འཛི་སྒར་གཉིས་པ་དགེ་ལེགས་མཆོག་གྲུབ་བསྟན་འཛིན་གྱི་རྣམ་ཐར།

༈ དེའི་སློབ་མ་འཛི་སྒར་གཉིས་པ་དགེ་ལེགས་མཆོག་གྲུབ་བསྟན་འཛིན་ནི། མདོ་ཁམས་འབྲོག་སྡེ་སྒ་ཡུལ་ཤུལ་ཞེས་པར། གདུང་ལྷ་རྗེ་ཞོ་མགར་ཞེས་བླ་མ་དང་ལྷ་རྗེའི་རྒྱུད་བར་མ་ཆད་པར་བྱུང་བའི་ཡབ་ལྷ་རྗེ་ཨ་སྐྱ་དང༌། ཡུམ་ཀླུ་སྐྱིད་གཉིས་ཀྱི་སྲས་སུ་རབ་བྱུང་བཅུ་གཅིག་པའི་ཆུ་བྱི་༼༡༦༧༢༽ལོར་ནང་སོ་དཀོན་རྒྱལ་སྤྲུལ་སྐུའི་གཅུང་དུ་འཁྲུངས། རྒྱལ་དབང་འབྲུག་པ་མི་ཕམ་དབང་པོའི་ཞལ་སྔ་ནས། ཡབ་ཀྱི་མིང་ལ་ཨ་ཞེས་པ་དང༌། ཡུམ་གྱི་མིང་ཀླུ་ཞེས་བྱ་བ་གཉིས་ཀྱི་སྲས་སུ་འཁྲུངས་ཡོང་ཞེས་ཇི་ལྟར་ལུང་བསྟན་པ་བཞིན་དུ་རྗེ་གོང་མའི་བུ་ཆེན་བླ་མ་ལོ་རི་ཤེས་རབ་རྒྱ་མཚོ་ནས་ངོས་འཛིན་མཛད། མཚན་དགེ་ལེགས་མཆོག་གྲུབ་བསྟན་འཛིན་དཔལ་བཟང་པོ་ཞེས་གསོལ། རྒྱལ་དབང་འབྲུག་པ་ནས་ཆེ་འདོན་གཡེལ་གྲགས་སྔ་ན་མི་དགའ་གསུངས་པ་བཞིན་དགུང་ལོ་བདུན་ཐོག་སྒ་ལོ་རིའི་དགོན་དུ་སྤྱན་དྲངས་ཏེ། རེ་ཞིག་དཀྱུས་མའི་ཚུལ་དུ་བཞུགས་ནས་སྐུ་ཡོན་གསན་སྦྱང་གནང༌། དེ་ནས་བཅུ་གསུམ་བཞེས་ཚེ་བླ་མ་ལོ་རིའི་བཞུགས་གནས་ནམ་མཁའི་སྒང་ཞེས་པ་དེར་ཐོག་མའི་ཆེ་འདོན་མངའ་གསོལ་མཛད། གོང་མའི་སློབ་མ་དབོན་ཀུན་དགའ་རྒྱ་མཚོས་སྤྲུལ་སྐུའི་རྩ་འཛིན་བདག་གཉེར་དེ་ཙམ་མ་མཛད་པར་བརྟེན། བླ་མ་ལོ་ཆོས་ཟུང་རེ་ཐག་ཆོད་དེ་བླ་མ་ཆོས་ལུའི་རང་གནས་འཇོ་ཕག་གྲུའི་ཕུག་གི་གཙུག་ལག་ཁང་དུ་སྤྱན་དྲངས་ཏེ། སེངྒེའི་ཁྲི་ལ་མངའ་གསོལ་ཞིང༌། རང་གི་འདོག་པ་ཐམས་ཅད་ཀུན་ཏུ་བཟང་པོའི་མཆོད་སྤྲིན་དུ་སྤྲུལ་ནས་ཕུལ། དགུང་ལོ་བཅུ་དྲུག་ལ་བླ་མ་ལོ་ཆོས་གཉིས་ཀྱིས་སྒར་ཆས་ཞབས་ཕྱི་འབུལ་རྫས་སོགས་ཀྱི་ཆ་རྐྱེན་