སྤྱན་སྔ་རིན་ཆེན་དཔལ་གྱི་རྣམ་ཐར།

༈ ཡང་དགོན་པའི་སློབ་མའི་མཆོག་སྤྱན་སྔ་རིན་ཆེན་ལྡན་ནི། དིང་རི་གླང་འཁོར་དུ་ཡབ་ཡུམ་བསགས་པ་ཅན་གྱི་སྲས་སུ་༼༡༢༠༢༽རབ་བྱུང་གསུམ་པའི་ཆུ་ཁྱི་ལོར་འཁྲུངས། ལོ་ལྔ་དྲུག་ལོན་དུས་སུ་གླང་འཁོར་གྱི་སྐུ་གདུང་ག་རུ་ལ་སོགས་དང་མཇལ། སྙིང་ནས་ཆོས་བྱེད་པའི་ཞེན་ལོག་དེ་དུས་རང་ནས་སྐྱེས། དེར་རི་པ་འགའ་ཞིག་གིས་ལྷ་གདོང་ན་སྤྲུལ་པའི་སྐུ་བཞུགས་པའི་བསྔགས་པ་བརྗོད་པས་ཤིན་ཏུ་དད། ཕྱིས་ཆོས་རྗེ་ཡང་དགོན་པ་ལོ་ལྔ་བཞེས་པ་དིང་རིར་བཞུགས་པ་དང་མཇལ། མོས་གུས་ཐུན་མོང་མིན་པ་འཁྲུངས། ཏིང་ངེ་འཛིན་ཡང་རྩོལ་མེད་དུ་སྐྱེས། ཆོས་འབྲེལ་ཞུས་པས་བླ་མའི་རྣལ་འབྱོར་དང༌། ཕྱག་རྒྱ་ཆེན་པོ་ཡི་གེ་བཞི་པ་གནང༌། ཕ་ཇོ་སྟོན་པ་ལ་འབྲི་ཀློག་ལ་སོགས་པ་བསླབས་ཤིང་གསན་པ་མང་དུ་མཛད། དེ་ནས་ཡང་དགོན་པ་ཆོས་རྗེ་ཀོ་བྲག་པའི་དྲུང་དུ་དགུང་ལོ་བཅུ་གཅིག་ལོན་པ་ཞིག་བྱོན་པ་དང་མཇལ་ནས་མོས་གུས་དཔག་མེད་སྐྱེས། ངའི་ཕྱི་ལ་ཕྱིན་པས་ཆོག་གསུང་སྟེ་ཕྱག་ཕྱིར་འབྲངས་ནས་ཞི་བར་གཤེགས་ཀྱི་བར་ལོ་སུམ་ཅུ་རྩ་ལྔ་ཙམ་ལ་སྤྱན་སྔར་བཞུགས་པས་སྤྱན་སྔ་ཞེས་གྲགས། ཆོས་རྗེ་ལ་བཞུགས་པའི་གསར་རྙིང་གི་དབང་གདམས་ངག་ལུང་ལ་སོགས་པ་ཐམས་ཅད་གསན། ཆོས་ཀྱི་བདག་པོ་གྱིས་གསུང༌། བླ་མས་ཅི་གསུང་ཐུགས་ལ་གསལ་བས། རི་ཆོས་སྐོར་གསུམ་གྱི་ལྷན་ཐབས། ཀླད་དོན། ཁོག་དོན། བརྡའ་འགྲོལ། མ་དྲུག་ལ་སོགས་པ་དང༌། རྗེ་ཉིད་ཀྱི་རྣམ་མགུར་དང་བཀའ་འབུམ་རྣམས་ཡི་གེར་བཀོད་པས་ཕྱི་རབས་རྣམས་ལ་སྐུ་དྲིན་བསམ་གྱིས་མི་ཁྱབ། ཆོས་རྗེ་ཀོ་བྲག་པའི་དྲུང་དུ་ཐབས་ལམ་སྐོར་སོགས་ཞུས། རྗེ་རྒོད་ཚང་པ་ལ་འབྲུག་སྐོར་ཐམས་ཅད་གསན། ས་པཎ་ལ་ས་སྐྱའི་ཆོས་སྐོར་དང༌། རྗེ་སྤྱན་སྔ་ལ་འབྲི་གུང་པའི་ཆོས་སྐོར་རྣམས་གསན། གཞན་ཡང་བླ་མ་བཟང་དགུ་ལ་གཏུགས་ནས་གདམས་པ་ཟབ་དགུ་ཉན། ལྷ་གདོང༌། རྒྱལ་གྱི་ཤྲཱི། གྲི་ལྕམ། བུ་ལེ། ལྕགས་ངུར་ལ་སོགས་པའི་གནས་ཆེན་རི་ཁྲོད་ཐམས་ཅད་དུ་སྒྲུབ་པའི་རྒྱལ་མཚན་བཙུགས། གནས་ལུགས་ཀྱི་རྟོགས་པ་ཤར། ཐབས་ལམ་གྱི་ཡོན་ཏན་ཆུ་ལ་མི་བྱིང་བ་དང༌། རླུང་སོར་མོ་རྩེར་སོགས་པ་གར་འདོད་དུ་འདྲོངས་པ་དང༌། ཉི་མ་ཕྱེད་གོང་ཙམ་ལ་རླུང་རེ་རེས་འདའ་བ་ལ་སོགས་མངའ། ཕྱིས་དིང་རིར་བཞུགས་ནས་ཚོགས་པ་མཐའ་ཡས་པ་བསྐྱངས་པས། ཀུན་མཁྱེན་ཟུར་ཕུག་པ། གྲུབ་ཐོབ་ཉི་མ་མགོན། མཁན་ཆེན་ཆོས་སྡིངས་བ། གཉོས་སྟོན་དཀོན་མཆོག་རིན་ཆེན། བྱ་བཏང་དབང་རིན་ལ་སོགས་པའི་རྟོགས་ལྡན་གྱི་སློབ་མ་མང་དུ་ཐོན། མཐར་སྐུ་མྱ་ངན་ལས་འདའ་ཁར། འདུས་བྱས་ཐམས་ཅད་མི་རྟག་པས། །བདག་ཀྱང་བེམ་རིག་འབྲལ་ཚུལ་སྟོན། །དུས་གསུམ་སངས་རྒྱས་ཐམས་ཅད་དང༌། །བདག་གི་སེམས་ལ་ཐ་དད་མེད། །ཅེས་སོགས་ཞལ་ཏ་མང་དུ་བྱོན་ཏེ། ངོ་མཚར་བའི་རྟགས་དཔག་ཏུ་མེད་པ་བཅས་གཤེགས་སོ། །