རྒྱལ་སྲས་མི་ཕམ་ཆོས་རྒྱལ་གྱི་རྣམ་ཐར།

༈ དེའི་སྲས་མི་ཕམ་ཆོས་རྒྱལ་ནི། ཡབ་གཅུང་ངག་གི་དབང་ཕྱུག་གྲགས་པ་རྒྱལ་མཚན་དཔལ་བཟང་པོ་དང༌། ཡུམ་ལྷ་གཅིག་དྲུང་དཀར་བྱ་བའི་སྲས་སུ། རབ་བྱུང་དགུ་པའི་ཆུ་ཡོས་༼༡༥༤༣༽ལོར་བལྟམས། རྗེ་ངག་དབང་ཆོས་ཀྱི་རྒྱལ་པོའི་སྤྲུལ་པར་གྲགས། དགུང་ལོ་བདུན་པར། རྒྱལ་དབང་ཀུན་མཁྱེན་ཆེན་པོ་ལ་ཡོངས་རྫོགས་དགེ་བསྙེན་གྱི་སྡོམ་པ་བཞེས། མཚན་མི་ཕམ་ཆོས་ཀྱི་རྒྱལ་པོ་འཇིགས་མེད་གྲགས་པ་ཕྱོགས་ཐམས་ཅད་ལས་རྣམ་པར་རྒྱལ་བའི་དཔལ་བཟང་པོར་གསོལ། རྗེ་དེ་ཉིད་དང་ཡབ་ལས་སྨིན་གྲོལ་གྱི་གདམས་པ་ཡོངས་སུ་རྫོགས་པ་གསན། གཞན་ཡང་རྒྱལ་དབང་གཉིས་པའི་སྲས་དཔལ་ཆེན་རྒྭ་ལོའི་སྤྲུལ་པ་གོང་མ་བསྟན་འཛིན་ནོར་བུ་དང༌། རྡོ་རྗེ་འཛིན་པ་ཆོས་ཀྱི་མགོན་པོ་ལས་བཀའ་ཆོས་མང་པོ་གསན། མོག་པ་ལྷ་རྩེ་དང་སྤོས་སྐྱ་སོགས་སུ་སྐུ་མཚམས་ཡུན་རིང་བཞུགས་སྐབས། གཉེན་འབྲུམ་དང༌། ཤིག་ནད་དང༌། བུག་སྒོ་བརྡུང་བ་སོགས་ལྷོངས་ཀྱི་ཆོ་འཕྲུལ་དུ་མ་བྱུང་ནའང་ལམ་དུ་ཁྱེར་བས། ཐུགས་དམ་ལ་བོགས་ཐོན་ཅིང༌། བླ་མ་ཡི་དམ་མཁའ་འགྲོ་ཆོས་སྲུང་བཅས་ཀྱི་ཞལ་གཟིགས། བཅུ་བདུན་བཞེས་པར་དཔལ་ལྡན་འབྲུག་པའི་གདན་སེང་གེའི་ཁྲིར་ཕེབས། རྗེ་ཉིད་སྐུ་འབྲས་ཤིན་ཏུ་མཚར་བ་དང༌། གསུང་ཚངས་པའི་དབྱངས་ལྟར་སྙན་ཞིང་མཐོ་བས། མི་ཐམས་ཅད་དད་པའི་སྤུ་ལོང་དབང་མེད་དུ་གཡོ་ནུས། རིན་སྤུངས་སྡེ་པ་ངག་དབང་འཇིགས་གྲགས་སོགས་ཆེན་པོ་དུ་མས་ཀྱང་ཞབས་ནས་བཏེགས་ཤིང༌། གང་དུ་ཕེབས་ཀྱང་གཞིས་ལེན་ཞབས་ཏོག་ཕུན་སུམ་ཚོགས། ལྷོ་གནས་ཐིམ་བུ། སྤ་གྲོ། རྡོ་དཀར། གཞན་ཀུ་རུ་ལུང༌། ལྷོ་བྲག །དབུས་གཙང་སྟོད་སྨད་སོགས་ཐམས་ཅད་ཞབས་ཀྱིས་བཅག་ནས། གདུལ་བྱར་གྱུར་པ་རྣམས་སྨིན་གྲོལ་གྱི་ལམ་ལ་འགོད་པར་མཛད། གཙང་པ་སྐུ་མཆེད་དང༌། རིན་སྤུངས། རྒྱང་རྩེ་བྱང་པ་སོགས་སྡེ་སྲིད་རྣམས་ཀྱི་བར་ཆིངས་དང༌། གདན་སར་གཙུག་ལག་ཁང་ཆེན་བཞེངས་པ་སོགས་རྣམ་དཀར་མཛད་རྗེས་ཆེ། དགུང་ལོ་རེ་གཉིས་པ་ཤིང་འབྲུག་༼༡༦༠༤༽ལོར་ཞི་བར་གཤེགས་སོ། །