ཡིད་དུ་འོང་བ་ཞིག་འདུག་པ་ཁྱེར་ནས་གསོས་པས། ཆེར་སྐྱེས་ནས་བག་ཆགས་བཟང་བ་ཞིག་བྱུང༌། མཁར་ལུང་པ་སོགས་ལ་ཐོས་པ་སྦྱངས་སུ་བཅུག་པས་མཁས་པའི་ཕུལ་དུ་གྱུར། མཚན་ཉིད་ཀྱི་གྲྭ་སྐོར་མཛད་པས། སྟོན་བཟང་གི་གྲགས་པ་ཐོན། ཉེར་གསུམ་ན་གྲུབ་ཐོབ་གླིང་གི་དྲུང་སྣ་ཕུར་བྱོན། ཁྲིད་གདམས་ངག་ཞུས་ནས་བསྒོམས་པས་ཏིང་ངེ་འཛིན་གསལ་སྟོང་ནམ་མཁའ་ལྟ་བུ་ལ་འབྱམས་འགྲོ་བ་དང༌། རྫུ་འཕྲུལ་ཡ་མ་ཟུང་སྟོན་ནུས་པ་བྱུང་ནས་བླ་མ་ལ་ཡང་འདི་ལས་ལྷག་པ་མེད་དམ་སྙམ་ནས། ཞུས་པས། བུ་དེ་ཀུན་ཉམས་ཡིན། རྟོགས་པ་གཤའ་མ་ཞིག་ལོ་ལྔ་ནས་འབྱུང་གསུངས། སྤྱིར་སྣ་ཕུར་ལོ་བཞིར་བཞུགས། རྔོག་རྡོ་རྗེ་སེང་གེ་ལ་དགྱེས་གདན་ཡ་གསུམ་གསན། ཉེར་བརྒྱད་ས་སྤྲེལ་ལོར་རྗེ་གླིང་རས་གཤེགས་པས་འདད་དང་གདུང་ཁང་བཞེངས་པ་སོགས་མཛད། ལོ་དེའི་དགུན་ལ་མཁར་ཆུར་བྱོན་ནས། ལྕགས་ཕུར་ཅན་དུ་འདག་སྦྱར་གྱིས་ཐུགས་དམ་ལ་རྩེ་གཅིག་ཏུ་བཞུགས་པ་ན། འཚོ་བ་ཤིན་ཏུ་བཀྲེན་པས་སྐུའི་མདངས་སྟོབས་ཤོར། དེའི་སྟེང་དུ་ཁམས་འདུས་པ་ཞིག་ལངས་པ་ཇེ་ཐུ་ནས་ལོ་གསུམ་ལ་མ་དྲག །ལོ་གསུམ་པ་ན་སྣང་སྲིད་ཀྱི་ལྷ་འདྲེ་མ་ཚོགས་པ་མེད་པའི་དམག་གིས་བསྐོར་ནས་མཚོན་ཆ་སྣ་ཚོགས་འཕེན་ཅིང་རྒྱོབ་ཅིག །སོད་ཅིག་ཟེར་བ་དང༌། ས་ཐམས་ཅད་གཡོ་ཞིང་འགུལ་བ་དང༌། རེས་འགའ་རི་ཀླུང་ནགས་ཚལ་ཐམས་ཅད་བགད། སྐབས་རེ་ན་བྲག་རི་དེ་ཉིལ་ལི་ལི་ཞིག་འགྲོ་བ་སོགས་བྱུང་ཞིང༌། རང་གི་ཆོས་སྐྱོང་དཔལ་མགོན་དཔོན་བློན་ཡུམ་བཅས་རྣམས་ཀྱང་དགྲར་ལངས་ཏེ། དེ་དག་གི་རྒྱབ་རྟེན་ལྟ་བུར་འདུག་པ་གཟིགས་རུང༌། ཉམ་ང་མེད་པར་རི་བཙུགས་པ་བཞིན་དུ་བཞུགས་པས། མ་ཚུགས་པ་ན་དེ་རྣམས་བྱེར་ཏེ། བདུད་ཀྱི་བུ་མོ་ལུས་ཕྲ་ཞིང་ལྡེམ་ལ་མཛེས་པ། ནུ་འབུར་རྒྱས་ཤིང༌། ཁ་བཞིན་ཟླ་བ་ཉ་བ་ལྟར་རྒྱས་འཛུམ་ཡིད་དུ་འོང་བ། རྒྱན་གོས་བཟང་པོས་སྤྲས་པ་ཞིག་བྱུང་ནས།…

གྲུབ་ཐོབ་གླིང་རས་པདྨ་རྡོ་རྗེའི་རྣམ་ཐར།

ཆོས་ཉིད་མཁའ་ལ་དབང་བསྒྱུར་གླིང་ཆེན་རས། །           ངེས་དོན་བསྟན་པའི་ཉིན་བྱེད་གཙང་པ་རྒྱ། །           བརྒྱུད་འཛིན་ཉི་ཟེར་རྡུལ་ལྟར་འོད་འབར་བས། །           བསྟན་པ་འཛམ་གླིང་ཁྱབ་མཛད་རྣམས་ལ་འདུད། །   ༈ དཔལ་ལྡན་འབྲུག་པ་ཆེན་པོའི་དབུའི་རིགས་བདག །གངས་ཅན་ལྗོངས་ཀྱི་ས་ར་ཧ། རྗེ་གྲུབ་པའི་དབང་ཕྱུག་གླིང་རས་པདྨ་རྡོ་རྗེའི་རྣམ་ཐར་མདོར་བསྡུས་ནི། མྱང་སྟོད་གླིང་སྨད་བཞེངས་ཀྱི་གླང་པོ་སྣར། ཡབ་རྒྱལ་པོ་སྐྱབ་བེ་དང༌། ཡུམ་གཟུས་མོ་དར་ཆུང་གི་སྲས་སུ་རབ་བྱུང་གཉིས་པའི་ས་སྤྲེལ་༼༡༡༢༨༽ལོར་སྐུ་འཁྲུངས། མཚན་པདྨ་རྡོ་རྗེར་གསོལ། གཞོན་ནུ་ནས་བྲིས་ཀློག་མཁས་པར་མཁྱེན། བརྒྱད་པ་ལ་ལྷ་རྗེ་རས་སྨན་ལས་སྨན་བསླབས་པས། བཅུ་གསུམ་ལོན་ཚེ་མཁས་པར་གྱུར། བཅུ་བདུན་པ་ལ་ཁུ་བོ་དགེ་བའི་བཤེས་གཉེན་གླིང་ཞེས་པ་བཀའ་གདམས་པ་ཆེན་པོ་དེ་ལ་དགེ་བསྙེན་མཛད། དཔལ་དབྱངས་ཀྱི་སྒྲོན་མེ་རྣམ་དྲུག་སོགས་མང་དུ་གསན། དབུས་པ་ཞང་བྱ་བ་རྭ་དང་དཔྱལ་གཉིས་ཀའི་སློབ་མ་ཞིག་ལ་ཕག་མོ་དང༌། རྭ་འབུམ་སེང་ལ་དུས་འཁོར། བདེ་མཆོག །འཇིགས་བྱེད་སོགས་རྭ་པའི་སྐོར་ཞིབ་མོ་གསན། མཐུ་ཆེ་བར་གྲགས་ཤིང༌། ཇོ་མོ་སྨན་མོ་བྱ་བ་ཁབ་ཏུ་བཞེས། ཕྱིས་འོམ་ཐང་པ་ལ་རབ་ཏུ་བྱུང་ནས་བསོད་སྙོམས་ལ་བྱོན་པས་སྨན་མོས་བྲིད་ནས། བསླབ་པ་ལས་ཉམས་པ་ནི་སྔོན་གྱི་ལས་འཕྲོ་ལྷག་མ་ལུས་པའི་ཚུལ་བསྟན་པའོ། །དེ་ནས་ཁྱུང་ཚང་པའི་དྲུང་དུ་བྱོན། གཞན་ཡང་ལོ་སུམ་གཉིས་དང༌། བྱེས་འགོལ་བ་སོགས་བསྟེན། རས་ཆུང་པའི་གདམས་ངག་ཐམས་ཅད་ཁ་ཚང་བར་ཐོབ་པས་ད་ལྟར་འཛམ་བུའི་གླིང་ན་གདམས་པ་ང་རང་ཆེ་སྙམ་པ་འཁྲུངས། རྩ་རླུང་ལ་དབང་ཐོབ། དེ་ཡང་གླིང་ལ་ཡ་མཚན་ཅན་གྱི་གཏམ་ལྔར་གྲགས་པའི་དང་པོ་ནི། མདོ་སྡེ་དཀོན་མཆོག་བརྩེགས་པ་གཟིགས་པས། སྔོན་སངས་རྒྱས་ལོག་པར་དད་སེལ་གྱི་བསྟན་པ་ལ་དགེ་སློང་དྲུག་ཅུས་བྱང་ཆུབ་སེམས་དཔའི་དགེ་སློང་གཉིས་ལ་ཕྲག་དོག་གིས་འཁྲིག་པའི་ཆོས་ཀྱི་སྐུར་པ་བཏབ་པས། ཡུན་རིང་ངན་འགྲོའི་སྡུག་བསྔལ་མྱང༌། ཤཱཀྱ་ཐུབ་པའི་དྲུང་དུ་མིར་གྱུར་ནས་ལས་ཀྱི་སྒྲིབ་པ་སྦྱངས་ནས་ལྔ་བརྒྱ་ཐ་མ་ལ་ལས་ཀྱི་སྒྲིབ་པ་རྒྱུན་ཆད་པར་ལུང་བསྟན་པའི་ནང་ནས། དེ་དག་གི་འདྲེན་པར་འོས་པ་བྱང་ཆུབ་སེམས་དཔའ་བརྩོན་འགྲུས་འོད་བྱ་བ་ཡིན་པར་གཟིགས། དེའི་ལས་ཀྱི་ལྷག་མས་ད་ལྟའང་ཚུལ་ཁྲིམས་ལ་སྐྱོན་བྱུང་བའི་ཚུལ་བསྟན་པའོ། །གཉིས་པ་ནི།…