གཅུང་རྒྱལ་ཚབ་ངག་གི་དབང་ཕྱུག་གི་རྣམ་ཐར།

༈ གཅུང་རྒྱལ་ཚབ་དམ་པ་ངག་གི་དབང་ཕྱུག་གྲགས་པ་རྒྱལ་མཚན་དཔལ་བཟང་པོ་ནི། རྗེ་ངག་དབང་ཆོས་རྒྱལ་ལ་སྲས་གཉིས་བྱུང་བའི་ཆུང་བར། རབ་བྱུང་དགུ་པའི་མེ་གླང་༼༡༥༡༧༽ལོར་སྐུ་འཁྲུངས།༼དེང་སང་ལོ་རྒྱུས་འགར་འདི་འཇམ་དབྱངས་ཆོས་གྲགས་ཀྱི་གདུང་སྲས་ཡིན་ཟེར་བྲིས་པ་ནི་ནོར་བའོ།༽དགུང་ལོ་ལྔ་པ་ལ་ཡབ་རྗེ་ངག་དབང་ཆོས་ཀྱི་རྒྱལ་པོ་ལས་སྡོམ་པ་གསུམ་གྱི་ནོར་བུས་ཐུགས་རྒྱུད་གཏམས་ནས་ཆོས་ཀྱི་ཁྲི་ལ་མངའ་གསོལ། གང་ལས་བཀའ་འགྱུར་རོ་འཚལ་དང༌། འབྲུག་པའི་ཡབ་ཆོས་སྨིན་གྲོལ་གདམས་པ་གྲངས་ལས་འདས་པ་གསན། རྒྱུད་སྡེ་ལ་སྦྱངས་པ་དང༌། སྐྱོག་ལོ་ཙཱ་བ་ལས་སྒྲ་སྙན་ངག་སྡེབ་སྦྱོར་མངོན་བརྗོད་སོགས་ཐུན་མོང་རིག་གནས་ལ་མཁས་པའི་ཕུལ་ཕྱིན་མཛད། ཉིད་ཀྱི་གཅེན་དང༌། བླ་མ་དམ་པ་ཨ་ཝ་དྷཱུ་ཏི་པ་སོགས་བསྟེན་ནས་མདོ་སྔགས་ཀྱི་ལུང་དང་མན་ངག་རྒྱ་མཚོའི་ཕ་རོལ་དུ་སོན། གདན་ས་ཆེན་པོ་དེ་ཉིད་དུ་ལོ་གསུམ་དང༌། རོང་རི་གྲ་མ་སྨུག་པོ་སོགས་སུ་ཡུན་རིང་དུ་སྒྲུབ་པ་མཛད་ཅིང༌། ལྷག་པའི་ལྷ་མང་པོས་ཞལ་མངོན་དུ་གཟིགས། ཡབ་རྗེའི་གདུང་རྟེན་བཀྲ་ཤིས་སྒོ་མང་སོགས་སྐུ་གསུང་ཐུགས་ཀྱི་རྟེན་བསམ་ལས་བརྒལ་བ་དང༌། ནོར་བུའི་གླིང༌། སྤོས་སྐྱའི་གཙུག་ལག་ཁང་སོགས་ཕྱག་རྗེས་ཆེ་བར་མཛད། དབུས་གཙང༌། འཕན་ཡུལ། འབྲོག །ལྷོ་མོན་ཀུན་ཏུ་ཞབས་ཀྱིས་ལན་མང་བཅགས་ཤིང༌། སྡེ་སྲིད་ཕག་མོ་གྲུ་པས་ཀྱང་ཕུད་དུ་ཁུར། ཉིད་ཀྱི་སྲས་མི་ཕམ་ཆོས་ཀྱི་རྒྱལ་པོ་དང༌། སྐུ་ཞང་ཆོས་རྗེ་མཁྱེན་བརྩེ་བ། འབྲུག་སྨྱོན་ཀུན་ལེགས་ཀྱི་སྲས་ངག་དབང་བསྟན་འཛིན་སོགས་སྐལ་ལྡན་སློབ་མ་མང་པོ་སྨིན་གྲོལ་ལ་བཀོད། གཙོ་བོར་ཐམས་ཅད་མཁྱེན་པ་ངག་དབང་ནོར་བུའི་ཡོངས་འཛིན་མཛད་དེ་རྒྱལ་བའི་བཀའ་དང༌། བཀའ་བརྒྱུད་ཀྱི་བཀའ་འབུམ། སྒྲུབ་སྐོར་གདམས་ངག་ཟབ་ཅིང་རྒྱ་ཆེ་བ་བསྩལ་ནས་བསྟན་པའི་བདག་པོར་དབང་བསྐུར། དགུང་ལོ་སོ་བརྒྱད་པ་ཤིང་སྟག་༼༡༥༥༤༽ལོར་གཞན་གྱིས་ཕྲག་དོག་གི་དབང་གིས་སྦྱར་བའི་ཟས་སྐྱོན་གྱིས་ཟླ་བ་བཞི་པའི་ཚེས་ལྔའི་སྐྱ་རེངས་ཤར་དུས་སུ་གཤེགས་པའི་སྔ་དྲོར་འཇའ་ཁ་དོག་ལྔ་པ་རྩེ་མོ་གཉིས་པ་ཤར་ཕྱོགས་ནས་གདུང་གི་སྟེང་དུ་ཟུག་པ་དང༌། སྤུར་ཞུགས་ལ་ཕུལ་བའི་མཚན་རིལ་པོར་ཆར་ཆེན་པོ་དང་ལྷན་ཅིག་མེ་ཏོག་ཡལ་ག་དང་འདབ་མར་ལྡན་པའི་སྡོང་བུ་ཁ་དོག་སྣ་ཚོགས་པ་ཡོད་པ་ཅིའང་བབ་པར་གྱུར་ཏོ། །དེའི་ཚེའི་ཀུན་མཁྱེན་པདྨ་དཀར་པོས། ཆོས་ཀྱི་རྒྱལ་པོའི་ཉི་མ་ནུབ་རིར་བཞུད། །རྒྱལ་ཚབ་ཟླ་ཚེས་དེ་ཡང་དེར་རྗེས་བསྙེགས། །ད་ནི་སྙིགས་དུས་མཚན་མོར་འཁྱམས་རྣམས་ལ། །དབུགས་འབྱིན་ནུས་པའི་སྣང་བྱེད་སུ་ཞིག་ཡོད། །ངག་དབང་སྤྲིན་ཕྲེང་ཡོལ་ནས་ཡུན་རིང་ལོན། །སྐྱོབ་པའི་གཅུང་གི་འཁྲི་ཤིང་དེ་རིང་བསྐམས། །བསྐྱབ་སའི་གྲིབ་མ་གཞན་མེད་འབྲོག་དགོན་འདིར། །བདག་ལ་འཆི་བ་མིན་པའི་སྐྱབས་གཞན་སུ། །ཞེས་སོགས་ཀྱི་གདུང་དབྱངས་ཀྱང་གསུངས་སོ། །