རྟོག་ལྡན་ཤེས་རབ་མགོན་པོའི་རྣམ་ཐར།

༈ ཟུར་ཕུག་པའི་སློབ་མ་རྟོགས་ལྡན་ཤེས་རབ་མགོན་པོ་ནི། ལ་སྟོད་པ། གདུང་གཡུང༌། ཡབ་སངས་རྒྱས་སྐྱབས་དང༌། ཡུམ་མྱང་མོ་དཔལ་ལྡན་འབུམ་ལས་ལྷ་གདོང་དགོན་པར་འཁྲུངས། དགུང་ལོ་བཞི་པ་ལ་དགོན་གསར་བའི་དྲུང་དུ་དགེ་བསྙེན་གྱི་སྡོམ་པ་བླངས། ན་བཟའ་སེར་མོ་མཛད། བྲིས་ཀློག་ཆོག་ཕྲིན་ཀྱང་བསླབས། དགུང་ལོ་བཅུ་དགུ་པ་ལ་ཟུར་ཕུག་པ་དང༌། མཁན་ཆེན་བསོད་གཞོན་པ་ལས་བསྙེན་རྫོགས་མཛད། དེབ་སྔོན་ལས། དགུང་ལོ་བཅུ་བདུན་པ་ལ་ལྷ་གདོང་པ་ལ་གཏུགས་ཞེས་གསུངས་ཀྱང༌། ཡང་དགོན་པ་ལས་གཞན་ཞིག་ཡིན་ན་མ་གཏོགས་ཟུག་ཕུག་པ་ལས་བསྙེན་པར་རྫོགས་པར་བཤད་པས་དུས་མི་འགྲིག །རིན་པོ་ཆེ་རྒྱལ་མཚན་འབུམ། བླ་མ་སངས་རྒྱས་དབོན། ཟུར་ཕུག་པ། མཁན་ཆེན་ཆོས་སྡིངས་པ། དྲོད་ཆུང་བ། བླ་མ་རིན་ཆེན་མགོན། བླ་མ་དར་མ་བཟང་པོ། མཁས་གྲུབ་ཁྲ་བ་སྤྲུལ་སྐུ་གྲུབ་ཆེན་པ། མཁས་བཙུན་བསོད་ནམས་འོད་ཟེར། གྲུབ་ཐོབ་འདམ་ཞིག །བླ་མ་རིན་ཆེན་རྫོགས་པ། བླ་མ་ཤེས་རབ་དར། བླ་མ་སྤང་དཀར་བ། རྟོགས་ལྡན་ན་ཁྲ་བ། རྟོགས་ལྡན་ཤག་ཤང་རྣམས་ལས་གསན་པ་མང་དུ་མཛད་ནས། ཤྲཱིར་འདག་སྦྱར་ལོ་བདུན་མཛད་པའི་ཚེ། རྟོགས་པ་ལོ་བཅུ་བདུན་ནས་འཁྲུངས་ཀྱང་བོགས་ཆེར་མ་ཐོན། དེ་ལྟ་བུའི་རྟོགས་ལྡན་ཆེན་པོ་དེ་དབུས་ཕྱོགས་སུ་བྱོན། ཀརྨ་པ་རང་བྱུང་རྡོ་རྗེ་དང༌། རིག་འཛིན་གཞོན་ནུ་རྒྱལ་པོ་སོགས་བླ་མ་དུ་མར་བསྟེན། ཤམ་པོ་དང་གསལ་རྗེ་གངས་ལ་སོགས་པའི་དབེན་པ་རྣམས་སུ་བཞུགས། ཀོང་པོ་ཡན་ཆད་དུ་འགྲོ་བའི་དོན་རྒྱ་ཆེན་པོ་མཛད། འདིས་བཀའ་བརྒྱུད་ཀྱི་བླ་མ་རྣམས་ཀྱི་རྣམ་ཐར་ཡང་མཛད། གཞན་ལ་ཕན་གདགས་པའི་གསུང་རབ་ཀྱང་འགའ་ཞིག་བཀོད། འདི་ལ་བླ་ཆེན་རིན་གཞོན་སོགས་སློབ་མ་མང་པོ་བྱོན་པའོ། །

          འདིར་སྨྲས་པ།

གྲངས་མེད་བསྐལ་པའི་མཐའ་རྒྱ་མ་བསྐོར་བར། །

གསེང་ལམ་བླ་མ་བསྙེན་པའི་མན་ངག་ལས། །

རྩོད་དུས་ཚེ་གཅིག་སངས་རྒྱས་སར་སྙེག་པའི། །

བརྒྱུད་པའི་ལམ་མཆོག་འདི་འདྲ་གཞན་ན་དཀོན། །

 

ཞེས་དོན་བརྒྱུད་དཔལ་ལྡན་འབྲུག་པའི་མཁས་གྲུབ་བླ་མ་རྒྱ་མཚོའི་རྣམ་ཐར་ལེགས་བཤད་ནོར་བུའི་གཏེར་མཛོད་ཀྱི་འབྲུག་ལུགས་བླ་མ་བརྒྱུད་པའི་རྣམ་ཐར་དངོས་བསྟན་པ་ལས། རྒྱལ་བ་རྒོད་ཚང་པ་ནས་བརྒྱུད་པའི་སྟོད་འབྲུག་གི་སྐབས་ཏེ་དྲུག་པའོ།། །།