སྦྱར་ནས་དབུས་སུ་བྱོན། སྒམ་པོ་ཞབས་དྲུང་བཟང་པོ་རྡོ་རྗེ་ལ་ཡང་ཟབ་དཀོན་མཆོག་སྤྱི་འདུས་ཀྱི་དབང་གསན། བདེ་ཆོས་བླ་མ་ཡབ་སྲས་སོགས་མཇལ་ཞིང་རིམ་པས་བྱར་དུ་ཕེབས། དེར་རྒྱལ་དབང་ཐམས་ཅད་མཁྱེན་ཞབས་མི་ཕམ་དབང་པོའི་ཞལ་མཇལ་ནས། དངོས་འབུལ་རྒྱ་ཆེར་མཛད། གཙུག་ཕུད་ཕུལ་ནས་རབ་ཏུ་བྱུང༌། མཚན་སྔར་ནས་དགེ་ལེགས་མཆོག་གྲུབ་བསྟན་འཛིན་ཞེས་གནང་བར། སླར་ཡང་རྒྱལ་དབང་བསྟན་འཛིན་ཕྲིན་ལས་སུ་གསོལ། རྗེས་གནང་ཉེར་གཉིས་དང༌། དྲག་པོ་ཀཱི་ལ་ཡ་སོགས་ནས་བརྩམས་དབང་ཆོས་རིམ་པར་གསན་ཏེ་ལོ་ཤས་བཞུགས། སླར་ཁམས་སུ་བྱོན། བླ་མ་ཆོས་ལུ་དང་དབོན་ཀུན་དགའ་རྒྱ་མཚོ་གཉིས་ལ་གོང་མ་ནས་བརྒྱུད་པའི་དབང་ཆོས་ཕལ་ཆེར་གསན། འཇོ་ཕུ་དང་བྲག་ལོག་རྣམས་སུ་ཡང་ཤས་རེ་བཞུགས་ཤིང༌། སྐམ་ལུང་དུ་ལོ་མཚམས་དང༌། སྣ་རྡོག་མགོར་ཡང་སྐུ་མཚམས་ཟླ་ཤས་མཛད་དེ། སྙིང་པོའི་སྒྲུབ་པ་ལ་རྩེ་གཅིག་ཏུ་གཞོལ། གྲྭ་འཁོར་གསར་རིགས་རྣམས་ཀྱང་རིམ་པས་འདུས། སྒ་སྟོད་དུ་འབུལ་སྡུད་གནང་བས་ཇ་གསེར་སོགས་གཏོས་ཆེ་བ་བྱུང་བ་རྣམས་བསྣམས་ཏེ། སླར་དབུས་སུ་བྱོན། རྒྱལ་དབང་འབྲུག་པའི་སྤྱན་སྔར་བསྙེན་པར་རྫོགས་ཤིང༌། དབང་རྗེས་གནང་གི་རིམ་པ་དུ་མ་དང༌། ཁྱད་པར་དཔལ་ལྡན་ལྷ་མོའི་དབང་བཞི་ཆིག་བརྒྱུད་མ་གནང་ནས་སླར་སྐུ་སྐྱེ་ཕྱི་མ་གསུམ་བཞིའི་དུས་ཡར་འབུལ་དགོས་གསུངས། གཞན་ཡང་ཆོས་འབྱུང་བསྟན་པའི་པདྨོ་རྒྱས་པའི་ཉིན་བྱེད་ལ་ལྗགས་བཤད་ཞིབ་བཀྲོལ་གྱིས་མཚོན་ཀུན་མཁྱེན་བཀའ་འབུམ་ཡོངས་རྫོགས་ཀྱི་ལུང་ཁྲིད་དང༌། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་ཉམས་ཁྲིད་དུ་གནང་བས། ཐུགས་རྒྱུད་བདེན་འཛིན་གྱི་འཆིང་བ་ལས་རྣམ་པར་གྲོལ་ཏེ། ཆོས་བརྒྱད་མགོ་བོ་སྙོམས་པའི་རྟོགས་པ་བརྙེས། ཙ་རིའི་ཞབས་སྐོར་ལ་ཕེབས་དུས་སུ་ལྟས་ངོ་མཚར་ཅན་དུ་མ་དང་དག་པའི་གཟིགས་སྣང་དཔག་མེད་ཤར། ཁྱད་པར་གསར་མ་ཡང་མཛོད་དུ་འབྱོན་དུས་རྒྱལ་དབང་མཆོག་གིས་དཔོན་སློབ་གཉིས་བྱང་ཆུབ་མ་ཐོབ་བར་དུ་འབྲལ་བ་མེད་པར་ཞལ་གྱིས་བཞེས། སྐུ་ཞབས་སུ་ལོ་ངོ་གསུམ་ཙམ་བཞུགས་ནས། ཁམས་སུ་འབྱོན་ཁར་གདན་མཐོ་བ་ཞིག་ལ་བཞུགས་སུ་བཅུག་ཅིང༌། ཐམས་ཅད་མཁྱེན་པ་ཉིད་ཞལ་ཡར་ཕྱོགས་ནས་བཞུགས་པ་སོགས་མངའ་གསོལ་ཚད་ལས་བརྒལ་བར་མཛད། རྒྱལ་དབང་མཆོག་ལ་ཞལ་སློབ་མང་ཡང་རྟོགས་པ་དོན་གྱི་བཀའ་བབ་ཅིང་ཐུགས་ཀྱི་ཐིག་ལེ་ལྟ་བུ་ནི་འདི་ཉིད་ཡིན་ཏེ། ཐུགས་ཀར་ཕྱག་མཛུབ་ཀྱིས་ནན་ནན་དང་སྦྲགས་ཁམས་པ་བསོད་ནམས་སྤྲུལ་སྐུ་ནི་ང་རང་གི་ཁོག་པའི་སྙིང་འདི་འདྲ་འདྲ་ཡིན། འདི་ལ་ངེས་དོན་གྱི་ཉམས་ལེན་བཟང་པོ་ཡོད་ཅེས་ཡང་ཡང་བཀའ་བསྩལ་པ་དང༌། དཔལ་ལྡན་ལྷ་མོའི་གསང་སྒྲུབ་ཀྱི་དབང་བཞི་ཆིག་བརྒྱུད་མ་ཡང་རྗེ་འདི་ལ་གནང་བའི་ཕྱིར་རོ། །དེ་ནས་ཁམས་སུ་ཕེབས་ཤིང༌། བླ་མ་ལོ་ཆོས་ཟུང་གཤེགས་པའི་ཞུགས་འབུལ་དང་གཟིམས་མལ་སྐུ་འདྲའི་རབ་གནས་སོགས་དགོངས་རྫོགས་རྣམས་ལེགས་པར་བསྒྲུབས། རྗེ་ཁམས་སྤྲུལ་ཀུན་དགའ་བསྟན་འཛིན་ལས། བཀའ་འགྱུར་གྱི་ལུང༌། དབང་རྡོ་རྗེ་འཕྲེང་བ་གསན་ཅིང༌། ཡབ་སྲས་འདི་གཉིས་མཇལ་འཕྲད་ཆེས་མང་ཞིང༌། ཐུགས་ཡིད་གཉིས་སུ་མེད་པར་གྲགས། གཞན་ཡང་སྟག་ལུང་མ་རིན་པོ་ཆེ། འབྲི་གུང་ཞབས་དྲུང༌། ཀརྨ་པ་ཞྭ་དམར་ནག །རྡོར་བྲག་ཞབས་དྲུང༌། སྒམ་པོ་ཞབས་དྲུང༌། གཏེར་སྟོན་འཛམ་གླིང་རྡོ་རྗེ། སྤྲུལ་སྐུ་རྣམ་གསུམ་སོགས་གངས་ཅན་གྱི་སྐྱེས་ཆེན་དུ་མའང་འབུལ་ཞབས་ཀྱིས་མཉེས་པར་མཛད་ནས་དབང་ཆོས་འབྲེལ་བ་མང་དུ་གསན། སོ་གཅིག་ལ་ལྡེམ་ཆེན་གྱི་ཡར་ཞོལ་དུ་ཆོས་ཁྲི་བརྩིགས་ནས། སྐྱ་སེར་གྱི་འདུས་པ་མང་པོ་ལ་ཕྱག་ཆེན་གྱི་ཁྲིད་རྒྱས་པ་དང༌། རྒྱབ་ཆོས་སུ་པད་དཀར་ཆོས་འབྱུང་དང་གོང་མའི་བཀའ་འབུམ་གྱི་ལུང༌། མི་འཁྲུགས་པའི་དབང་སོགས་བཀའ་ཆོས་རྒྱ་ཆེར་གནང༌། གཞན་ཡང་སྟོད་སྨད་ཀྱི་ཡུལ་རིས་དུ་མར་ཕེབས་ནས་སྐུ་མཚམས་དང་བསྟན་འགྲོའི་དོན་སྤེལ་མར་མཛད། རབ་བྱུང་བཅུ་གཉིས་པའི་ཆུ་འབྲུག་༼༡༧༡༢༽ལོར་འཛི་ཡུལ་ལྡེམ་པོ་ཆེའི་ཞོལ་དུ་གཙུག་ལག་ཁང་གི་རྨང་བཏིང་ཞིང༌། རྒྱལ་དབང་མི་ཕམ་དབང་པོ་ནས། སྤྱན་དམིགས་གཏད་པའི་འཐོར་ནས་བསྩལ་བ་དང་ཆབས་ཅིག །སྒྲུབ་བརྒྱུད་ཕོ་བྲང་ཞེས་མཚན་གསོལ། གཙུག་ལག་ཁང་ལེགས་པར་གྲུབ་པའི་རབ་གནས་ལ་རྗེ་ཀུན་དགའ་བསྟན་འཛིན་སྤྱན་དྲངས་ཤིང༌། རྗེ་དེ་ཉིད་ནས་རྗེ་མི་ལའི་སྐུ་བརྙན་ཀརྨ་པ་ཞྭ་དམར་མཁའ་སྤྱོད་དབང་པོས་ཀ་རུའི་རྡོ་ལ་ཕྱག་བཟོ་གནང་བ་དང༌། ཀ་པཱ་ལ་དུམ་བུ་གཅིག་པ་གསེར་མདོག་མ་ཁྱད་ཅན་སོགས་གནང་སྐྱེས་བཟང་པོ་དང་བཅས་བརྟན་བཞུགས་བསྩལ། ཕར་ཡང་དངོས་ནོར་གྱི་བརྒྱ་འབུལ་གྱ་ནོམ་པ་མཛད། གྲྭ་པ་རྣམས་ཀྱིས་རྗེ་འབྲུག་པའི་གདན་ས་བྱམས་ཆེན་ཆོས་གླིང་ནས་དབྱངས་རོལ། དུང་རྒྱ་གླིང༌། གཏོར་བཟོ་སོགས་རིན་ཆེན་ཕྲེང་བའི་ཆོ་ག་ཕྱག་ལེན་ཐམས་ཅད་དཔྱིས་ཕྱིན་པར་བསླབས་ཏེ། དགོན་པར་སྒྲུབ་མཆོད་དུ་མ་གསར་དུ་ཚུགས། རྗེ་བསོད་ནམས་རྒྱ་མཚོ་ནས་བརྒྱུད་པའི་སྔོན་ཚོགས་བརྒྱའི་སྐབས་ཀྱི་ཕྱག་ལེན་ཡོད་རིགས་ལ་ཁམས་ལུགས་དང༌། ཕྱིས་སུ་བོད་དབུས་ནས་སྦྱངས་པའི་ཕྱག་སྲོལ་འདི་རིགས་ལ་བོད་ལུགས་ཞེས་གྲགས། དེ་ནས་བཟུང་དབུས་ཀྱི་གདན་ས་དང་དགོན་མ་བུའི་འབྲེལ་བ་བྱུང༌། སྐུ་དུས་འདིར