པད་སྙིང་ཀརྨ་རྒྱ་མཚོའི་རྣམ་ཐཪ།

༈ རྫ་པད་སྙིང་ཀརྨ་རྒྱ་མཚོ་ནི། མདོ་ཁམས་སྒང་དྲུག་གི་ནང་ཚན། རྨ་རྫ་ཟལ་མོ་སྒང་གི་ཆར། གླིང་རྫ་ཆུའི་འགྲམ་སྨོན་ལམ་བྲག་དཀར་ཞེས་པའི་ཕྱོགས་སུ། རབ་བྱུང་བཅུ་པའི་ནང་ཙམ་དུ་སྐུ་འཁྲུངས། མཚན་གཞན་བསྟན་འཛིན་ཆོས་དབང་རྒྱ་མཚོའང་ཞུ། འཕགས་མཆོག་གསང་ཆེན་ཌིངྒི་པཱའི་རྣམ་འཕྲུལ་དུ་གྲགས། ཁམས་གྲུབ་དབང་ཀརྨ་བསྟན་འཕེལ་ལ་མཉེས་པ་གསུམ་གྱིས་བསྟེན་ཅིང་གདམས་ངག་རྣམས་བུམ་པ་གང་བྱོའི་ཚུལ་དུ་གསན། གཞན་ཡང་མཁས་གྲུབ་བསོད་ནམས་རྒྱ་མཚོ་སོགས་བླ་མ་དུ་མ་བསྟེན། པད་སྙིང་བླ་རྒན་ཕྱིང་རྩག་ཅན་ཞེས་སྐུ་བཙུན་པའི་ཚད་དུ་འདྲེན། རྫ་ཞེ་ཆེན་དགོན་པར་བླ་སྤྲུལ་དུ་མ་གློ་བུར་རྐྱེན་དབང་གིས་གཤེགས་པ་མང་དུ་བྱུང་སྟེ། གདན་འདྲེན་ཞུས་པས། ལམ་བར་དུ་མནལ་འོད་གསལ་ངང་གནོད་བྱེད་དག་ལ་བཀའ་བསྒོས་དམ་བཞག་མཛད་ཅིང༌། དེར་བླ་གྲྭ་རྣམས་ལ་ཚེ་དབང་བསྐུར་བས། དེ་ཕྱིན་བར་ཆད་དེ་དག་ཞི་ནས་བདེ་བར་གྱུར། རྫོགས་ཆེན་རིན་པོ་ཆེ་པདྨ་རིག་འཛིན་གྱིས་འཕགས་པ་སྤྱན་རས་གཟིགས་དངོས་སུ་གཟིགས་ཏེ། ཕྱག་ཕུལ་ཅིང་གུས་བཀུར་ཚད་མེད་གནང༌། ཡོན་དགེ་གཏེར་ཆེན་མི་འགྱུར་རྡོ་རྗེ་རྫ་རྒྱུད་པད་སྙིང་དགོན་དུ་བྱོན་སྐབས། པད་སྙིང་བླ་རྒན་ལ་ཚེ་དབང་གནང་ཞིང༌། ཚེ་སྒྲུབ་འདོན་སྟངས་ལྕགས་སླང་བརྡུངས་ནས་བསླབས་པར་གྲགས་པས། ཚེ་སྒྲུབ་ལྕགས་རྡུང་མ་ཞེས་དེང་སང་ཡང་དེ་བཞིན་དུ་འདོན་སྲོལ་ཡོད། ཡོན་དགེ་གཏེར་ཆེན་ནི་རྗེ་བསོད་ནམས་རྒྱ་མཚོའི་དངོས་སློབ་ཡིན་ཞིང༌། རབ་བྱུང་བཅུ་པའི་ས་འབྲུག་ལ་འཁྲུངས། དེ་ནས་ལོ་ངོ་བཅུའི་མཚམས་ཀརྨ་བསྟན་འཕེལ་འདས། གཏེར་ཆེན་འདི་དགུང་ལོ་མཐོན་པའི་བར་དུ་བཞུགས་སོ། །གཞན་ཡང་རྫོགས་ཆེན་རིན་པོ་ཆེ་པདྨ་རིག་འཛིན་དང་འཕོ་བའི་རྩལ་འགྲན་པ་སོགས་ཐུན་མིན་གྱི་ཡོན་ཏན་མང་དུ་མངའ་ཞིང༌། རང་དགོན་བཤད་སྒྲུབ་ཆོས་འཁོར་གླིང་དུ་དམ་པ་ཆོས་ཀྱི་འཁོར་ལོ་བར་མེད་དུ་བསྐོར་ཏེ། འགྲོ་བ་མང་པོ་སྨིན་གྲོལ་ལ་བཀོད་པའི་མཐར་ཞི་བར་གཤེགས་སོ། །དེ་ནས་རིམ་བཞིན་བསྟན་འཛིན་ཡེ་ཤེས་རྒྱ་མཚོ། བསྟན་འཛིན་ཐུབ་བསྟན་སངས་རྒྱས་ཡེ་ཤེས། བསྟན་འཛིན་ཀརྨ་ངག་དབང་རྒྱ་མཚོ། ཐུབ་བསྟན་ཡེ་ཤེས་རྒྱ་མཚོ། ཐུབ་བསྟན་ཕྲིན་ལས་རྒྱ་མཚོ། ད་ལྟར་འཚོ་གཞེས་པ་ལུང་རྟོགས་སྐལ་བཟང་རྒྱ་མཚོའི་བར་བསྟན་འགྲོའི་དོན་དུ་ཌིངྒི་པཱ་ནས་བརྩིས་ན་སྐུ་ཕྲེང་བརྒྱད་དམ། གྲུབ་དབང་ཀརྨ་རྒྱ་མཚོ་ནས་བགྲངས་ན་སྐུ་ཕྲེང་བདུན་ཙམ་བྱོན་པའོ། །ཁྱད་པར་རྗེ་ཐུབ་བསྟན་ཕྲིན་ལས་རྒྱ་མཚོའི་སྐུ་དུས་སུ་སྒྲུབ་སྡེ་དར་སྤེལ་དང༌། བཤད་གྲྭ་གསར་འཛུགས་མཛད་པ་སོགས་ཕྱག་རྗེས་ཤིན་ཏུ་ཆེ་བས་རྣམ་ཐར་འོག་ཏུ་གསལ་ཞིང༌། གཞན་ཡང་དགོན་འདིར་པད་སྙིང་བཞི་པའི་དབོན་ཁྱབ་བདག་རྡོ་རྗེ་ནས་རིམ་བཞིན་དབོན་སྤྲུལ་སྐུ་ཕྲེང་བཞི་སོགས་བླ་སྤྲུལ་མང་པོ་བྱུང་ངོ༌། །