དམ་པ་གསུམ་ལས་དམ་པ་ཀོ་བྲག་པའི་རྣམ་ཐར།

༈ དམ་པ་གསུམ་ལས། ཀོ་བྲག་པ་བསོད་ནམས་རྒྱལ་མཚན་ནི། ཡུལ་དིང་རིར། ཡབ་གཙོ་བོ་རྒྱལ་གཡུང་དང་ཡུམ་སྟོད་མོ་རྗེ་མ་གཉིས་ཀྱི་སྲས་སུ་རབ་བྱུང་གསུམ་པའི་ཆུ་སྟག་༼༡༡༨༢༽ལོར་འཁྲུངས། འབྲི་ཀློག་རྩོལ་མེད་དུ་མཁྱེན། སེ་མིག་པ་ལ་དགེ་བསྙེན་མཛད། པཎ་ཆེན་ཤཱཀྱ་ཤྲཱི་ལ་བློ་སྦྱོང་སོགས་གསན། གྱམ་དུ་བླ་མ་རྡོ་རྗེ་དཔལ་བ་ལ་རིག་འཛིན་བཅུ། རྫོགས་ཆེན་དམར་ཁྲིད་ལ་སོགས་ཆོས་མང་དུ་གསན། རྒྱ་ཕུག་ཇོ་སྲས་ལའང་རྫོགས་ཆེན་ལ་སོགས་གསན། གྱང་རིམ་དང་ཀོང་མོའི་རི་ལ་མཚམས་མཛད་པས་ཕྱག་རྒྱ་ཆེན་པོའི་རྟོགས་པ་འཁྲུངས། པཎ་ཆེན་རཏྣ་རཀྵི་ཏ་ལ་བདེ་མཆོག་གི་དབང་གསན། དེ་ནས་ལ་ཕྱི་སོགས་སུ་བཞུགས། ཆོས་རྗེ་སྐོས་ལ་མཁན་པོ། ཕྱ་རུ་འདུལ་འཛིན་ལ་སློབ་དཔོན། སློབ་དཔོན་ལོ་ལ་གསང་སྟོན་ཞུས་ནས་ཉེར་དགུ་ལ་དགེ་སློང་ཆིག་རྫོགས་མཛད། མཚན་བསོད་ནམས་རྒྱལ་མཚན་དུ་གསོལ། དེ་ནས་ཏི་སེར་བྱོན་ལོ་ལྔ་བཞུགས། ཇི་ལྟ་བ་དང་ཇི་སྙེད་པའི་མངོན་སུམ་གྱི་ཡེ་ཤེས་བརྙེས། ཁྱད་པར་རྡོ་རྗེ་ལུས་ཀྱི་གནས་ལུགས་ཇི་ལྟ་བ་བཞིན་དུ་གཟིགས། མ་ཕམ་གྱི་ཀླུས་ཆུའི་དངོས་གྲུབ་ཕུལ། ཕྱིས་མྱང་སྟོད་ཀོ་བྲག་གི་དགོན་པ་བཏབ་པས་ས་སྐམ་པོ་ལ་ཆུ་མིག་བརྡོལ། ཀོ་བྲག་པ་ཞེས་ཀྱང་གྲགས། འདི་ལ་ནི་སྒྲུབ་པ་པོ་དང་མཁས་པའི་མཆོག་ཐམས་ཅད་ཀྱིས་ཀྱང་ཞབས་ལ་གཏུགས། ཆོས་ལའང་འདི་མི་མཁྱེན་བྱ་བ་མེད། བལ་པོ་ནས་བི་བྷུ་ཏི་ཙནྡྲ་དིང་རིར་སྤྱན་དྲངས། ཁོང་ལ་ཤ་བ་རི་དབང་ཕྱུག་གིས་གནང་བའི་སྦྱོར་བ་ཡན་ལག་དྲུག་གི་གདམས་ངག་གསན། པཎྜི་ཏས་ཀྱང་ཚུར་ཆོས་ཞུས། འགྲོ་བའི་དོན་རྒྱུན་མི་འཆད་པ་དང་རྒྱ་ཆེ་བ་གཉིས་མཛད་ནས། བརྒྱད་ཅུ་པ་ལྕགས་མོ་བྱ་༼༡༢༦༡༽ ལོར་ཞི་བར་གཤེགས་སོ། །སློབ་མ་ནི། དཔལ་ཡང་དགོན་པ། དེའི་གཅེན་པོ་རིན་པོ་ཆེ་རྒྱལ་མཚན་པ། རིན་པོ་ཆེ་ལྷ་གདོང་པ། རིན་པོ་ཆེ་བར་འབྲོག་པ་སོགས་ཤིན་ཏུ་མང་ངོ༌། །ལྷོ་རོང་ཆོས་འབྱུང་ལས། ཆོས་རྗེ་གཙང་པ་དང༌། མ་གཅིག་ཞ་མ་ལས་ཀྱང་གདམས་པ་གསན་ནས་རྩོད་པ་མེད་པའི་གྲུབ་ཐོབ་ཏུ་གྱུར་ཏེ། རྡོ་རྗེ་ལུས་ཀྱི་གནས་ལུགས་གཟིགས་པས་གེགས་སེལ་མཁས་པའི་མཆོག་ཏུ་གྲགས་ཞེས་གསུངས་པས། གོང་དུ་དེབ་སྔོན་ལས་རྡོ་རྗེ་ལུས་ཀྱི་གནས་ལུགས་ཇི་ལྟ་བ་བཞིན་དུ་གཟིགས་ཞེས་གསུངས་པ་དང་འགྲིགས་ཤིང༌། ཆོས་རྗེ་གཙང་པ་ལས་དགུང་ལོ་ཉེར་གཉིས་འདི་གཞོན་པས་བླ་སློབ་ཀྱི་དུས་ཚོད་ཀྱང་མཚུངས་པར་སྣང་ངོ༌། །དེས་ན་མཚན་ཀ་བྲག་པ་ཞེས་དཔེ་ཕལ་ཆེར་ལ་འཁོད་པ་ནི་ན་རོ་ཆད་པར་སྙམ། འོན་ཀྱང་འཁྲུངས་ཡུལ་ཅུང་ཟད་མི་མཐུན་པས་དཔྱད་པར་བྱའོ། །