་རང་དགོན་དུ་བཀའ་འགྱུར་གསར་བཞེངས་དང༌། དཔལ་ལྡན་འབྲུག་པའི་འཁྲུངས་རབས་བདུན་ཐང༌། གནས་བཅུ་གྲ་ཐང་ཉེར་གསུམ། མགོན་མང་སྐོར་གྱི་ཞལ་ཐང༌། བྱར་ཡུལ་སྔགས་གྲྭའི་ནང་རྟེན་སྔོན་སྤྲུལ་སྐུ་མཚོ་སྐྱེས་རྡོ་རྗེས་བཞེངས་པའི་དཀར་བརྒྱུད་གསེར་འཕྲེང་ཁྱད་འཕགས་ཅན་དེ་ལ་མ་ཕྱི་གནང་ནས་ལྷ་རིགས་འགའ་ཞིག་ཁ་བསྐངས་བཅས་པ་སོགས་རྟེན་དང་བརྟེན་པ་གསར་དུ་བཞེངས། རྗེ་འདི་དཀོན་མཆོག་ལ་བཀུར་སྟི་ཤིན་ཏུ་ཆེ་བས། གཞན་གྱིས་འབག་བཙོག་སོགས་ཕྲན་བུ་བྱེད་པ་གཟིགས་ནའང་ཧ་ལས་པ་ལྟར་གནང་ཞིང་ནན་གྱིས་འགོག་ཅིང༌། བླ་མ་སུ་འདྲ་དང་མཇལ་ཡང་གོང་དུ་བཀུར་བ་གནང༌། ཐམས་ཅད་མཁྱེན་པའི་གྲྭ་རིགས་སུ་གཏོགས་ཚད་ལ་ཕྱག་ལེན་མཛད་ཅིང༌། སེར་གོས་གོན་ཙམ་གྱི་བྱ་བྲལ་བ་ཡན་ཆད་ལ་དབུ་དུད་པ་དང་ཞེ་ས་གནང་བ་སོགས་དཔལ་ལྡན་འབྲུག་པའི་ཆེ་བ་རྣམ་གསུམ་ཐུགས་དམ་གྱི་མཐིལ་དུ་མཛད་པར་གྲགས། ལྐོག་གྱུར་མཁྱེན་པ་དང༌། ནད་པ་ཤི་བ་ལྟར་གྱུར་ཚེ་སྐྲ་ནས་འཐེན་པས་སོས་པ་བྱུང་བ་སོགས་གྲུབ་པའི་རྟགས་ཀྱང་མང་པོ་མངའ། དབུས་ཀྱི་གདན་སར་འབུལ་བསྙེན་ཐེངས་མང་དང༌། ལོ་རི་དགོན་ལ་མདོ་མང་སྐོར་དང་རང་གི་གཅེན་ནང་སོ་དཀོན་མཆོག་ཕྲིན་ལས་བཟང་པོ་ལ་འདུལ་བ་བཅས་ཀྱི་གསུང་རབ་མང་པོའི་གནང་སྐྱེས་བསྩལ་ཅིང༌། དེའི་ཡང་སྲིད་རྩ་འཛིན་དང་གདན་ས་རོང་རེ་ཁེ་རྡོ་རྗེ་རྫོང་དུ་ཁྲི་འདོན་གནང་བ་སོགས་ཀྱིས་གཟིགས་བསྐྱངས་མཛད། དེ་ནས་དགུང་ལོ་ཞེ་བརྒྱད་པ་ས་ཕག་༼༡༧༡༩༽ལོའི་ནག་ཟླའི་གནམ་གང་འཕར་བའི་ཚེས་ཕྱི་མའི་དགོང་མོར་ཞི་བའི་དབྱིངས་སུ་གཤེགས་སོ། །སློབ་མ་ནི་དབོན་མཁས་གྲུབ་དགེ་ལེགས་རིན་ཆེན་དང༌། རྟོགས་ལྡན་དཔལ་ལྡན་དབང་ཕྱུག་སོགས་མང་པོ་བྱུང་ངོ༌། །