ལྷ་སྡིངས་རབ་འབྱམས་པའི་རྣམ་ཐར།

༈ ཀུན་མཁྱེན་དངོས་སློབ་ལྷ་སྡིངས་རབ་འབྱམས་པ་ནི། ཐོག་མར་གསེར་མདོག་ཅན་དུ་མདོ་ཕྱོགས་ཀྱི་གསན་པ་མཐར་ཕྱིན། འཛིན་རམ་ནམ་མཁའ་རྦད་གཅོད་བསྟེན་ནས་བཀའ་འགྱུར་གྱི་ལུང་བཞུགས། དབང་ཁྲིད་གདམས་པ་མཐའ་དག་ཐམས་ཅད་མཁྱེན་པ་ཆེན་པོ་ལ་གསན། གངས་ཏི་སེའི་རྡོར་འཛིན་དུ་རབ་བྱུང་དགུ་པའི་མེ་སྦྲུལ་༼༡༥༥༧༽ལོར་བསྐོས། དེར་སྤུ་རངས་རྒྱལ་པོ་སྨོན་ལམ་གྲུབ་དང༌། མོན་རྒྱལ་པོ་རྣམས་ཀྱི་བླ་མར་གྱུར། ཁ་ཆར་གྱི་གཙུག་ལག་ཁང་གི་བདག་མཛད་པས་ལོ་ཆེན་རིན་ཆེན་བཟང་པོའི་ཁྲི་ཐོག་ཏུ་ཐོན། རྡོ་རྗེ་འཛིན་པ་མདོ་སྔགས་རབ་འབྱམས་པར་གྲགས། ཕྲིན་ལས་ཤིན་ཏུ་ཆེའོ། །